Read South Giziga JOS 7 Bible Online

JOS 7 - South Giziga bible

JOS 7

¹Israyeley a gam teŋteŋ ar ɓi ngi gwat mitika le ta. Akan, mangal ngi Karmi, naŋ vuna i dideˀ ngi Zaɓdi, yo i dideˀ ngi popurok ngi Zera ma, yo naŋ i sukwi ngi Zuda. Gwat Bumbulvuŋ mitika taŋ vurˀe na, a zuɓaŋ. Akẽh na, Bumbulvuŋ a zuɓ himaˀ ar Israyeleye.

²Zozuwe a slin mizli baɗ a Zeriko ng'ar walahay Ay. Walahay Aya naŋ gweˀ avu Bet- Aveŋ, kini tisi pas ngi miprik ngi walahay Betel. Zozuwe a ɓa taŋ na: «Jiɗam, ara puroko hirwuyo.» Dar mizli tayna a ram nga pura hirwuy Aya so.

³Mizli tuwa, a moko ng'avu Zozuwe, a ɓakaŋ na: «Anja mizli gar a giram vu nga zli kiɗa vu ati hirwuy Aya ta. Ko gwat ngi mizli durmuk cuw malla makir si na, a ram, ara kiɗaka mizli Ayaya si. Anja ki ɗuva jijir da mizli keɗeɗe gar mata, asi mizli tayna t'anta haɗa ta.»

⁴Akẽh na, gwat ngi mizli durmuk makir a wuzla mizli, a ram nga kiɗa vu ati Ayaya. Amma hã a kilam a mbuŋ mizli Ayaya mber mber.

⁵Mizli Ayay a kiɗam asi taŋ gwat ngi mizli kukur makir nga merkeɗe. A gidiɗaka taŋ zle a mizlingre ngi walahay taŋ, hã sesẽŋ a Sebarim. A ra kiɗaka taŋ ar li muzugudum. Mizli a huluɓam hilaɓ hilaɓ arleˀe, ko gidaŋ anta neˀ le avu taŋ mata.

⁶Zozuwe ati micawwa ngi wuzla Israyeley a ngiraka zana ngi vu vuhoyo. A pam murɓuk sek sek nga hirnga, a hurkom huruk huruk a mbuŋ akoti ngi Buymisemuŋ, hã pastaˀ.

⁷Zozuwe a ɓi: «Aw! Bumbulvuŋ, Buymisemuŋ, ki tuwuɗo mizaw Zurdeŋ ti mizli hanayna kpak vur mike? Ani ɓa ki vula ndra asi haŋ ngi Amorihey, ɓa a ngizlam ndra sukwa? Da kine na, zuwen zleˀe ndra micifam a dubazaw Zurdeŋ a diga takwa!

⁸Bumbulvuŋ, ambuh takwa. Wurenna i sa ɓi mbri ska? Israyeley a kilam le ti mesene taŋhaya kini kwa?

⁹Mizli Kanaˀanay ati mizli ngisi ruwuyoy gar misa cinaka ɓi nah le na, a sa mbuɗoko hiri ng'ar ndra, waɗ a sa ngizlam ndra kap wãˀ asi ruwuyo. Naɓa kisa gi mbri ngi biga slimiɗ ɗik mazil haɗa na ska?»

¹⁰Bumbulvuŋ tuwa, a ɓa Zozuwe na: «Ki gi mi hurukko a ruwuyo ka? Slikiɗi!

¹¹Israyeley a gam mungra le. Naŋ kine, jumoˀay ɗu ati taŋ, gwat ya miɓa taŋ di ɗaˀ le, ɓa a jaka a hirnga na, a ngilaka ɓi nah le. Naŋ kanah gisiŋ, gwat ya mitika ɓa a zuɓaka ta na, a zuɓaka le gbaˀa, a huloko le, waɗ mbizeˀ, kulaˀ a wuzla gwat taŋhay.

¹²Vurˀe, Israyeley anta cicam zlak a mbuŋ mesene tanhaya gu ta. A sa kilam ti mesene taŋhaya na si, asi a sa ngizlaka taŋ. Gwat mitikahay le, misi a wuzla kum na, da ki ngizlaka taŋ avra ta na, y'anta sa ndir ati kumo ta.

