Read South Giziga JOS 10 Bible Online

JOS 10 - South Giziga bible

JOS 10

¹Akẽh na, Adoni-Sedek, buy madiɗa ngi Zeruzalem a cine na, Zozuwe a zuma hirwuy Aya le. A ngizla walahaya le cek wãˀ, a gi ti Aya le ati buy naŋ madiɗa kaɓa naŋ migi ti walahay Zeriko ati buy naŋ na ya. Yo ma na, mizli Gabaˀoŋhoy ati Israyeley, a slam ˀay kiri le ar wala taŋ, yo a cifam jom arleˀe vuna si.

²Ɓi misenna a ya zluwun le haɗi da mizli, asi Gabaˀoŋ i walahay madiɗa, rak rak ati walahay ngi buy madiɗahay, naŋ madiɗa fineˀ walahay Ay vuna ma, yo mizli ngi digahaya kwana, i soje gambarahay ma kini.

³Adoni-Sedek buy ngi Zeruzalem tuwa, a slin ng'avu Hoham, buy Hebroŋ, Piram, buy Yarmut, Yafiya, buy Lakis, waɗ ng'avi Debir, buy Egloŋ, a ɓa taŋ na:

⁴«Soko ng'avi ya, jinikiy, ɓa i ra kiɗaka walahay Gabaˀoŋ, asi taŋ mislam ˀay kiri ar wala taŋ ati Zozuwe, waɗ Israyeleye.»

⁵Naŋ kine, buy Zeruzalem, buy Hebroŋ, buy Yarmut, buy Lakis waɗ buy Egloŋ, buy Amori muzlum hanayna, a jumom ar wala taŋ. A ram, taŋ ati soje taŋhaya gar, a ndahaka walahay Gabaˀoŋ, joˀ zlaka vurumo.

⁶Mizli Gabaˀoŋhoy a slinam ng'avu Zozuwe ar li pi sar ngi Israyeley a Gilgala, a ɓakaŋ: «Ndra gawla ɗikey, anja ki pula ndra ta, jina ndra na si. Wuso vu kutum kutum ng'avu ndra, kilo widi ndra, ɓa ki laha ndra. Asi buy Amori ngi ruwuy muwãhay na gar, a kusoko le ng'ar ndra.»

⁷Zozuwe ati mizli naŋ ngi vurumoy waɗ soje naŋ gambaraˀahaya gar, a slikiɗam baɗ a Gilgala.

⁸Bumbulvuŋ a ɓa Zozuwe na: «Anja ki zluwun ta, asi yi vuluw taŋ le asi haŋ ɗik si. A wuzla taŋ na, ko mbur pal masa cici zlak gu a mbuŋ ɗike anta.»

⁹Zozuwe ati mizli naŋhaya, zle a Gilgala, a hinam kap ar li ru. A ra ndilaka soje Amorihey tuwa ti gurjik.

¹⁰Bumbulvuŋ a ga zluwun da soje Amoriheye, a kilam mber mber ti Israyeleye. Dar Israyeleye, a kiɗaka taŋ finiˀ finiˀ a Gabaˀoŋ. A sipaka taŋ kini ngir ti miɗingir ngi Bet-Horoŋ, a ram ti kiɗ taŋ sesẽŋ a Azeka, hã sesẽŋ a Makeda.

¹¹A ra kilam a mbuŋ Israyele, a ndilam le ar zugudum ngi Bet-Horoŋ. Akẽh na, Bumbulvuŋ a hizigo yam madiɗahay ng'ar taŋ tik tik kaɓa ɗuguroy, hã ara ndilam di kanah a Azeka, mizli haɗi mumicama. Mizli mumucahay ti yam misi ka ɗugur na, taŋ haɗa fineˀ Israyeley mikiɗaka taŋ ti maslalama.

¹²Tapas Bumbulvuŋ muvula Amorihey asi haŋ ngi Israyeley na, Zozuwe a ɓa Bumbulvuŋ a mbuŋ Israyele gar: «Pasa, cici deŋ a hirnga Gabaˀoŋ! Kiya, ka kwana, ko ki kirih kirah le ti hirnga sozo Ayaloŋ ta!»

