Read South Giziga JOS 2 Bible Online

JOS 2 - South Giziga bible

JOS 2

¹Zozuwe, mangal ngi Nuno, a slin mizli cuw, zle a Sitime, ɓa ara puroko li yaŋ yaŋ. A ɓa taŋ: «A ra puroko hirwuyo waɗ walahay Zeriko.» Mupura lihey tuwa, a ram nga Zeriko, a cam ngi hay ngwas sulome ada, a zilaka Rahap, a hinam a hay naŋ.

²Mizli ara ɓaka ɓi nah da buy madiɗa ngi Zeriko, a ɓakaŋ na: «Ngi duvuɗ hana, mizli mizilehey a coko ani ng'ar walahay aka, i Israyeley, a soko ngi pura hirwuyo.»

³Akẽh na, buy tuwa, a slin ng'avi Rahapa, ɓa a ɓakaŋ: «Mizli ziley miram ng'avi ka, micam ngi hay ɗik na, bo taŋ, asi a soko ngi pura hirwuyo gar.»

⁴Naɓa Rahap a ɗumo mizli mucuwoy tuwa le zleˀe ɗum. Joˀ a mbiɗa da mizli: «Naŋ kanah gisiŋ, mizli tayna a soko le ng'avi ya gwat naŋ, amma taŋ i mizli ngi damahay ka na, i si na taŋ zleˀe ta.

⁵Duvuɗ miji, ti taŋ mawuɗ a gicaka mizlingre ngi walahaya na, mizli tayna a bam le. A ram nga maka na, yi si na ta. Sipaka taŋ kutum, ɓa ki ra jaka taŋ is.»

⁶Dambalaka na, ngwas tuwa, a jiɗ ti taŋ le nga hirnga gbale a muŋ, waɗ a ɗumo taŋ ɗum asi dum ngi gugumay mislirkeɗ naŋ micikila zikitiŋ a hirnga gbale naŋ tuwa.

⁷Mizli tuwa, a sipaka taŋ kini nga mizaw Zurdeŋ, kini tir li ngi tuwuɗ a mizawa. Misipi mizli tuwa, mibam put tir walahaya si na, a gicaka mizlingre ngi walahaya giceˀ kutumo si.

⁸Mupura lihey tuwa, a hinam ɓa a hinjam t'aruŋ si na, Rahap a jiɗ ng'avi taŋ a hirnga gbale.

⁹Joˀ a ɓa mizli tayna tuwa: «I si na le, Bumbulvuŋ a vulukum hirwuyo le da kum. Zluwun ara ga ndra ti kum haɗa wãˀ, hã mizli ngisi hirwuy ndra gar, ara jijikam ngbaˀ ngbaˀ ti kumo.

¹⁰Asi mike na, ti di kum muboko ti ruwuy Ezipte na, Bumbulvuŋ a hisika yam ngi mubuliy lavaɗa hisik a mbuŋ kumo. Yo gwat kum migaka a dubazaw Zurdeŋ da buy madiɗa ngi Amorihey mucuw, Sihoŋ ati Ok, kum mingizlaka taŋ kap wãˀ na, i cinaka ɓi nah le gar.

¹¹Ndra micinaka ɓi tayna na, a huluɓa ndra le hilaɓ hilaɓ wãˀ, ko i musuwunam fẽh a mbuŋ kumo gu mata. Asi Bumbulvuŋ Buymisemuŋ kum, i Buy a muŋ waɗ a ruwuy aka ma gar.

¹²Wurenna so na, hudumom hidam le a mbuŋ ɗu, ti slimiɗ ngi Bumbulvuŋ. Ani yi gukum mezle le, anja kisa gaka mezle da mizli ɗuwoy a ya takwa. Bigikiy gwat ɓa i sa si na i gisiŋ,

¹³kisa pulaka miyi ɗuwoyo ti siifa, sukum ɗu mizile ati mongosohoy, waɗ gwat taŋ misi ti nah gar, yo kisa laham ndra avu muco.»

¹⁴Mizli tuwa, a mbiɗakaŋ di: «Haˀaw so, i muc ndra, na sey da ki njika ɓi ndra ta far. Da Bumbulvuŋ misa vula ndra hirwuyo le na, i sa purukum ti hiri mezle, yo i sa gukum gwat ti jiviɗ naŋ kasl kasl.»

¹⁵Rahap a pi sar ti mizli tuwa ti zeweɗ tir fenetir, asi hay naŋ, naŋ zlar da mohol migidaŋ muguno walahaya.

¹⁶Dar a ɓa mizli tuwa: «Ngam hirnga kini nga muwã, vur mizli masupukum na, masa lumukum. Ki ra ɗumom a diga, hã hin makir kwaɗay, sey da mizli masupukum na, a moko le. A dirba nah so na, kisa zuɓaka jiviɗ kumo gwaɗ kum.»

¹⁷Mizli tuwa, a mbiɗakaŋ di: «Hudum ka muhudumo ndra na, ɓa i sa gaka gwat nah na, jiviɗ naŋ a sa cuh ani:

¹⁸Ti ndra masa coko nga ruwuy kumo na, zeweɗ gagaza hana, kisa juwa tizirehhe a mi fenetir ka mupo sar ti ndra ti nga na. Ki sa cikila miyi ɗikeye ngi hay ɗiki, sukum ɗikey ati mizli ngi hay kumoyo gar.

¹⁹Da mbur ngi hay ɗik mutuwuɗa miviŋ le, ɓa a bo ng'avra, da a kiɗaka le vagay na, pumbus naŋ a sa mbiɗi nga hirnga naŋ a muŋ, amma ndra, ndra cimak ar ɓi nah. Amma mbur gar, kum mubummoˀ a haya, da a kiɗaka le vagay na, pumbus naŋ, a sa mbiɗi nga hirnga ndra.

²⁰Amma da ki njika ɓi ndra le na, naɓa hudum ndra, anta sa ja ndra ta.»

²¹Ngwas tuwa, a mbiɗa taŋ di: «I tiɓa le, anja a gi kaɓa mingiɓi kumo!» Akẽh na, a pula taŋ, joˀ taŋ a cohom so. A dirba nah na, a juwa zeweɗ gagaza tuwa, kaˀ a mi fenetire.

²²Taŋ a ram kini nga muwã tuwa, ara ɗumom ɗum a diga hin makir, hã mizli misipaka taŋ tuwa, a moko. Dambalaka mizli misipaka taŋ vuna, a ram ti pur taŋ le bal bal a jiviɗe, ko a lumaka taŋ ta.

²³Akẽh na, mizli mucuwoy tuwa, a poko sar ti muwã, a tuwuɗaka mizaw Zurdeŋ, a mam ng'avu Zozuwe, mangal ngi Nuno. Gwat taŋ mupuraka a diga gar na, a slufakaŋ ɓi nah so.

²⁴A ɓaka Zozuwe na: «Kay, Bumbulvuŋ a vula hirwuy nah le gar asi haŋ ndra gisiŋ. Ko mizli ngisi ruwuy ngi digahay vuna gar na, hã a jijikam kpar kpar a mbuŋ ndra ma kini.»