Read South Giziga 1TH 2 Bible Online

1TH 2 - South Giziga bible

1TH 2

¹Sukum ndra misikristuhoy, ndra miram a hay kum na, i ngatara ta, kum vuna, ki sinaka le kuy kuy.

²Dumbuŋ ti ndra mindilam a hay kum t'aruŋ na, ki sinaka le, mizli a jiginam mi le avu ndra hã a zam ndra a Filipe. Amma ko ti taŋ mitikam ndra kaŋ kaŋ na tekeɗe kwana, Buymisemuŋ ndra a vula ndra gidaŋ le, ɓa i tulukum mi ti Ɓi Mezle naŋ na gbaˀa.

³Mbiɗeˀvra: ɓi ndra matulukum di mi na, zluɓ anta ar ɗuva virzi naŋ ta, wuluk malambaˀ anta ara ta, ko ɓi ngi gi gilaw, anta ara ta.

⁴Amma Buymisemuŋ a pura mevel ndra le dumbuŋ ɗagay, a hĩyã le ɓa a pula Ɓimezle naŋ asi haŋ ndra. Naŋ kine, i ra tilam di mi, ndr'anta puram di i jiviɗ ngi cira hiri da mizli ta, amma da Buymisemuŋ maɗumburo ɓi ngir mevel ndra.

⁵Ki sinaka le, i ɓam ɓi mideɗek ɓa ngi ciru kum hiri ɗaˀ ta wãˀ, ɓi mislew slew ngi cufuɗa gwat, anta vu ndra ta ndiɗaˀ wãˀ. Sedewo ndra i Buymisemuŋ.

⁶Yo i puram jiviɗ ɓa i lumam dudok avu mizli ɗaˀ ta ndiɗaˀ, ko avu kum, malla ko avu mizli mekelemey.

⁷Anja zliv i gam avu kumo gu kaɓa mizli madiɗahay zleˀe ngbaŋ, asi ndr'i mislin ngi Kristuhoy. Amma ndra luɓ luɓ avu kumo jaka, kaɓa mumuŋ ngi ziri maki slimiɗ ar ziri naŋhay.

⁸I wuɗukum le, hã i juwam vu ɓa ngi vulukum Ɓimezle ngi Buymisemuŋ tew ta, amma ɓa ngi vula hirnga ndra asi kumo. I wuɗukum le haɗi teˀe.

⁹Sukum ndrahay, slra ndra migiram di kupuyah kupuyah wãˀ na, anta puykukum hirnga ta wãˀ. Ndra mutulukum mi ti ɓi Ɓimezle ngi Buymisemuŋ na, i gam slra duvuɗ ti papas gar, ɓa ko i vulam gir da mbur pal a wuzla kumo ta.

¹⁰Ti ndra misi a wuzla kumo na, gwat ngi gi ndra gar a zlir le avu Buymisemuŋ, naŋ jeŋŋe, ko mbur a mbiɗa ndra hirnga aseˀe gu ta. Sedewo ndra i kum mitiɓihey, waɗ Buymisemuŋ ma.

¹¹Ki sinaka le, i gam ti kum purla purla gar kaɓa cine ngi ziri magi ti ziri naŋhay.

¹²I vulukum gidaŋ le, i tuslukum mevel le, i tumbulukum le haɗi haɗi, ɓa gwat ngi gi kum a ndir kaslsla kaɓa Buymisemuŋ mawuɗo. Mazilukum ɓa ki lumam dudok, waɗ ɓa ki cam ar zumabuy naŋ na, i naŋ.

¹³I ra gaka sise da Buymisemuŋ hõyyõ ma, asi ti ndra mutulukum mi ti ɓi Ɓimezle naŋ na, ki tiɓaka kaɓa i mingiɓi ngi mbur titra ta, amma kaɓa i mingiɓi ngi Buymisemuŋ. Gisiŋ i mingiɓi ngi Buymisemuŋ, ara gi slra a hur kum mitiɓiheye.

¹⁴Naŋ kine, sukum ɗuwoy, gwat migi avu Cikil ngi misikristuhoy a Yude, mbiɗeˀvra: mizli mujumom ati Yesu Kristu na, gwat misi purla nah, a ndilo le avu kum aya. Ki ɓusakaa bonoyo le kaɓa taŋ na ya. Ki sam bonoy le a haŋ sukwi kumoy tehhe a muŋ, kaɓa taŋ misam bonoy a haŋ Yudehey na ya.

¹⁵Yude tayna, i taŋ mikiɗaka Buy Yesu vagay waɗ mijiviɗey zleˀe. A sipam ndra le nder nder. T'anta ciraka hiri da Buymisemuŋ ta wãˀ si, i mesene ngi mizli gar.

¹⁶Ɓimezle ngi laha mizli Yudehey ta na, a tikam ndra ɓa i tilam di mi ta. Naŋ kine, a gam mungra le haɗi hã a mba Buymisemuŋ le. Vurˀe, wurenna ara zuɓ himaˀ fõh fõh nga hirnga taŋ.

¹⁷Sukum ndrahay, zle ti ndra muwunkam ati kumo ngi hin neˀ na, i dumvu ndra muwunkama si ɓula, amma a mevel ndra na, i wunkam ta. Vurˀe, i tumom vu le tum, ɓa i ra purukum gbaˀa, asi i roko ti may naŋ ti yam ar gojogoɗo.

¹⁸Ndra muwuɗam mi ngra hay kumo na, vurˀe. Ya Pol vuna, i wuɗ ru le ngra pur kumo ˀis mbeˀ mbeˀe, amma Satan a tika ndra le.

¹⁹Ndra manjaham hiri, yo ndra mamumulom gar na, asi kum vuna ta kwa? Buy ndra Yesu, ti naŋ masa mawa na, i sa jijaham asi kum kaɓa bugawla mulum migir naŋ le.

²⁰Haˀaw, i sa lumam dudok, yo i sa mumulom asi kumo.