Read South Giziga PHP 4 Bible Online

PHP 4 - South Giziga bible

PHP 4

¹Naŋ kine so, sukum ɗuwoy, ya mawuɗokum haɗi, yi ro ti may ngi pur kumo haɗa haɗa. Kum magikiy ɓa yi mumul, yo ya majijih vur kum na, cicam zlak kuy kuy angi kum mujom ati Buymisemuŋ so, yeme ɗuwoy.

²Ewodi ati Sintike, i ra ga taŋ ambuh ambuh, ɓa a cifam ti ngiɓi ˀay kuy kuy ar taŋ mujom Buymisemuŋ.

³Yo ka kwana, cil ɗu miteŋteŋ, i cufuɗuw ɓa ki jina taŋ, asi a cikam vu le ati ya ngi tila mi ti Ɓimezle. Taŋ ati Klemaŋ waɗ cil ɗu mekelemey, ndra migam slra bumoˀ ati taŋ gar na, a tohoko slimiɗ taŋhaya le angi ɗerewol ngi siifa.

⁴Mumulom angi pas gar, asi kum mujom ati Bumbulvuŋ. I ra mahiri naŋ ava ma, kum mumulom.

⁵Anja mizli gar, a sinaka gimezle kumo. Bumbulvuŋ a sa mo gweˀe.

⁶Anja didak a muɗukum ti gwat ko neˀ ta. Amma ar gwat gar na, diram dibiɗ, cufuɗaka Buymisemuŋ vur gwat kum muroko ti may naŋ, tumbulokoŋ ti gaŋ sise.

⁷Yo zuy ngi Buymisemuŋ mafuna lesl ngi mbur gar na, a sa jigina mevel kum ati lesl kum mujom ati Yesu Kristu.

⁸Sukum ɗuwoy, gwat mindir ngi gi anihĩ: Kam slimiɗ ar gwat mikaslsla, gwat mupuɗaw, gwat mijeŋŋe, manja dili, mindila le ngi wuɗu, mindila le ngi ɗuvaŋ hirnga, gidaŋ ngi gimezleŋ, mindila le ngi ngila wuy. Gwat tayna gar na, gam taŋ slra.

⁹Gwat kum mudubunaka avu ya ati kum mulumaka avu ya, ɓi kum micinaka avu ya, waɗ gwat kum mupuraka avu ya gar na, gam taŋ slra. Dar Buymisemuŋ mavul zuyo, a sa ndir avu kumo.

¹⁰I mumul le haɗi asi ya mujom ati Bumbulvuŋ na. Vur ki lumam gidaŋ le ngi ki slimiɗ angi ya a muŋ ma. Haˀaw, kum ada kam slimiɗ zleˀe angi ya, amma ki lumam ta na i haŋ ti lum.

¹¹Ya maɓi hana, anta asi ya muro ti may ngi gwat ta. Asi mike na, i sirka kiɗa may ɗu le ti gwat ya misi ada ti naŋ.

¹²Cifi manja gwat ati cifi ti gwat haɗi gar na, yi si na le. Ko ti vuna, yo ko ti wer wanaka gar na, cifi ti gwat ngi zum haɗi, malla cifi ti may kwana, i dubuna le. Cifi ti gwat haɗi, malla manja gwat kwana, i dubuna le.

¹³Ko mike gar na, i ɓusa gu, asi Kristu matiri ti ya gidaŋ gidaŋ.

¹⁴Amma kum mijinikiy angi bonoy ɗu na, ki gikiy di i mezle ngbaŋ.

¹⁵Kum Filipihey, kumo, ki sinaka le kuy kuy, ti ya mupula hirwuy Maseduwan, ndra mizlaka tila mi ti Ɓimezle na, ko Cikil ngi misikristu mijiniy ti gwat ngi pula gir ɗu waɗ ti dala ngi hiɗika gwata anta, sey kum pal kum.

¹⁶Ti gwat mikiciy a Tesalonik na, ki slinikiy ti gwat ya muro ti may naŋ le is mbeˀ mbeˀe.

¹⁷Y'anta i pur di i jiviɗ ngi luuma gwat ngatara ta, amma yi wuɗ, anja ɓesde a gi ar gwat ngi gi kumo.

¹⁸Na zle, gwat ya muwuɗ gar na, ada avu ya, hã a funa le ma. Y'anta ti may ngi gwat mekelem mata. Epafrodit a siy ti gwat kum muvulikiy di na le. Naŋ kaɓa urdi mazĩˀĩ ndum, i mikuli Buymisemuŋ mitiɓa le, maciraŋ hiri.

¹⁹Buymisemuŋ ɗu a sa vulukum gwat kum misi ti may naŋ gar, weˀe avu zlili naŋ mihaɗi tisi Yesu Kristu na.

²⁰Anja dudok a ndir da Cine ndra Buymisemuŋ hã ngi set ngi surmut! Amin.

²¹Jaka haŋ da mizli ngi Buymisemuŋhoy tisi Yesu Kristu na, purla purla gar. Sukum ɗuwoy misi ati ya aka, a jukum haŋ le ya.

²²Mitiɓihey gar a jukum haŋ le. Wãˀ naŋ na, mizli migi slra ngi hay buy mimadiɗa.

²³Anja Buy Yesu Kristu a gukum mezle gar kumo.