Read South Giziga COL 4 Bible Online

COL 4 - South Giziga bible

COL 4

¹Kum buy ngi bekehey, gam ti beke kumoyo ti jiviɗ mijeŋŋe, mikaslsla. Sinaka sin le, kumo kwana, Buy kum ada muŋ ya.

²Cicam zlak ar diradibiɗe. Anja ki giram ngi ga sise ti diradibiɗ da Buymisemuŋ ta.

³Da kum mira diram dibiɗ na, diram vur ndra ya, anja Buymisemuŋ a wuna miviŋ baŋ vur mingiɓi naŋ, ndra matilam di mi na, ɓa i til mi ti ɓi mufuna wuluk ngi mbur ngi Kristu, mijikiy ng'ar dangay aseˀe na.

⁴Diram dibiɗ, anja ɓa i til di mi ti jiviɗ naŋ, kaɓa ya mujuwa a mevel ɗu na.

⁵Ndiram ti lesl kuy kuy ar cifi kum a wuzla misikristuhoy ta na. Da kum mulumam haŋ le gar na, bigaka kum i mizli mezlehey.

⁶Anja mingiɓi kum i mezle ndrehhe, i ɓi mundum. Sinaka mbiɗi mi da mburo kaslsla ti jiviɗ naŋ.

⁷Tikik, sukum ɗu ya mawuɗaŋ haɗa, mbur miteŋteŋ, cil ɗu ndra magam slra ngi Bumbulvuŋ cuwa na, ɓi ngi joˀ ɗu gar na, kisa cinam ava.

⁸Ya maslinukum di na, hĩˀĩ ɓa ki cinam labara ngi joˀ ndra, yo ɓa a vulukum gidaŋ.

⁹A sa ram cuwa ati Onezim, sukum ɗu miteŋteŋ, ya mawuɗaŋ haɗi na. I mbur ngi wuzla kum, a sa ɓukum ɓi ngi gwat macuh aka gar.

¹⁰Aristarke, ndra mucuwa angi dangay aka, a jukum haŋ le, waɗ Marke, sukum ngi Barnabas ngi jamba. Yi ɓukum ɓi nah le zleˀe si: Da naŋ mindil le a hay kumo na, gakaŋ mulaka kuy kuy.

¹¹Yesu mazilaka Zustus na, a jukum haŋ le ya. A wuzla Yudeheye, sey i mizli mimakir tayna tewle, migam slra bumoˀ ati ya vur Zumabuy ngi Buymisemuŋ. Taŋ a tislikiy mevel le haɗi teˀe.

¹²Epafras, mbur ngi hay kum na, a jukum haŋ le ya. Naŋ, mbur migi slra ngi Yesu Kristu nah na, ko anta pula cika vu ti diradibiɗ vur kumo mbak le ta, ɓa ki ndiram zlak gidaŋ gidaŋ, manja hereweɗ, mizli mujuwam vu le ngi gi gwat Buymisemuŋ muwuɗ le gar.

¹³Ya maga sedewo naŋ na, asi ara gir haɗi vur kumo, vur Lawdisehey, waɗ Hiyerapolisey.

¹⁴Ngama ndra, doftor Luk, waɗ Demas, a jukum haŋ le.

¹⁵Jaka haŋ da sukum ndra ngi Lawdisehey, yo da Nimfa, waɗ da Cikil ngi misikristuhoy macikilam a hay naŋ na.

¹⁶Da kum misa slufaka ɗerewol ɗu hana le na, slinaka da Cikil ngi misikristu ngi Lawdiseheye, ɓa taŋ kwana, a slufaka ya. Yo da Lawdisehey misa slinukum ti nga taŋ le ya kwana, kisa slufaka ya.

¹⁷Ɓaka Arkipe: slra taŋ muvulakaŋ di ngi gi vur Bumbulvuŋ na, sey a ji lesl vurˀe, ɓa a kiɗa mi naŋ kuy kuy.

¹⁸Ji haŋ, ya mutuhukum di ti haŋ ɗu, anihĩ: Ya Polo, i ro angi dangay, anja ki puykam hirnga ta. Anja Buymisemuŋ a gukum mezle.