¹³Pas tuwa, a cici deŋ, yo kiya kwana, ko a kirih kirah le ta, hã sukwi Israyel a pula cuwal naŋ ar mesene naŋhaya. A tohoko ɓi nah le ar ɗerewol ngi mbur mijeŋŋe ta kwa? Pas a cici deŋ a wuzla muŋ, ko a wus vu ngi diɗe ta, a zik gweˀ ngi hiipas wãˀ.

¹⁴Dumbuŋ zleˀe malla ko a dirba hana gar na, ko hin misi kanah a gi ɗaˀ ta wãˀ si. Tapasa, Bumbulvuŋ a cine mi da mburo, asi i naŋ Bumbulvuŋ ta haŋ naŋ makiɗ vu asi Israyeleye.

¹⁵A dirba nah na, Zozuwe ati Israyeley gar a moko ng'ar li pi sar taŋ a Gilgala a muŋ.

¹⁶Dambalaka buy madiɗahay muzlum tuwa, a kilam le zleˀe, ara ɗumom le ar butum a Makeda.

¹⁷Mizli a soko ɓaka Zozuwe: «Buyoy muzlum tuwa, a lumaka taŋ le, a roko ɗum ar butum a Makeda.»

¹⁸Zozuwe a ɓa mizli na: «Gidigiloko ɗugur madiɗahay ɗasl ɗasl a mi butumo, pam mizli sek a meˀe, ɓa a jiginakaŋ.

¹⁹Na kumo na, ki zumam vu ta, kum sipaka mesene kumoyo, pam sek asi taŋ. Anja ki pulaka taŋ a cam ng'ar walahay taŋhaya mata, asi Bumbulvuŋ, Buymisemuŋ kum, a vulukum taŋ le asi haŋ kumo.»

²⁰Zozuwe ati Israyeleye, a kiɗaka mi ngi ga taŋ bonoy ti kiɗ mukuy ta, hã a ngizla taŋ leɗeɗ wãˀ. Dambalaka mekelemey a laham le ar wala taŋ, a kilam ng'ar walahay taŋhay muguno ti mohol.

²¹Israyeley gar a moko ng'avu Zozuwe ar li pi sar taŋ a Makeda ti zuy. Ko mbur maɓa sukwi Israyele fẽt anta mata.

²²A dirba nah, Zozuwe a ɓa mizli: «Wunaka mi ngi butumo, bikiy ti buy muzlum tayna tuwa.»

²³Mizli a wunaka mi ngi butumo, a boko ti buy muzlum tayna: i buy Zeruzalem, buy Hebroŋ, buy Yarmut, buy Lakis waɗ buy Egloŋ.

²⁴Ti taŋ muboko ti buy muzlumoy tuwa ng'avu Zozuwe na, Zozuwe kwana a zila Israyeleye gar, a ɓa madiɗa ngi soje ngi vurumoy misi aseˀe: «Kirohoko, ɗuvaka sar kurop kurop asi ˀay ngi buy hanayna.» Madiɗa ngi sojehey a kirohoko, dar a ɗuvaka sar kurop kurop asi ˀay ngi buyoyo.

²⁵Joˀ Zozuwe a ɓa madiɗa ngi sojeheye: «Ko ki zluwunam ta, yo ki pulaka vu kumo da hĩhĩy ta. Cicam gidaŋ gidaŋ, yo mburom mbor. Mesene kumoy gar, kum masa kiɗam vu ati taŋ na, Bumbulvuŋ a sa gi ti taŋ ka misenna vuna ya.»

²⁶A dirba nah so na, Zozuwe a kiɗa buy muzlum tayna tuwa vagay vagay. A luwa taŋ law law ar widisey zlum, t'ada law law ar widiseye, hã pastaˀ.

²⁷Ti pas madiɗ na, Zozuwe a pula jiviɗ da mizli, a pam taŋ sar tir widiseye, a hizigaka taŋ ng'ar butum taŋ muɗumom zleˀe ara tuwa. Waɗ a gicaka mi ngi butumo ɗasl ɗasl ti ɗugur madiɗahay. Ɗugur tayna t'ada a mi butumo, hã dana aruŋ.

²⁸Kalla tapas nah vuna si na, Zozuwe a zuma walahay Makeda, a kiɗa buy ati mizli ngi raˀahaya gar, a ngizla taŋ kap ti maslalam, ko a pul mbur loŋ ti siifa ta. A gi ti buy Makeda, kaɓa naŋ migi ti buy Zeriko tuwa ma.

