Read South Giziga JOS 24 Bible Online

JOS 24 - South Giziga bible

JOS 24

¹Zozuwe a kuso sukwi Israyele cek a Sikem. Akẽh na, a zilo micawwa ngi wuzla Israyeleye, buyoy ati migi kiitahay waɗ mizli madiɗa ngi wuzla mizli. Joˀ a soko nga mbuŋ Buymisemuŋ.

²Mizli keɗeɗe, Zozuwe a ɓa taŋ na: «Bumbulvuŋ, Buymisemuŋ ngi Israyel a ɓi na: Dideˀ kumoy micifam zleˀe na, ti dubazaw vay diga. Tera, cine ngi Abraham ati Nahoro, a huruk hurukam le zleˀe a mbuŋ kuliheye.

³Yi bo ti dideˀ kum Abrahama baɗ ti dubazaw vay diga, joˀ yi liˀi di angi hirwuy Kanaˀan bal bal gar. Yi vulaŋ dideˀhey le haɗa teˀe, yo yi vulaŋ Izaka le.

⁴Izaka kwana, yi vulaŋ ziri le, i Zakop ati Esaw. Yo yi vula hirwuy vay muwã Seˀire le da Esawa, ɓa a ndir da naŋ. Amma Zakop ati dideˀ naŋhaya, taŋ a ram nga Ezipte.

⁵A dirba nah na, yi slina ti Moyis ati Aroŋ, yi ga bonoy wal wal haɗa da hirwuy Ezipte ɗagay, ɓa ya misa bo ti kumo.

⁶Yi bo ti dideˀ kumoyo le ti Ezipte, hã a ndiloko sesẽŋ a mi mubuliy lavaɗa. Ezipteheye, a supoko dideˀ kumoyo sesẽŋ a mubuliy tuwa, taŋ ti mota ngi vurumoy ati pilisey.

⁷Ar nah na, dideˀ kumoy a zlaka hiziga widi kaˀ ng'avi ya Bumbulvuŋ, joˀ yi go luvuŋ ar wala ngi dideˀ kumoy ati Ezipteheye, waɗ i sirta Ezipteheye ngbulum ti yam ngi mubuliy. Gwat ya miga da Ezipte na, ki puraka le ti hiri kum. A dirba nah na, mizli kumoy a zikam le vi mbeˀ mbeˀ haɗa a wuzlaɓuh mikirɗak kirɗaka.

⁸Akẽh na, yi so ti kum nga hirwuy ngi Amorihey misi a dubazaw Zurdeŋ, taŋ a gam vurum ti kum. Amma yi vulukum taŋ le asi haŋ kumo, joˀ ki tiɓaka hirwuy taŋ le da kum. Hã yi ngizla taŋ leɗeɗ wãˀ a mbuŋ kumo.

⁹Buy madiɗa ngi Moˀap mazilaka Balak, mangal ngi Sipor na, a bo ɓa a gi vurum ati Israyeleye. Balak a slin nga zilo Balaˀam, mangal ngi Beˀor, ɓa a so nusukum.

¹⁰Amma yi tiɓa mi ngi Balaˀama ta. A gi ava i tikaˀay ɓa a ɗuwulukum mi jaka. Ya mutuɓukum tisi haŋ ngi Balak na, kanah.

¹¹Ani ki tuwuɗoko mizaw Zurdeŋ le, ki ndiloko le a Zeriko. Naŋ kanah ma, ti sukwi ngi Perizihey, Kanaˀanay, Hitihey, Girgasihey, Hivihey waɗ Zebusihey gar na, yi vulukum taŋ le gar asi haŋ kumo.

¹²Yi slin mengeveley a mbuŋ kumo, a ɓulaka buy madiɗa ngi Amorihey mucuw na, kileŋ a mbuŋ kumo, i gidaŋ ngi maslalam ati lek kumoy muɓulaka taŋ ta.

¹³Hirwuy kum mulumam gir vurˀe lum le ta na, yi vulukum di le da kum. Walahay misi i kum mindiraka taŋ ta na, ki ra cifam angi taŋ. Gudubunoy ati tutumburoy, misi i kum ming'aka taŋ ta na, ki ra zumaka yi taŋhaya.»

¹⁴Zozuwe a ɓi ma: «Wurenna so na, kumo, zluwunam ti Bumbulvuŋ, yo gakaŋ mezegwel ti mevel purla, ti gi teŋteŋ. Kulihey, dideˀ kumoy migaka taŋ mezegwel ti dubazaw Efrat, waɗ angi hirwuy Ezipte na, kirahaka taŋ kileŋ avra. Yo gaka mezegwel da Bumbulvuŋ.

¹⁵Amma, da gi mezegwel da Bumbulvuŋ a cirukum hiri ta na, wunam mbur ngi gaŋ mezegwele dana so. Kuli, dideˀ kumoy migaka taŋ mezegwel zleˀe a dubazaw Efrat na kwa, malla da kuli ngi Amorihey, kum misi angi hirwuy taŋ wurenna na kwana, wunam so. Amma ya ati mizli ngi hay ɗuwoyo ndr'i sa gam mezegwele da Bumbulvuŋ.»

