Read South Giziga PHP 2 Bible Online

PHP 2 - South Giziga bible

PHP 2

¹Jum kum ati Kristu na, ada vulukum gidaŋ kwa? Wuɗavu naŋ na, ada tusukum didak gidaŋ kwa? Kum ada jom ati ˀUf Mipala kwa? Kum ada wuɗam vu, yo kum ada puram ˀircece ar wala kumo kwa?

²Da kanah na, gikiy gwat ngi cira hiri wãˀ ti jumoˀay kum purla, ti wuɗavu misi purla, ti mevel purla, yo ngiɓam ˀay.

³Anja ki gam gwat ɓa mizli a puram i kumo si ta, yo ki huhumo vu ta. Ammahinam hirngaŋ, puraka mizli mekelemeye, kaɓa a funukum le.

⁴Anja mbur a pur di i gwat ngi pula gir da naŋ tewle ta, amma da mizli mekelemey aya.

⁵Gaka kahana ar wala kumo, kaɓa mizli magaka tisi Yesu Kristu na.

⁶Kristu, naŋ zlezle ti kpak ngi Buymisemuŋ vuna si. Amma naŋ, a pura kaɓa, ɓa a ndiram rak rak ati Buymisemuŋ na, i gwat ngi ji ti gidaŋ ta.

⁷Amma naŋ ti haŋ naŋ, a pula gwat naŋ misi ti naŋ zleˀe gar, a zuɓ kpak ngi mbur beke, a tiri rak rak ati mizli. Deŋ naŋ na, mizli a puraka kaɓa i mburu.

⁸A hin hirnga, a cin mi, hã avu mucu, muc angi dum mizliraŋ.

⁹Vurˀe, Buymisemuŋ a cifaŋ ar li ngi dudok miwãˀ naŋ, yo a caŋ slimiɗ mifineˀ slimiɗey gar,

¹⁰ɓa gwat ngi muŋhoy gar ati mizli ngi ruwuyoy gar, waɗ mizli mumucahay gar, taŋ micinam slimiɗ ngi Yesu le gar na, a dilkam ti popurok,

¹¹ɓa mizli gar a tilam mi, a ɓam: «Yesu Kristu i Bumbulvuŋ», ɓa ngi ga dudok da Cine ndra Buymisemuŋ.

¹²Naŋ kanah, yeme ɗuwoy, zleˀe na, ki cinikiy mi le ndrehhe. Anja ki cinikiy mi, sey da y'ada avu kumo tew ta, amma ko ti ya misi anta avu kum wurenna ta na kwana, cinikiy mi fineˀ misi zleˀe jaka. Cikam vu ti ɓi ngi lih kumo, ti zluwun waɗ ti jijik kirkir.

¹³Asi Buymisemuŋ ara gi slra ndrehhe a hur kumo, ɓa a tiri ti kum ter ngi wuɗa gwat ati ngi gi naŋ, kaslsla kaɓa naŋ miɗiya jiviɗ naŋ.

¹⁴Gwat gar na, gaka manja mbulo mi, manja cici kaŋ kaŋ,

¹⁵ɓa ki ndiram manja ɓi ngi mbuɗukum hirnga aseˀe, manja gi gwat malambaˀ, ziri ngi Buymisemuŋ, manja hereweɗ a wuzla mizli mingizlam le avu jiviɗe, misi wuluk cuw cuw hanayna. Sey ki pusluɗam carayya a wuzla taŋ, kaɓa miviɗi viɗi ngi li mijahha ngi duniya.

¹⁶Asi ki ra raka taŋ ti ɓi ngi siifa. Da ki ra gam kanah na, kite ki gikiy di i dudok vur hin ngi Kristu, yo slra ya miga, ya migir di kupuyah wãˀ na, kite i ngatara ta.

¹⁷Na, da sey pumbus ɗu a sa pi, ka gwat ngi pusl a mikuli asi slra vur tiɓi kum na tekeɗe kwana, haˀaw, a ciriy hiri, yo i sa mumulom bumoˀ gar ndra.

¹⁸Kumo kwana, kanah ya, cinam ndum, mumulukum bumoˀ.

¹⁹I wa na, tisi Buy Yesu, neˀ ngrˀa mbuŋ aka na, i sa slinukum Timote, ɓa ya kwana, ɓi kum ya masa cine na, a sa tisliy mevel aya.

²⁰Misi wuluk naŋ jom ati ya, yo malikukum gisiŋ gisiŋ na, i naŋ pal naŋ.

²¹Mizli mekelemey gar na, a puram i li lum taŋ tewle, anta ngi pula gir da Yesu Kristu ta.

²²Amma ki sinaka le, Timote a biga le, naŋ teŋteŋ: Ya ati naŋ na, i gam slra ngi Ɓimezle le jom kaɓa mangal ati cine.

²³Da ɓi ɗu a sa bun le ndar na, i wa na, i sa slinukum di i naŋ.

²⁴Na zle, ar ya mujom ati Bumbulvuŋ na, i si na le gisiŋ, neˀ ngrˀa mbuŋ aka, ya vuna, i sa ra purukum aya.

²⁵Amma i pura na, a zlir le ɓa i slinukum sukum ndra Epafrodit a muŋ. I gam slra le jom, yo i cikam vu le cuwa. I mbur kum mislinoko di ɓa ngi jiniy, dambalaka yi ro ti may naŋ vuna zleˀe.

²⁶Naŋ, a ro ti may haɗi nga purukum gar kumo, yo a ro welele asi kum micinaka ɓi ngi jiji naŋ na.

²⁷Naŋ guta zleˀe gisiŋ gwaɗ naŋ, gweˀ ngi mucu. Amma Buymisemuŋ a puraŋ ˀircece le, da naŋ tewle ta, amma da ya ya, ɓa i ndir ar li ndurɓo hiri ta.

²⁸I ra wus vu ngi slinukum di a muŋ, ɓa kum misa puraka le na, kisa mumulom ma, yo ya kwana, y'anta sa lik wãˀ mata.

²⁹Naŋ kanah, tiɓakaŋ mulaka ti mumul kuy kuy, tisi Bumbulvuŋ so, yo kam slimiɗ ar mbur misi ka naŋ na.

³⁰Asi mike na, a ndir mata ɓa a muc asi slra ngi Kristu. Gwat kum vuna migikiy di gu ta na, naŋ, a vula hirnga naŋ le ɓa ngi naha mi naŋ.