Read South Giziga JOS 18 Bible Online

JOS 18 - South Giziga bible

JOS 18

¹Israyeley gar a tikaka ˀay le da hirwuy mitaˀ gar, akẽh na, a kusom cek cek a Silo. Joˀ a ng'aka guɗuk ngi zlir ti Buymisemuŋ a diga so.

²A wuzla Israyeley na, sukwihey a ndiram le tarnaˀ zleˀe, a lumam hirwuyo zleˀe t'aruŋ.

³Dar Zozuwe a ɓa Israyeleye: «Bumbulvuŋ, Buymisemuŋ ngi dideˀ kumoyo a vulukum hirwuy hana le da kum. Ki pam anga t'aruŋ hã dana, ki kutukom mi ɗagay ka?

⁴Wunam mizli makir makir angi sukwi gar, ɓa yi sa slina taŋ. A sa slikiɗam, ara bulaka hirwuy vuna. A sa puraka mislaka vur sukwi vur sukwi bleŋ bleŋ, ɓa a sa sikiy ti ɓi nah, ani kahana kahana.

⁵A sa wuɗkaka hirwuy vuna taˀ taˀ tarnaˀ. Mizli ngi Zudahaya, a sa ndiram ar li taŋ tir vay ruwuy. Yo mizli ngi Zozefey kwana, a sa ndiram ar li nga taŋ tir vay muŋ ya.

⁶Hirwuy mitaˀ taˀ tarnaˀ na, ara puraka bleŋ bleŋ, ɓa ki sikiy ti ɓi nah, hana naŋ kahana, hana naŋ kahana. I sa ga ceregezleŋ a mbuŋ Bumbulvuŋ, Buymisemuŋ ndra aka.

⁷Amma kum masa wuɗkaka na, mizli levihey anta sa lumam mi nga taŋ a wuzla kumo ta ɓula. Asi mikuli taŋ masa gaka da Bumbulvuŋ na, mi nga taŋ i nah si. Ani Gat, Ruben waɗ reta ngi sukwi ngi Manase, a lumam mi nga taŋ le si, a dubazaw Zurdeŋ, tisi pas ngi miprik naŋ. Muvula taŋ di i Moyis, gawla ngi Bumbulvuŋ.»

⁸Mizli muwunahay tuwa, a slikiɗam, a ram so. Mizli maram nga pura hirwuyo bleŋ bleŋ, naŋ kahana, naŋ kahana tuwa na, Zozuwe a ɓa taŋ ɗaˀ le: «A ram, bulaka hirwuyo bal bal, puraka bleŋ bleŋ, ɓa ki soko ti ɓi nah ng'avi ya, naŋ kahana kahana, i sa gukum ceregezleŋ a mbuŋ Bumbulvuŋ a Silo aka.

⁹Mizli tuwa miram na, a ngiraka hirwuyo kããk. A tohoko ɓi ngi li mitaˀ taˀ tarnaˀa ti tuhu, vur walahaya tiɗeˀe gar, naŋ kahana kahana. A dirba nah, a mam ng'avu Zozuwe ar li pi sar taŋ a Silo.

¹⁰Zozuwe a ga taŋ ceregezleŋ a mbuŋ Bumbulvuŋ a Silo. Joˀ a wuɗuka hirwuyo da Israyeleye, ngi mburo ngi mburo.

¹¹Taŋ migam ceregezleŋ na, ceregezleŋ a diɗ dumbuŋ ar sukwi ngi Benjameŋ. Hirwuy muvulaka taŋ di ti ceregezleŋ, naŋ ar wala ngi hirwuy ngi dideˀ ngi Zudahay ati ngi dideˀ ngi Zozefey.

¹²Tir vay muŋ, maakway taŋ a zli zle a mi mizaw Zurdeŋ. A jiɗ kini ti ciki Zeriko, vay muŋ naŋ. Tisi pas ngi pastaˀa, a jiɗ kini ngir ti muwã, waɗ ara kiɗ mi a Bet-Aveŋ misi a wuzlaɓuh mikirɗak kirɗaka.

