Read South Giziga JOS 13 Bible Online

JOS 13 - South Giziga bible

JOS 13

¹Zozuwe a gi gal le haɗa wãˀ, dar Bumbulvuŋ a ɓaŋ: «Ani ki gi gal le haɗa, vi a gi le mbeˀ mbeˀe, na hirwuy ngi tiɓi ngi tiɓi na, a ndiram le haɗa aruŋ.

²Hirwuy mindiramay vuna t'anihĩ: hirwuy ngi Filistihey ati hirwuy ngi Gesurihey gar.

³A zlo zle a Sihor misek duba cakay ati Ezipte, hã sesẽŋ angi hirwuy Ekroŋ tir vay muŋ naŋ, li tayna gar na, taŋ kaɓa i hirwuy Kanaˀanay. Buy Filistihey ada zlum asi ruwuy tayna: buy ngi ruwuy Gaza, ngi Asdot, ngi Askaloŋ, ngi Gat, ngi Ekroŋ waɗ ngi Avihey.

⁴Zle tir vay ruwuyo i hirwuy Kanaˀanay gar ati Ara, hirwuy ngi Sidoŋhoy, hã sesẽŋ a Afek, sesẽŋ ar maakway ngi Amorihey.

⁵Yo hirwuy Gebal ati hirwuy Libaŋ vay si pas ngi miprik naŋ, a zlo zle a Baˀal-Gat, a sarmuwã Hermoŋ, hã sesẽŋ a Lebo-Hamat.

⁶Mizli ngi hirwuy vay muwãhay gar, zle a Libaŋ, hã sesẽŋ a Misrefot-Mayim, hirwuy ngi mizli Sidoŋhoy gar. I ya vuna masa tiɓa taŋ ti haŋ ɗu a mbuŋ Israyele. Mindir ngi ɗike, sey i wuɗuk naŋ da Israyeley ti gi ceregezleŋ tewle, kaɓa ya muɓuw di ɗaˀ le tuwa.

⁷Wurenna so na, wuɗuka hirwuy tayna da sukwi Israyel mitaˀ taˀ ngoltir na, ɓa a ndir da taŋ, waɗ da reta ngi sukwi ngi Manase.»

⁸Sukwi ngi Ruben ati ngi Gat waɗ reta ngi sukwi ngi Manase mudumbuŋ na, a lumam nga taŋ le avu Moyis muvula taŋ di a dubazaw Zurdeŋ, tisi pas ngi miprik. A lumaka kaɓa Moyis, gawla ngi Bumbulvuŋ muvula taŋ di.

⁹Hirwuy taŋ a zlo zle a Aroˀer misi ar muzugudum ngi Arnoŋ, zlazlar madiɗaŋ, yo zle ar walahay misi ar sozo naŋ, hirwuy miɗingir ngi Medeba gar, hã sesẽŋ a Diboŋ.

¹⁰Walahay ngi Sihoŋhoy gar, Sihoŋ, buy ngi Amorihey, mazum buy a Heseboŋ, hã sesẽŋ ar maakway ngi dideˀ ngi Amoŋhoy.

¹¹Waɗ ma na, hirwuy Galaˀat ati hirwuy ngi mizli Gesurihey ati ngi Maˀakahay, waɗ hirwuy muwã Hermoŋ gar ati hirwuy Basaŋ, hã sesẽŋ a Salka.

¹²Angi hirwuy Basaŋ, hirwuy Ok miwa miwa gar, Ok mazum buy a Astarot waɗ a Edreyi, a wuzla hirwuy ngi Refayaya, mindir pal i nah, Moyis a kiɗa taŋ, a tiɓa hirwuy nah le ɗaˀa.

¹³Amma na, Israyeley a ɓulaka Gesurihey ati Maˀakahay avra ta. Mizli Gesurihey ati Maˀakahay a cifam a wuzla Israyeleye hã dana aruŋ.

¹⁴Na so na, hirwuy Moyis muwuɗuka da Israyeley na, mulum ta, sey i sukwi ngi Levi pal naŋ. Asi Bumbulvuŋ a ɓa taŋ di le: Mikulihey magaka taŋ da Bumbulvuŋ, Buymisemuŋ ngi Israyel na, levihey a sa lumam mi nga taŋ angaŋ.

¹⁵Sukwi ngi Rubene, Moyis a vula taŋ mi nga taŋ vur muyo vur muyo.

