Read South Giziga JOS 1 Bible Online

JOS 1 - South Giziga bible

JOS 1

¹Moyis, gawla ngi Bumbulvuŋ a muc le. A dirba nah na, Zozuwe, mangal ngi Nun, gawla ngi Moyise, Bumbulvuŋ a ɓaŋ na:

²«Ani gawla ɗu Moyis a muc le so. Wurenna, ka Zozuwe, slikiɗi, tuwuɗaka dubazaw Zurdeŋ ati mizli hanayna gar nga hirwuy ya mavula da Israyeleye.

³Li, kum muɗuvaka sar le taˀ ara gar na, yi vulukm di le, kaɓa ya miɓa ɓi nah ɗaˀ le zleˀe da Moyis tuwa.

⁴Maakway ngi ruwuy kumo, a zlo zle a wuzlaɓuh mikirɗak kirɗak, hã sesẽŋ a muwã Libaŋ, hã a ndila mizaw madiɗa ngi Efrat, hirwuy ngi Hitihey gar waɗ sesẽŋ a Mubuliy Mediterane, kini tisi pas ngi pastaˀ naŋ.

⁵Angi hin ngi siifa ɗik gar na, ko mbur macici gu a mbuŋ ɗik anta wãˀ. I sa ndir ati kakaɓa ya mindir zleˀe ati Moyis na ya. Ko y'anta sa puluw fuk ta, yo y'anta sa hiziguw avra ta.

⁶Mbur mbar, tum vu tam, asi hirwuy ya miɓa ɓi naŋ ti hudum da dideˀ taŋhay, yi sa vula taŋ di tuwa na, masa vula da mizli hanayna i kaha.

⁷Naŋ kanah, sey ki mbur mbar, tum vu tam. Ɓimujuwa, gawla ɗu Moyis muɓuw di ɗaˀ le gar na, ki slimiɗ ar taŋ cineˀe, ko ki ngizli ava ta ndiɗaˀ. Naɓa ko da ka amaka gar na, gwat ka mawuɗ gi naŋ gara, ki ga gu.

⁸Ɗerewol ngi ɓimujuwa hana, kisa ndir di teˀ a mevel ɗiki, ngek avu mi, duvuɗ ati papas gar, ɓa gwat gar na, kisa gakasl kasl kaɓa mutohoko ɓi naŋ ara na. Naɓa gwat ka mawuɗ gi naŋ gar na, kisa ga kuy kuy, yo kisa ga gu ma kini.

⁹Na yi ɓuw le ɗaˀ le: Mbur mbar, tum vu tam kini. Ko ki jijik ta, yo ki hĩhĩy ta so tuwaŋ. Asi mike na, li ka masa ru anga anga gar na, Bumbulvuŋ Buymisemuŋ ɗike, naŋ da ati ka.»

¹⁰Akẽh na, Zozuwe a ɓa buyɓi ngi wuzla mizli ɗaˀ:

¹¹«A ram, bulam ar walahay guɗuko, ɓaka ɓi ani ɗaˀ le da mizli: ‹Wam vu ti gwat ngi zumoy, asi angi hin makir akaka na, kisa tuwuɗaka mizaw Zurdeŋ hana. Hirwuy Bumbulvuŋ, Buymisemuŋ kum, mavulukum di na, tiɓaka da kum.›»

¹²A dirba nah na, mizli Rubeney ati Gatay waɗ reta ngi sukwi ngi Manase na, Zozuwe a ɓa taŋ:

¹³«Moyis, gawla ngi Bumbulvuŋ, ɓi naŋ muɓukum di ɗaˀ le tuwa na, naŋ da keŋŋe a hirnga kum aya? Moyis a ɓukum na: Bumbulvuŋ Buymisemuŋ kum, a vulukum musuka vu le, yo a vulukum hirwuy misenna le.

¹⁴Ngwas kumoy ati ziri kumoy waɗ ginew kumoyo, a sa ndiram angi hirwuy, Moyis muvulukum di a dubazaw Zurdeŋ na ɓula. Amma kum mizli miwirwir ngi gi vurum gar na, kisa ram cinjah cinjah a mbuŋ sukum kumoyo, ɓa ki jinaka taŋ,

¹⁵sey da Bumbulvuŋ muvula musuka vu le da sukum kumoyo, kaɓa naŋ muvulukum di da kum na ya, yo sey da taŋ kwana, a tiɓaka hirwuy Bumbulvuŋ Buymisemuŋ kum, mavula taŋ di na le ya. A dirba nah, kumo, kisa mam ng'ar hirwuy ngi kumo, kisa tiɓaka hirwuy, Moyis gawla ngi Bumbulvuŋ muvulukum di a dubazaw Zurdeŋ, tisi pas ngi miprik na.»

¹⁶Taŋ a mbiɗaka da Zozuwe na: «Gwat ka miɓa ndra di ɗaˀ le ngi gi gar na, i sa gakaŋ, yo li ka masa slina ndra ng'ara gar na, i sa rama si.

¹⁷I sa cunukuw mi ar gwat gar kaɓa ndra micinaka mi da Moyis na ya. Haˀaw, Bumbulvuŋ Buymisemuŋ ɗike, naŋ da ati ka kaɓa naŋ misi ati Moyis zleˀe na ya.

¹⁸Mbur masa slikiɗ ɓi ar ɓi ka miɓa ɗaˀ le, yo masa cinuw mi ta ar ɓi ka muɗuva ndra di le gar na, a sa kiɗaka buy naŋ vagay. Haˀaw, naŋ kine, sey ki mbur mbar, yo tum vu tam.»