¹³Zozuwe, slikiɗ wurenna, zuɓa hiryi ngi mizli avra. Ɓa taŋ na: ‹Bumbulvuŋ Buymisemuŋ ngi Israyel a ɓukum, ɓa ki zuɓaka hiryi kumoy avra ngi tiprike. Israyeley, gwat mitika le, i ngi zuɓ zleˀe ta ada a wuzla kumo. Vurˀe, kum anta sa cicam a mbuŋ mesene kumoyo zlak gu ta. Gwat mitika na, sey da kum mubam di le avra ti wuzla kumo far.›

¹⁴Ti miprike, kisa soko bigaka vu kum a mbuŋ ɗu, vur sukwi vur sukwi. Sukwi misi Bumbulvuŋ misik haŋ le ava na, kisa soko, vur muy vur muy. Muy misi Bumbulvuŋ misik haŋ le ava na, kisa soko, vur hay vur hay, yo hay misikam haŋ le ava na, kisa soko, purla purla gar.

¹⁵Mbur misikam haŋ le ava, muzuɓa gwat mitika na i naŋ na, a sa zlizliraka zlizlir zlizlir, jom ati gwat naŋhay gar. Asi mike na, a ngila ɓi ngi jumoˀay ngi Bumbulvuŋ le, yo ma na, a gi gwat mukuyta wãˀ le asi ruwuy Israyele.»

¹⁶Zozuwe a slikiɗ ngi miprik prike, a ɓa sukwi Israyele gar, ɓa a kiroho ng'avaŋ, vur sukwi vur sukwi. A sikam haŋ avu sukwi ngi Zuda.

¹⁷A kirohoko sukwi ngi Zuda, a sikam haŋ avu muy ngi Zerahay. A kirohoko muy ngi Zeraˀahaya purla purla, a sikam haŋ avu hay ngi Zaɓdi.

¹⁸A dirba nah, a kirohoko hay ngi Zaɓdi, mbur gar a kiroho ng'avaŋ. A sikam haŋ avu Akan, mangal ngi Karmi, dideˀ ngi Zaɓdi vuna, yo i dideˀ ngi popurok ngi Zera, sukwi ngi Zuda.

¹⁹Zozuwe a ɓa Akan tuwa: «Mangal ɗu, vula dudok da Bumbulvuŋ, Buymisemuŋ ngi Israyele, yo hunumaŋ. Gwat ka miga na, bigiy di, anja ki ɗum gwat avu ya ta.»

²⁰Akana kwana a mbiɗa da Zozuwe: «Naŋ kaslsla gisiŋ gwat naŋ, migi mungra avu Bumbulvuŋ Buymisemuŋ ngi Israyel i yaha. Ya miga na, jiviɗ nah a cuh anihĩ:

²¹A wuzla zlili ngi mesene ndrahay na, yi pur zana mezle ngi Mezopotami, kuy naŋ a zli ta wãˀ, yo suloy ngi ɓiri bara skat cuw, waɗ ɓiri tapasl tapaslreta kilo, may taŋ a jiy haɗa teˀe, joˀ yi hila taŋ. T'ani ɗum a ruwuy, a hur guɗuk ɗu, yo dala naŋ da kulaˀ aseˀeŋ.»

²²Zozuwe a slin mizli, a kilam ng'ar guɗuk ngi Akan tuwa. A ra lumaka zana naŋ da ɗum a hur guɗuk naŋ tuwa gisiŋ, waɗ dala kulaˀ aseˀeŋ.

²³Mizli a hilaka gwataya ti hur guɗuko, a ram taŋ da Zozuwe waɗ da Israyeleye gar. A paka taŋ a mbuŋ Bumbulvuŋ.

²⁴Akan, mangal ngi Zera, dala, zana, ɓiri tapasl tapasl reta kilo tuwa, ziri naŋ mizilehey ati mongosohoy, gusoŋ naŋ, zungu naŋ, ˀaway ati tumuŋ naŋhay, guɗuk naŋ waɗ gwat naŋ misi ti naŋ gar na, Zozuwe a hila taŋ. Israyeley gar jom ng'avaŋ, a ram ti taŋ ng'ar sozo ngi Akor.

²⁵Zozuwe a ɓa Akana: «Ki so ndra ti mendere misenna vur mike? Anja wurenna Bumbulvuŋ a suw ti mendere da ka ya so!» Dar Israyeley gar a kuyupakaŋ ti ɗugur, a kuyupaka mizli ngi hay naŋhay tuwa gar aya, a zlizliraka taŋ zlizlir zlizlir.

²⁶Ɗugur mukuyupakaŋ ti naŋ na, a slikiɗ zikitiŋ a hirnga naŋ, naŋ da hã dana aruŋ. Akẽh na, Bumbulvuŋ a muca mevele misi ka vu na a muŋ so. Taŋ mazilaka li nah, ‹sozo ngi Akor› hã dana na, vurˀe.