¹⁶Taŋ a lumam nga taŋ i hirwuy muzlo zle a Aroˀer misi a mi mizaw Arnoŋ ati walahay misi a hur sozo ngi walahay nah vuna, waɗ li miɗingir migweˀ avu Madeba na gar ma.

¹⁷Yo ma na, hirwuy Heseboŋ jom ati walahay naŋhay ngir miɗingirey na cek cek, kaɓa ani: walahay Diboŋ, Bamot-Baˀal, Bet-Baˀal-Meyoŋ,

¹⁸Yahas, Kedemot, Mefaˀat,

¹⁹Kiriyatayim, Sipma, Seret-Sahar misi ar li miɗingir ngir li micay nah vuna,

²⁰Bet-Peˀor, li muzugudum ngi muwã Pisga ati Bet-Yesimot.

²¹Walahayay ngir miɗingirey gar, hirwuy Sihoŋ mazum buy anga anga gar, Sihoŋ, buy madiɗa ngi Amorihey muzum buy zleˀe a Heseboŋ. Moyis a kiɗa buy Sihoŋ le waɗ buyɓi ngi mizli Madiyanay mihinam ˀay cunuˀ cunuˀ a mbuŋ naŋ gar, i buy ngi hirwuy Evi, Rekem, Sur, Hur waɗ ngi Reba.

²²Balaˀam, mangal ngi Beˀor, mbur mihiziga njolo, mizli Israyeley mikiɗaka mizli ti malslalam na, naɓa naŋ da a wuzla taŋ ya.

²³Mizli Rubeneye, tisi pas ngi pastaˀa, maakway taŋ a kiɗo mi ti mizaw Zurdeŋ. Walahayay ati prok ngi ciki naŋhaya, i hirwuy muvula le da sukwi ngi Ruben vur muyo vur muyo.

²⁴Sukwi ngi Gata, Moyis a vula taŋ mi nga taŋ vur muyo vur muyo.

²⁵Hirwuy taŋ mulumam nga taŋ i Yazer, walahay ngisi ruwuy Galaˀatay gar, waɗ reta ngi hirwuy Amoŋhey, hã sesẽŋ a Aroˀer, migweˀ avu Raba.

²⁶Waɗ zle a Heseboŋ ma, hã sesẽŋ a Ramat-Mispe ati Betonim, yo zle a Mahanayime, hã sesẽŋ ar maakway ngi Lo-Dabar.

²⁷Ar li micaya, i hirwuy Bet-Haram, Bet-Nimra, Sukot ati Safoŋ. Tayna i is ngi li buy Sihoŋ miwa taŋ, Sihoŋ muzum buy zleˀe a Heseboŋ. Hirwuy tayna taŋ tisi pas ngi miprik ngi mizaw Zurdeŋ. Mizaw Zurdeŋ i maakway ngi hirwuy nah, hã sesẽŋ a miyam madida ngi Zenezaret tir vay muŋ naŋ.

²⁸Hirwuy tayna gar, walahayay ati prok taŋhay gar na, sukwi ngi Gata, mi nga taŋ mulumam vur muyo vur muyo i nah.

²⁹Reta ngi sukwi ngi Manase, yo reta ngi sukwi ngi dideˀ ngi Manase na ma na, Moyis a vula taŋ mi ngi taŋ kwana vur muyo vur muyo ya.

³⁰Hirwuy taŋ mulumama, a zlo zle a Mahanayim, hirwuy Basaŋ gar, hirwuy ngi Ok, buy Basaŋ miwa miwa gar, yo prok ngi ruwuy Yaˀirey gar misi angi hirwuy Basaŋ, i walahayay kukur merkeɗe.

³¹Reta ngi hirwuy Galaˀata, walahayay ngi ruwuy Asetarot ati ngi Edreyi, walahayay ngisi ruwuy Basaŋ, buy Ok mazum buy angi taŋ angi taŋ gar. Hirwuy tayna gar na, i ngi reta ngi dideˀ ngi Makirey muvulaka taŋ di vur muyo vur muyo, Makir mangal ngi Manase.

³²Moyis muwuɗuka hirwuy misi ti pas ngi miprik ngi dubazaw Zurdeŋ, misek duba cakay ati Zeriko na, ti naŋ misi ar li micay ngi Moˀap.

³³Amma Moyis muwuɗuka hirwuy na, a vula sukwi ngi Levi ta. Asi a ɓa taŋ na: taŋ masa gam slra da Bumbulvuŋ, Buymisemuŋ ngi Israyeley na, mi nga taŋ i nah si.