Read South Giziga PHP 3 Bible Online

PHP 3 - South Giziga bible

PHP 3

¹Sukum ɗuwoy, wurenna, mumulom ar kum mujom ati Bumbulvuŋ na! Ɓa yi mukum hiri ngi ɓi ya mutuhukum di zleˀe na, anta giriy ta. Yo avu kumo kwana, a vulukum gidaŋ.

²Jam lesl avu kirihey, jam lesl avu mizli magam lambaˀlambaˀa. Jam lesl avu mizli macam mizaw migisiŋ gisiŋ ta na.

³Asi macam mizaw migisiŋ gisiŋ na, i ndra, ndra madiram dibiɗ ti ˀUf ngi Buymisemuŋ, ndra majijaham mbele Yesu Kristu, yo ndra mupulaka vu ndra da hirnga ndra tehhe a muŋ ta na.

⁴Dambalaka, zliv yi pula vu ɗu da hirnga ɗu gu zleˀe ngbaŋ. Da mbur mekeleme, a wa kaɓa a pula vu naŋ da hirnga naŋ tehhe a muŋ gu na, yi pula gu fineˀ naŋ.

⁵Ya, a cikiy a mizawa ti hin dangafaɗa, yi mbur Israyel, yi tizer ngi Benyameŋ. Yi mbur Heber mijeŋŋe naŋ, vur ɓimujuwa na, yi mbur Farisa.

⁶Yi hurdum le hirdam ngi sipa cikil ngi misikristuhoyo nder nder. Vur gi jeŋŋe mbur maluma tisi ɓimujuwa na, ko mbur mambiɗiy hirnga aseˀe gu, anta.

⁷Amma gwat tayna gar, ya mapura taŋ zleˀe kaɓa i li lum ɗu na, wurenna yi pura taŋ kaɓa i zizi ti zizi, asi ɓi ngi Kristu.

⁸Na, ya mapura taŋ kaɓa i zizi ti zizi na, asi i ra pur li lum madiɗa mifineˀ tayna: i si na Buy ɗu Yesu Kristu. I pula gwataya le gar avra aseˀe. I pura taŋ gar kaɓa gwat ngir kitikiley, ɓa ngi luuma Kristu.

⁹I ndir jom ati naŋ wãˀ, anta asi gi jeŋŋe ɗu, ya maluma tisi ɓimujuwa na ta. Amma asi gi jeŋŋe, mbur maluma ti tiɓi Kristu na, i gi jeŋŋe maso ti vu Buymisemuŋ, yo naŋ maɗiya mburo jeŋŋe a mbuŋ naŋ tiɓi na.

¹⁰I wuɗ si na gwat mekelem ta, sey Kristu tewle ati gidaŋ naŋ mislikiɗ di baɗ a wuzla mumucahay. I wuɗ ɓa y'ada jom ati naŋ angi bonoy naŋ, yo ɓa i muc muc misi purla ati nga naŋ na ya,

¹¹da a gi na, i sa slikiɗ ti wuzla mumucahay aya.

¹²Y'anta ɓi aka: «i luuma taŋ le gar si», malla «ya manja hereweɗ si» na, y'anta ɓi ta. Amma i ra kil haɗa haɗa, ɓa sey yi ja migir ɗu asi haŋ, asi ya vuna, Yesu Kristu a jiy le si.

¹³Sukum ɗuwoy, y'anta wuluk, kaɓa yi ja le si ta. Amma ya malik i gwat purla si: i ra puyuk hirnga ti gwat ngi dirba, i ra kiɗ vu baram baram nga mbuŋ.

¹⁴Naŋ kanah, i ra kiɗ vu ngi ndila pi mi, ɓa i ra lum migir, Buymisemuŋ mazila ndra tisi Yesu Kristu nga tiɓi naŋ ar li ngi muŋ na.

¹⁵Ndra minaham le ar jiviɗ ngi Kristu gar na, sey ndurukum ti wuluk misi kahana. Yo da ar gwat mekelemeye, ki ra wulkam pal na, Buymisemuŋ a sa bunukum hiri naŋ ma.

¹⁶Wurenna na, akum tir jiviɗ misi purla si, jiviɗ ndra misi anga hã dana na.

¹⁷Sukum ɗuwoy, kum jom gar kumo, sipaka sar ɗu. I bugukum gwat ngi gi le. Na so na, ɗuvaka hiri kumo taˀ ar mizli masipaka sar ndra na.

¹⁸Asi mike na, mizli ada haɗa magam gwat kaɓa taŋ i mesene ngi dum mizlira ngi Kristu. Yi ɓukum di le is mbeˀbeˀ, yo wurenna, i ra mahiri naŋ ava ti tuwuy kolkol.

¹⁹Kiɗa mi nga taŋ, i zizi. Asi bumbulvuŋ nga taŋ, i kwacay taŋ. A jijaham nga taŋ asi gwat ngi pi mesem. A wulkam a mevel taŋ, i gwat ngi ruwuy aka tewle.

²⁰Na ndra, walahay ndra, naŋ a muŋ, ndra makutukoko Buy Milih ndra Yesu Kristu masa sawa na, baɗ a diga.

²¹A sa mbiɗa dumvu ndra migeˀ ˀircece le na, ɓa a tiri di ti dudok kaɓa nga naŋ. A sa ga ti gidaŋ naŋ, maga ɓa gwatay gar a hinam hirnga a mbuŋ naŋ na.