Read South Giziga JOS 3 Bible Online

JOS 3 - South Giziga bible

JOS 3

¹Ngi miprik prik naŋ na, Zozuwe ati Israyeley gar a slikiɗam baɗ a Sitime, ara ndilam a mi mizaw Zurdeŋ, a hinam a diga ɗagay, ɓa a sa tuwuɗama.

²Angi kiɗa mi ngi hin mimakir naŋ na, buyɓi ngi wuzla Israyeleye, a laˀam ar walahay guɗuko,

³a ɓaka mizli ɗaˀ le: «Da kum mupuraka levi masayaya le, a zuɓaka akoti ngi jumoˀay ngi Bumbulvuŋ, Buymisemuŋ kumo le na, pulaka li misenna, sipaka taŋ.

⁴Amma da kum mira ram na, anja li a ndir ar wala kum ati taŋ, zliv gwat ngi kilometir pal gu. Anja ki kiraham gweˀ ng'avu taŋ ta. Kanah na, naɓa kisa sinaka jiviɗ kum masaram ti raˀa, asi ki cohom tir jiviɗ nah ɗaˀ zleˀe ta.»

⁵A dirba nah na, Zozuwe a ɓa mizli: «Zuɓaka hiryi kumoy avra, asi tiprike, Bumbulvuŋ a sa gi gwat ngi zuma hirngahay a wuzla kumo.»

⁶Yo Zozuwe a ɓa masayaya: «Zuɓaka akoti ngi jumoˀaya, a ram ɓaˀ a mbuŋ mizli.» Dar taŋ a zuɓaka akoti ngi jumoˀaya, a ram ɓaˀ a mbuŋ mizli.

⁷Bumbulvuŋ a ɓa Zozuwe: «Dana na, i sa tiri ti ka madiɗa a hirnga Israyeley gar, ɓa a sinaka, yi sa ndir ati ka kaɓa ya misi zleˀe ati Moyis na ya.

⁸Naka so na, masayay majijiraka akoti ngi jumoˀaya, ɓa taŋ ɗaˀ le: ‹Da kum misa ndilam le a mi mizaw Zurdeŋ na, ki cam nga hur mizawa, ki cicam dedeŋ anga.›»

⁹Akẽh na, Zozuwe a ɓa Israyeleye: «Kirohoko ng'aka, ɓa ki cinaka mingiɓi, Bumbulvuŋ Buymisemuŋ kum maɓukum di anihĩ.»

¹⁰A dirba nah, Zozuwe a ɓa taŋ: «Bumbulvuŋ misi ti siifa, tapas naŋ masa ɓula mizli a mbuŋ kum: I kanaˀanay, Hitihey, Hivihey, Persihey, Girgasihey, Amorihey waɗ Zebusihey na, kisa sinaka naŋ da a wuzla kumo gisiŋ na ava.

¹¹Bumbulvuŋ miwa hirwuy gara, akoti naŋ ngi jumoˀaya, ani a sa ru ɓaˀ a mbuŋ kumo, a hur mizaw Zurdeŋ.

¹²Wurenna so na, a wuzla sukwi Israyel na, hilam mizli kuruˀ nga cuw, vur sukwi gar na, mbur purla.

¹³Bumbulvuŋ, miwa hirwuy gara, masay majijirakaŋ akoti ngi jumoˀaya, da sar taŋ misa ci le kulaˀ angi yam ngi mizaw Zurdeŋ si na, yam maɓul a mizawa, ti muŋ naŋ na, a sa sli, a sa gi totoŋ kaɓa mohol.»

¹⁴Mizli, ti taŋ maslikiɗam ti walahay guɗuk taŋ, ɓa ara tuwuɗaka mizaw Zurdeŋ na, naɓa masayay majijiraka akoti ngi jumoˀaya, taŋ ara ram a mbuŋ si.

¹⁵Hirak ti hin nah na, i sifi, naɓa mizaw Zurdeŋ ara zuɓ reŋ reŋ. Naŋ kine, masay mijijira akoti ngi jumoˀaya, micaka sara kulaˀ a mi ngi yama si na,

¹⁶dar yam maɓul a mizawa tir vay muŋ naŋ na, a cici. A ki totoŋ ɓultoŋ, naŋ zar kileŋ hã a Adam, walahay ngi ciki Sartaŋ. Yo yam maɓul jik kini ngir ti wuzlaɓuh mikirɗak kirɗak, mubuliy mandaŋ na kwana, a sli tasl wãˀ. Joˀ mizli a tuwuɗaka mizawa hiri taˀ nga Zeriko.

¹⁷Masayay, majijiraka akoti ngi jumoˀay ngi Bumbulvuŋ, a cicam dedeŋ ar li mingbaŋ ngbaŋ a wuzla mizaw Zurdeŋ, ko a wusam neˀ ta. Dar mizli Israyeley gar a tuwuɗaka mizaw Zurdeŋ ti sar njiraŋ njiraŋ, hã zigiduw gar a tuwuɗu.