Read South Giziga 1TH 5 Bible Online

1TH 5 - South Giziga bible

1TH 5

¹Sukum ndrahay, ɓi ngi pas malla ngi hin ngi gwat tayna masa gam na, kum anta ti may ɓa a i tuhukum ɓi nah mata.

²Kum vuna, ki sinaka hin ngi Bumbulvuŋ le kuy kuy: a sa ndilo gurjik kaɓa muhul maso ti duvuɗu.

³Tapas mizli masa ɓam: «Ndra zuy zuy, ko zluwun anta» na, gir madiɗa a sa diɗ ar taŋ gurjik, ka kwacay maja ngwas ngi yi, a sa ngizlam kuɗup.

⁴Amma kumo so na, sukum ndrahay, kum anta angi luvuŋ, ɓa hin misenna a sa lumukum gurjik kaɓa muhul ta.

⁵Asi mike na, kum cek, kum i mizli ngir li minjahha, yo mizli ngi papasay. Ndr'i mizli ngi duvuɗoy ta, ngir luvuŋhoy ta.

⁶Vurˀe, anja i hinjam kaɓa mizli mekelemey na ta so, amma cufukum joˀ joˀ titiri, i wam ti mbaazla ta.

⁷Mizli mihinjeheye, a hinjam ti duvuɗu, miwi ti mbaazlahaya, a wam ti duvuɗu.

⁸Amma ndra, ndr'i mizli ngi papasay, vurˀe anja i wam ti mbaazla ta. Kukum tiɓi ati wuɗavu avu vu kaɓa libiti, yo njaha hiri ndra masa lahama tiɗeˀ a hirnga kaɓa jiiku ngi gandaf ngi ɓiri.

⁹Asi Buymisemuŋ a wina ndra ɓa a zuɓ himaˀ angi ndra ta, amma ɓa a laha ndra tisi Buy ndra Yesu Kristu.

¹⁰Ko da i micam le, malla ko da ndr'ada ti siifa aruŋ kwana, Yesu, naŋ a muc ar deɗe ndra, ɓa i sa ndiram ti siifa jom ati naŋ.

¹¹Vurˀe, kutam vu ar wala kumo kuy kuy, yo jinam vu ar wala kumo, kaɓa kum magaka zleˀe na si.

¹²Sukum ndrahay, i ra tumbulukum ɓa ki ɗuvaka hirnga da mizli magam slra gǝr gǝr vur kum na, i Bumbulvuŋ miɓa taŋ, ɓa a bugukum jiviɗ, yo ɓa a vulukum kuti.

¹³Ɗuvaka taŋ hirnga kuy kuy, wuɗam taŋ haɗa ma, asi slra taŋ magaka a wuzla kumo. Cifam zuy zuy ar wala kumo.

¹⁴Sukum ndrahay, ambuh ambuh kum, bucaka masafayahaya, vulaka gidaŋ da muzluwunoyo, jinaka hĩhĩyahaya, ɓusaka ɓi ngi mizli gar.

¹⁵Jam lesle, anja mbur a mi ti malambaˀ da mbur migaŋ malambaˀ le ya ta, amma angi pas gar na, hurdumom ɓa ki gam gwat mezle a wuzla kumo, waɗ avu mizli gar.

¹⁶Mumulom ndrehhe,

¹⁷diram dibiɗ ndrehhe,

¹⁸gaka sise da Buymisemuŋ ko asi mike gar. Kum mizli mujom ati Yesu Kristu na, gwat Buymisemuŋ mawuɗ avu kumo, i hana.

¹⁹Ki mucaka gidaŋ ngi ˀUf Mipala ta.

²⁰Ki zirɗaka mingiɓi ngi mijiviɗeye ta.

²¹Amma ɓi gar na, ɗumburoko ɗagay, ɓa ɓi mezle ngi raˀa, ki jaka a hirnga.

²²Kiraham kileŋ tivi ɓi malambaˀ ko wanaka gar.

²³Anja Buymisemuŋ mavul zuyo, naŋ ti hirnga naŋ, a ga ɓa ki ndiram kum inga naŋhay wãˀ. Anja a jigina lesl kum, membezleŋ ngi vu kum ati dumvu kum gar kuy kuy, ɓa hã tapas Buy ndra Yesu Kristu masa mawa na, ɓi ngi mbiɗa ndra hirnga aseˀe, anta.

²⁴Mbur muzulukum na, naŋ teŋteŋ, asi ɓi naŋ miɓa le gar na, a sa ga gbaˀa.

²⁵Sukum ndrahay, diram dibiɗ vur ndra ya.

²⁶Jaka haŋ da sukum ndrahay gar ti ji vu mukuɓuy kuɓuy ngi mitiɓihey.

²⁷Ambuh ambuh kum ti slimiɗ ngi Bumbulvuŋ, anja ki slufaka ɗerewol hana a mbuŋ sukum ndrahay gar.

²⁸Anja Buy ndra Yesu Kristu a gukum mezle.