²⁹Zozuwe ati Israyeley gar, a slikiɗam baɗ a Makeda, a ram nga Lipna, dar a zlaka kiɗa vu ati walahay Lipna ma.

³⁰Walahay Lipna ati buy waɗ mizli ngi raˀahay gar na, Bumbulvuŋ a vula taŋ le asi haŋ ngi Israyeleye, a ngizlaka taŋ kap kap ti malslalam. Ko Israyeley a pulam mbur pal ti siifa ta. Zozuwe a gi ti buy Lipna, kaɓa naŋ migi ti buy Zeriko tuwa ma.

³¹Zozuwe ati Israyeley gar, a slikiɗam baɗ ti Lipna, a cohom nga Lakis. A ndahaka hirnga ngi walahay Lakise, a zlaka vurum ati walahaya.

³²Ngi hin mucuw naŋ na, Israyeley a zumaka walahay Lakise le, Bumbulvuŋ a vula taŋ di le asi haŋ taŋ. Israyeley a ngizlaka mizli ngi raˀahaya kap, ko a pulam mbur loŋ le ti siifa ta. A gam ti taŋ kaɓa taŋ migam ti walahay Lipna tuwa ma.

³³Akẽh na, Horam, buy Gezer, a kilo widi ngi walahay Lakise. Amma Zozuwe a kiɗa taŋ ati mizli naŋhaya, ko a pul mbur loŋ ti siifa ta.

³⁴Zozuwe ati Israyeley gar, a cohom baɗ ti Lakise nga Egloŋ. A ndahaka hirnga ngi walahay Egloŋ, a zlaka vurumo.

³⁵Kalla tapas nah vuna si na, a zumaka walahaya, a kiɗaka mizli ngi raˀahaya gar ti maslalam. Tapasa, a ngizlaka mizli kap, kaɓa taŋ migam ti walahay Lakis tuwa ma.

³⁶Zozuwe ati Israyeley gar a slikiɗam baɗ ti Egloŋ, a ram nga Hebroŋ, a zlaka vurumo.

³⁷A zumaka walahay Hebroŋ ati prok naŋhaya gar, a kiɗaka buy Hebroŋ ati mizli ngir walahayay tuwa gar ti maslalam, ko a pulam mbur pal ti siifa ta. A gam ti walahay Hebroŋ kaɓa taŋ migam ti walahay Egloŋ tuwa ma. A wahaka walahaya, yo a ngizlaka mizli ngi raˀahaya gar ngi ga dudok da Bumbulvuŋ.

³⁸Akẽh na, Zozuwe ati Israyeley gar, a mbiɗam hiri nga Debir, a zlaka vurum ati walahay Debire.

³⁹A zumaka walahaya, buy ngi raˀa ati prok naŋhaya waɗ mizli ngir taŋ gar na, a kiɗaka taŋ ti maslalam, a ngizlaka taŋ kap kap ngi ga dudok da Bumbulvuŋ. Ko Zozuwe a pul mbur pal le ti siifa ta. A gam ti walahay Debir ati buy ngi raˀa, kaɓa taŋ migam ti walahay Hebroŋ waɗ Lipna ati buy ngi raˀa tuwa ma.

⁴⁰Zozuwe a zuma hirwuyoyo le cek cek: hirwuy vay muwãhay, vay ruwuyoy ati vay sar gar ngir li muzugudum zugudumoy, waɗ vay sar muwãhay gar. A zuma taŋ le jom ti buy taŋhaya wãˀ wãˀ. Ko a pul mbur pal le ti siifa ta, gwat misi titirihey gar na, a ngizla taŋ le cek cek ngi ga dudok da Bumbulvuŋ. A ga kaɓa Bumbulvuŋ, Buymisemuŋ ngi Israyel miɓa ɗaˀ le tuwa.

⁴¹Zozuwe a zlo zuma hirwuyo zle a Kades-Barneya, Gaza, hirwuy vay ruwuy, hirwuy Goseŋ pay pay, hã sesẽŋ a Gabaˀoŋ, hirwuy vay muŋ.

⁴²Zozuwe, a zuma hirwuy tayna ati buy ngi raˀahaya gar sar purla. Asi mike na, Bumbulvuŋ, Buymisemuŋ ngi Israyele, ara jini ˀis asi taŋ.

⁴³A dirba nah, Zozuwe ati Israyeley gar, a mam ng'ar li pi sar taŋ a Gilgal a muŋ.