¹³Maakway a cuh baɗ ti kẽh, ara bi a Luz, a ciki Luzo tir vay ruwuy naŋ. Luz vuna i Betel. Akẽh na, maakway a po sar nga Atrot-Adar, puɗak ar muwã misi a Bet-Horoŋ-Muzugudum, tir vay ruwuy naŋ.

¹⁴Ar nah na, a guno gunno tisi pas ngi pastaˀa, kini ngir ti vay ruwuy. A zlo zle a muwã misek duba cakay ati Bet-Horoŋ tir vay ruwuyo, ara kiɗ mi a Kiriyat-Baˀal, ada zilaka li nah vuna Kiriyat-Yeˀarim ma, i walahay ngi dideˀ ngi Zudahay. Yo hana i maakway ngi hirwuy taŋ vay si pas ngi pastaˀa.

¹⁵Maakway taŋ vay ruwuyo a zli zle a Kiriyat-Yeˀarim. A muruɗ kini ngir ti Gasiŋ, yo ngir ti miyam miviɗiviɗi ngi Neftoˀa.

¹⁶A pi sar kini ngir tivi kiɗa mi ngi muwã misek duba cakay ati hurjijiŋ ngi Ben-Hinom, tir vay muŋ ngi li micay ngi mizli Refayay. A pi sar tir hurjijiŋ ngi Hinomo, aru kini ngir ti ciki hirwuy Zebusihey, vay ruwuy naŋ, waɗ a pi sar kini nga En-Rogel.

¹⁷A mbiɗi kini tir vay muŋ, ara kiɗ mi a En-Semes ati Gelilot misek duba cakay ati li miɗingir ngi Adumim. A cuh baɗ ti kẽh, a pi sar tir ɗugur Bohaŋ. Bohaŋ na, i slimiɗ ngi mangal ngi Ruben.

¹⁸Yo a bi ti ciki li miɗingire, tir vay muŋ naŋ misek duba cakay ati Araba, a pi sar nga Araba.

¹⁹Maakway a cuh baɗ ti ciki Bet-Hogla, misi tir vay muŋ, waɗ ara kiɗ mi ar li mici zoɗ ng'ar mubuliy mandaŋ mikiɗ mi ndok wãˀ, tir vay muŋ naŋ, ar li mizaw Zurdeŋ mira zlir ava. Maakway misi tir vay ruwuyo naŋ kahana so.

²⁰Maakway vay si pas ngi miprike, i mizaw Zurdeŋ. Hana i hirwuy muvulaka da dideˀ ngi Benjameŋhey, vur muyo vur muyo, ti maakway naŋ misi tika tika gar.

²¹Walahayay ngi sukwi ngi Benjameŋ, vur muyo vur muyo na, ani: Zeriko, Bet-Hogla, Emes-Kesis,

²²Bet-Araba, Semarayim, Betel,

²³Avim, Para, Ofra,

²⁴Kefar-Amona, Ofni waɗ Geba. Jom gar na, walahay madiɗahay kuruˀ nga cuw, waɗ prok taŋhaya wãˀ wãˀ ma.

²⁵Mekelemey ada ma, i: Gabaˀoŋ, Rama, Beˀerot,

²⁶Mispe, Kefira, Mosa,

²⁷Rekem, Irpeˀel, Tarala,

²⁸Sela, Elef, walahay ngi Zebusihey, mbiɗeˀvra, Zeruzalem, Gibeya waɗ Kiriyat. Jom gar na, walahay madiɗahay kuruˀ nga mufaɗa, waɗ prok taŋhaya wãˀ wãˀ ma. Hana i hirwuy muvulaka da dideˀ ngi Benjameŋhey vur muyo vur muyo.