Read South Giziga 1TH 3 Bible Online

1TH 3 - South Giziga bible

1TH 3

¹Amma ɓa i cifam teˀ manja cine ɓi kumo na, kay, a ɓus mata. Vurˀe, i sa wulkam, zuwen i cifam pal ndra a Atene ɗagay.

²Joˀ i slinaka sukum ndra Timote ng'avu kumo, ɓa a vulukum gidaŋ, a tuslukum mevel, ɓa ki tiɓakam. Timote i mbur magam slra jom ati Buymisemuŋ ngi tila mi ti Ɓimezle ngi Yesu Kristu.

³Anja da ko ara sipam ndra nder nder kwana, a muɗ didak da mbur pal le ta. Ki sinaka le, Buymisemuŋ mizila ndra na vurˀe.

⁴Ti ndra misi a wuzla kum na, i ɓukum di le ɗaˀ ɗaˀ le: i sa sam bonoy kini takwa? Ki sinaka le, ɓi naŋ a ndilo le gisiŋ.

⁵Manja cine ɓi kumo na, yi ɓusa gu mata, ya mislina Timote ɓa ra cino ndra ɓi kumo na vurˀeŋ. Ki roko ti tiɓi kum aruŋ ta kwa? I ra zluwun, yi wa na, mitikinavu a tikinukum le. Naɓa slra ndra migiram di kupuyah wãˀ na, a zizi le ngataraŋ.

⁶Amma Timote a ndilo ndra le wureˀeˀ ani ti hay kumo. A ɓa ndra ɓi mezle le: ki roko ti tiɓi kumo, yo ki roko wuɗam vu ar wala kumo. A ɓi ma na: ki roko wulkam angi ndra kuy kuy aruŋ, yo ki roko ti may ngi pura hiri ndra, kaɓa ndra muroko ti may ngi pura hiri kum na ya.

⁷Sukum ndrahay, ki roko tiɓaka Buy Yesu. Vurˀe, ko ti ndra malikam ati ndra masam bonoy gar na kwana, ɓi kum a vula ndra gidaŋ le muduba.

⁸Wurenna, ki cicam le zlak gidaŋ gidaŋ ar kum mujom ati Buy Yesu, vurˀe, musuɗuk ngi vu ndra a mo le a muŋ.

⁹I ra gaka sise da Buymisemuŋ asi mumul mihaɗi kum migam ndra di a mbuŋ naŋ na. Amma ko da i gakaŋ sise haɗi mbri tekeɗe kwana, a ndila ta.

¹⁰I ra tumbulokoŋ, duvuɗ ati papas gar, ɓa a pula ndra jiviɗ, i ra puram vu ava ma. I wuɗam i jinukum ɓa ki nahaka mi ngi tiɓi kumo.

¹¹Haˀaw, anja Cine ndra Buymisemuŋ vuna ti hirnga naŋ ati Buy ndra Yesu a pulam ndra jiviɗ ɓa i ra purukumo.

¹²Kum mawuɗavu ar wala kum, yo kum mawuɗam mizli gar na, anja Bumbulvuŋ a ska ng'amkbuŋ nga mbuŋ. Anja ki wuɗam vu kaɓa ndra muwuɗukum na ya.

¹³Anja a vulukum gidaŋ a mevele, ɓa ki ndiram pal, manja ɓ ngi mbuɗukum hirnga aseˀe a mbuŋ Cine ndra Buymisemuŋ, hã tapas Buy ndra Yesu masa mawa ati mizli naŋhay [1] gar.Amin.