Read South Giziga 1TH 4 Bible Online

1TH 4 - South Giziga bible

1TH 4

¹Sukum ndrahay, gwat mindir ngi ɓukum di na anihĩ: gwat ngi gi macira hiri da Bumbulvuŋ na, ki dubunaka le avu ndra zleˀe, ki ra gaka kanah vuna si. Amma wurenna so na, i ra tumbulukum, ambuh ambuh kum ti slimiɗ ngi Buy Yesu, gaka nga mbuŋ nga mbuŋ ava ma.

²Ɓi ngi Buy Yesu muvula ndra di, ndra mudubunukum di na, ki sinaka le.

³Gwat Bumbulvuŋ mawuɗo anihĩ: Ndiram pal, kiraham kileŋ avu ɓi ngi madama.

⁴Anja mbur zil gar a wuzla kumo, a si na ɗuva ngwas naŋ ti ɗuva hirnga mizlir le, macira hiri da Buymisemuŋ.

⁵Anja a pula vu naŋ da may gwat kaɓa mizli duniyahay misinaka Buymisemuŋ ta na ta.

⁶Anja mbur a ga gilaw da cala ar ɓi hana ta, ko ar ɓi mike gar. Asi mike na, Bumbulvuŋ a sa kuta mizli migi gwat misi ka tayna ti ga taŋ bonoy. I ɓukum di le, yo i kukum ɓi nah le kuy kuy a slimiɗe si.

⁷Asi Buymisemuŋ muzulo ndra na, ɓa i gam gwat ngi dili ta, amma ɓa i ndiram pal.

⁸Asi mike na, da mbur a hiziga ɓi misenna le avra na, a hizig di i ɓi ngi mbur ta, amma a hizig di i Buymisemuŋ mavulukum ˀUf naŋ Mipal na.

⁹Ɓi ngi wuɗavu ati sukum kum mitiɓihey na, kum anta ti may ɓa i tuhukum ɓi a hirnga naŋ mata. Asi Buymisemuŋ ti hirnga naŋ a dubunukum ɓi ngi wuɗavu ar wala kumo le si.

¹⁰Na zle, ko sukum kumoy misi angi hirwuy Maseduwan keɗeɗe kwana, ki ra wuɗaka taŋ vuna si. Amma ambuh ambuh kum, sukum ɗu misikristuhoy, anja ki ram di nga mbuŋ nga mbuŋ ava ma.

¹¹Tumom vu ɓa ki cifam zuy zuy ati mizli, ki cam lambaˀ lambaˀ ar ɓi ngi mizli ta. Gam slra ti haŋ kumo, ɓa ngi zum ti hirnga kumo, kaɓa ndra muɓukum ɓi naŋ zleˀe,

¹²ɓa mizli ngi vrahay a hĩyãka gwat ngi gi kumo, ɓa kisa vulam gir da mizli mekelemey ta.

¹³Sukum ndrahay, i wuɗam ɓa ki slaka wala ngi ɓi ngi mizli mumucahaya kuy kuy. Anja ki ndurɓom hiri ka mizli mekelemey manjaham hiri ta na ta.

¹⁴I tiɓaka le, Yesu a muc le, a slikiɗ le a muŋ. Naŋ kanah ya, mizli mumucahay mitiɓaka Yesu le na, Buymisemuŋ a sa hila taŋ ti seˀeŋ.

¹⁵Ɓi mubo ti balam Bumbulvuŋ, ndra madubunukum di na anihĩ: Tapas Yesu masa mawa na, ndra misi ti siifahay aruŋ na, ndr'anta sa ram nga ji di hirnga dumbuŋ ar mizli mumucahaya ta.

¹⁶Asi tapas Bumbulvuŋ vuna masa til mi, madiɗa ngi modro ngi Bumbulvuŋhoy masa ɓi ti ˀay paɗ a muŋ, ti taŋ masa faka tulum ngi Buymisemuŋ na, Buy Yesu a sa po sar paɗ ti muŋ. Mizli mumicam ar taŋ mujom ati Kristu na, a sa slikiɗam dumbuŋ.

¹⁷A dirba nah, ndra misi ti siifahay tapasa gar na, a sa hilam ndra jom ati taŋ ng'ar gazlavay, nga ji hirnga ti Buy Yesu ar birngiŋ ngi muŋ. Naŋ kanah, i sa cifam ndrehhe ati Bumbulvuŋ.

¹⁸Vulam gidaŋ ar wala kumo ti ɓi misenna so.