¹⁶Mizli a mbiɗaka da Zozuwe na: «Ɓa i pulaka Bumbulvuŋ, i gam mezegwel da kulihey na, kay, kite i gam di i gwat malambaˀ mukuyta wãˀ le!

¹⁷Asi mike na, Bumbulvuŋ Buymisemuŋ ndra i naŋ. I naŋ mubo ti ndra ati dideˀ ndraˀahaya baɗ ti hirwuy Ezipte, tir li gi beke. Gwat madiɗa mabigi gwatay na, a ga taŋ le a mihiri ndra ani: angi jiviɗ ndra muzuɓaka gar, yo ndra mucohom a wuzla sukwi ngi mizli angi hirwuy wal wal gar na, mijigina ndra i naŋ.

¹⁸Sukwi ngi mizli wal wal haɗa, Bumbulvuŋ a ɓula taŋ le a mbuŋ ndra, wãˀ naŋ na, a ɓul di i mizli Amorihey micifam angi hirwuy hana vuna. Ndra kwana, i sa gam mezegwel da Bumbulvuŋ, asi Bumbulvuŋ ndra i naŋ.»

¹⁹Akẽh na, Zozuwe a ɓa mizli: «Kay! Ki gaka mezegwel da Bumbulvuŋ gu ta, asi mike na, naŋ i Bumbulvuŋ mipal. Naŋ a wuɗ ɓa Bumbulvuŋ kum pal i naŋ. Kum maslikiɗam ɓi, yo kum magam mungra na, naŋ a ɓusa ɓi nah gu ta.

²⁰Da kum misa pulakaŋ naŋ Bumbulvuŋ le, ɓa ki gam mezegwel da kuli ngi mizli mulakay na, naŋ a sa mbiɗi hirnga avu kum, a gukum malambaˀa. Bam ti naŋ mugukum mezle haɗa na kwana, a sa ngizlukum kuɗup na si.»

²¹Mizli a mbiɗaka da Zozuwe: «Kay, kanah ta, ndr'i sa gaka mezegwele da Bumbulvuŋ na si.»

²²Zozuwe tuwa, a mbiɗa taŋ di: «Kum i sedewo ngi hirnga kum tehhe a muŋ, ki ɓam ki wunam ngi gaŋ mezegwele i Bumbulvuŋ.» Taŋ a mbiɗakaŋ di: «Ndr'i sedewohoy vur ɓi hana.»

²³Wurenna so na, kuli ngi mulakay misi a wuzla kum na, kirahaka taŋ avra. Kaka mevel kumo ar Bumbulvuŋ Buymisemuŋ ngi Israyel.

²⁴Mizli a mbiɗaka da Zozuwe: «Ndr'i sa gaka mezegwele da Bumbulvuŋ Buymisemuŋ ndra, yo i sa cinam di i mi da naŋ.»

²⁵Tapasa na, Zozuwe a ɗiyam ɓi ngi jumoˀay ati mizli. Zozuwe a juwa taŋ ɓihey, a buga taŋ sirikey a Sikeme.

²⁶Mingiɓi tayna gar na, Zozuwe a toho taŋ toh toh angi ɗerewol ɓimujuwa ngi Buymisemuŋ. A zuɓ ɗugur madiɗa waɗ a ng'akaˀ asi widis migidaŋ, misi angi hay ngi Bumbulvuŋ.

²⁷Zozuwe a ɓa mizli gar: «Puraka ɗi, ɗugur misenna a sa ga sedewo ndra, asi mingiɓi ngi Bumbulvuŋ miɓa ndra di gar na, ɗugur hana a cine le. A sa ga sedewo kumo, vur kum masa ɓam, ki sinaka Buymisemuŋ kumo ta.»

²⁸Zozuwe a waha mizli, joˀ mbur gar aru ng'ar li nga naŋ muvulakaŋ di.

²⁹Ɓi tayna gar a cohom le. A dirba nah, Zozuwe, mangal ngi Nun, gawla ngi Bumbulvuŋ, a mucu. A muc ti vi skat ti kuruˀu.

³⁰A dikaka Zozuwe ar li nga naŋ muvulakaŋ di a Timnat-Sera, angi hirwuy muwã Efrayim, kini tir vay muŋ ngi muwã Gaˀak.

³¹Ti hin ngi siifa ngi Zozuwe gar na, Israyeley ara huruk hurukam a mbuŋ Bumbulvuŋ. Yo ko a dirba Zozuwe, ti hin ngi siifa ngi mizli micawwahay, mizli misinaka gwat Bumbulvuŋ miga taŋ gar vur Israyeley na, kanah ma.

³²Israyeley muboko ti Ezipte na, a hiloko tesl ngi Zozefe le zleˀe a haŋ, a dikaka taŋ a Sikem. A dikaka taŋ angi guva, Zakop mihiɗika zleˀe suloy skat [1] avu ziri ngi Hamoroy, Hamor cine ngi Sikem. Li nah na, a tiri i li ngi dideˀ ngi Zozefey wãˀ.

³³Elazar, mangal ngi Aroŋ kwana a mucu. A dikaka angi li miɗingir muvulaka zleˀe da mangal naŋ Pinas, angi hirwuy muwã Efrayim.