Read South Giziga COL 3 Bible Online

COL 3 - South Giziga bible

COL 3

¹Ki slikiɗam le jom ati Kristu tir muco, da kine na, sipam gwat ngi muŋhoy, ar li Kristu mujoˀ tir vay hazum ngi Buymisemuŋ.

²Kam slimiɗ ar gwat ngi muŋhoy, mbak gwat ngi ruwuyoyo le.

³Asi mike na, ki micam le, siifa kumo, naŋ da ɗum ati Kristu ar kum mujom ati Buymisemuŋ.

⁴Kristu, siifa kumo, ti naŋ masa bugo vu na, dar kumo kwana, kisa bugoko vu bumoˀ ti dudok haɗi.

⁵Gwat ngi ruwuyoy misi a hur kum gar na, kiɗaka taŋ vagay vagay avra so, kaɓa ani: gi sulome, dili, may gwat, waɗ may zlili. Asi may zlili na, i huruk huruk a mbuŋ kulihey.

⁶Puraka, i gwat tayna masoko ti himaˀ ngi Buymisemuŋ nga hirnga mizli macinakaŋ mi ta na.

⁷Asi ti mungra mufunukum gidaŋ zleˀe na, gwat ngi gi kum i hana.

⁸Amma wurenna, muɗam vu kum ceɗ wãˀ tir gwat tayna gar muduba so, kaɓa ani: ji mevel, zuɓa himaˀ, moˀore, zivu, ɓi muduzloˀ duzloˀ lambaˀa.

⁹Ki gam slir ar wala kumo mata. Asi mike na, kpak ngi vu kum magala ati gwat ngi gi naŋhay gar na, ki cukoko taŋ le avra.

¹⁰Yo ki kam kpak ngi vu nawaya le. I kpak ngi vu ngi mbur nawaya, maɗiyi nawaya nawaya ndrehhe, ɓa a tiri kaɓa Buymisemuŋ migi naŋ vuna, ɓa a ndila si na Buymisemuŋ kuy kuy wãˀ.

¹¹Kahana so na, mbur Yude malla Yude ta, asinta, mbur mici le a mizaw malla mici ta, asinta. Mbur mulak malla ko mbur manja wuna slimiɗ, asinta, mbur beke malla diimu, asinta. Amma Kristu, naŋ i gwat gar, naŋ da ar gwat gar.

¹²Ani, kum i mizli Buymisemuŋ wuwunukum le, kum pal, ara wuɗukum. Vurˀe, sey ki puram ˀircece haɗa, ki gam mezle, ki hinam hirnga, ki ndiram teˀteˀe, ki ɓusam ɓi.

¹³Ɓusam vu ar wala kumo. Da mbur mekelem a wuzla kumo, naŋ da ti ɓi ngi widi ti sukum naŋ na, anja zuwen a pulaka ɓi naŋ ar wala taŋ. Sey ki pulam mungra ar wala kumo, kaɓa Bumbulvuŋ mupulukum di na ya.

¹⁴A hirnga gwat hanayna gar na, coko wuɗavu anga. Asi wuɗavu i gwat majumukum purla arleˀe kuy kuy wãˀ.

¹⁵Anja zuy ngi Kristu a zum buy a mevel kumo. Buymisemuŋ muzulukum gar ɓa ki tiram dumvu purla na, ng'ar zuy nah vuna. Gaka sise da Buymisemuŋ.

¹⁶Anja Mingiɓi ngi Kristu a cifi ti gidaŋ haɗa a mevel kumo. Dubunam gwat, yo ɓam ɗaˀ ɗaˀ le ar wala kumo ti sinmijileŋ miwãˀ naŋ. Zlam dimis ngi ga sise da Buymisemuŋ ti mevel purla, hunumakaŋ ti dimis ngi Bumbulvuŋ, ti dimis maɓi ɓi ngi ˀUf Mipal mavula.

¹⁷Gwat zliv kum magaka gu ati ɓi kum maɓaka gu gar na, gaka ti slimiɗ ngi Buy ndra Yesu, ti ga sise da Cine ndra Buymisemuŋ ti seˀeŋ.

¹⁸Kum ngwasay, hinam hirnga a mbuŋ zil kumoy, kaɓa kum maga kanah a mbuŋ Bumbulvuŋ.

¹⁹Kum ziley, wuɗam ngwas kumoyo, anja ki gam kum i malambaˀhay avu taŋ ta.

²⁰Kum ziri, cinaka mi da miyi kumoy ar gwat gar, gwat macira hiri da Bumbulvuŋ, i nah so.

²¹Kum miyi ngi ziri, ki gam fõh fõh ng'ar ziri kumoyo ta, vur taŋ masa hĩhĩyam.

²²Kum bekehey, cinam mi ar gwat gar da buy kumoy misi a ruwuy aka. Gaka taŋ slra, anta asi ara juɗukum ta, anta kaɓa ki gam di i gwat ngi cira hiri da mizli ta. Amma gaka ti mevel mezle ngi mizli muzluwun ti Buymisemuŋhoy.

²³Ko da slra kum i wanaka gar na, gaka ti mevel mezle, kaɓa ki gaka i da Bumbulvuŋ, anta da mizli ta.

²⁴Sinaka sin le, Bumbulvuŋ a sa wurkukum minjeˀe. Buy kumo, i Kristu, kum i migi slra naŋhay.

²⁵Mbur magi gwat mijeŋ ta na, a sa wurkaŋ ti gwat mijeŋ ta ya, asi Buymisemuŋ anta pur mbur ti pur ta.