Read South Giziga JOS 9 Bible Online

JOS 9 - South Giziga bible

JOS 9

¹Gwatay migam a Ay gar na, ɓi naŋ a ndil le a slimiɗ buy ngi dubazaw Zurdeŋ vay muwãhaya cek, ngi ruwuy muzugudum, ngi ˀayzaw Mubuliy Madiɗa, hã sesẽŋ gweˀ avu Libaŋ. Dar mizli Hitihey, Amorihey, Kanaˀanay, Perisihey, Hivihey, waɗ Zebusiheye ma gar na,

²a jumom purla arleˀe, ɓa ngi kiɗa vu ati Zozuwe waɗ Israyeleye.

³Mizli Gabaˀoŋhoyo gwat Zozuwe miga a Zeriko waɗ a Ay na, taŋ a cinaka ɓi nah le.

⁴Taŋ a zlaka na, a gam wer avu Israyeleye: a mbiɗaka gwat ngi vu vu taŋhaya, a juwam kayawa magalahay a duba zungu taŋhaya, kwenekwene mihiryahay, mislinahay, yo muɗuva ti ɗuvoy.

⁵A cam tarak mihiryahay le, misi tuf ɓoh ɓoh avu taŋ, yo a kam zana mihiryahay le genjeɓ genjeɓ, yo ɗaf taŋ muwoko di vu ngi zum gar na, i muˀulohoy, mingila pek pek ma.

⁶A ram, ara lumaka Zozuwe ar li pi sar taŋ a Gilgal, a ɓaka Zozuwe ati mizli Israyeleye na: «I soko ti hirwuy mikileŋ. Wurenna ɗiyukum ɓi ngi jumom ˀay ar wala ndra.»

⁷Israyeley a mbiɗaka da mizli Hivi tayna tuwa: «Asinta, kum i midigwi ndrahay kwani? I ɗiyam ɓi ngi jumomˀay ati kumo mbri mbrike?»

⁸Amma a ɓaka Zozuwe na: «Ndr'i gawla ɗikey si.» Zozuwe kwana a ɓa taŋ: «Na zle kum vuna, i mizli ngi damahay ka? Ki soko ti damaka?»

⁹A mbiɗaka da Zozuwe: «Ndra gawla ɗikeye, i soko baɗ ti hirwuy mikileŋ, vur Bumbulvuŋ, Buymisemuŋ ɗik na, slimiɗ naŋ ara zil, yo gwat naŋ miga asi hirwuy Ezipte gar na, i cinaka ɓi nah le.

¹⁰Gwat naŋ miga da buy Amorihey mucuw misi ti dubazaw Zurdeŋ: Sihoŋ, buy Heseboŋ ati Ok, buy Basaŋ, micifi a Asetarot na, i cinaka ɓi nah le.

¹¹Mizli micawwa ndrahay ati mizli ngisi hirwuy ndrahay gar, a ɓam ndra na: ‹Wuɗam gwat ngi zum a jiviɗe, yo ara jam ti taŋ hirnga, kisa ɓaka taŋ na: Ndr'i gawla kumoy.› Wurenna, jumom ˀay ati ndra.

¹²Puraka ɗaf ndraˀahaya ɗi: Tapas ndra muboko a hay ndrahay, ɓa i soko nga ji hirnga ti kum na, taŋ ti vu culok culok kine zleˀe aruŋ. Amma ani wurenna, a muˀulom le, yo i mingilahay meɗ meɗ ma.

¹³Kwenekwene ndra hanayna, ndra munohoko taŋ ti mbaazla zleˀe na, i manawayahay kine zleˀe aruŋ, amma ani a ngiram le. Zana ndrahay ati tarak ngi sar ndrahay a hiryam le wãˀ, asi jiviɗ mikileŋ tuwa.»

¹⁴Israyeley a wuɗam avu gwat ngi Hivihey tuwa, a zumam, manja a cufuɗaka Bumbulvuŋ cufaɗ le.

¹⁵Zozuwe a slamˀay kiri ati taŋ, ɓa a jumomˀay, ɓa gwat a wusa siifa taŋ ta. Dar buyɓi ngi jum ngi Israyeley a hudumom a mbuŋ taŋ.

¹⁶Hin makir, a dirba taŋ mujumom ˀay ati taŋ na, Israyeley a cinaka na, dambalaka mizli tayna tuwa, i midigwi taŋhay, taŋ na a wuzla taŋ vuna si kini.

¹⁷Israyeley a ram, angi hin mimakir naŋ na, a cam ar walahay taŋhay ani: Gabaˀoŋ, Kefira, Beˀerot waɗ Kiriyat-Yeˀarim.

¹⁸Israyeley a kiɗaka taŋ ta, asi buyɓi ngi jum ngi Israyeley a hudumom le a mbuŋ taŋ ti Bumbulvuŋ Buymisemuŋ ngi Israyel. Na so na, jum ngi Israyeley a dirɗaka mizli buyɓiheye.

¹⁹Akẽh na, mizli buyɓihey tuwa, a ɓaka jum ngi Israyeleye: «Ani i hudumom le a mbuŋ taŋ ti Bumbulvuŋ, Buymisemuŋ ngi Israyele. Zle dana na, ndr'anta i gaka taŋ malambaˀ gu mata.

²⁰Gwat ndra masa gaka taŋ di ani: I sa pulaka taŋ ti siifa, anja ɓa himaˀ ngi Bumbulvuŋ a po ng'ar ndra ta. Asi mike na, i hudumom le a mbuŋ taŋ ti Bumbulvuŋ.»

²¹Buyɓihey a ɓam vur taŋ: «Anja a ndiram ti siifa!» Amma so na, a tiram mupuɗuka dumoy ati munuwa yamay da jum ngi Israyeley gar. Mingiɓi ngi buyɓihey miɓaka i hana.

²²Zozuwe a zila taŋ, a ɓa taŋ na: «Ki gam ndra gilaw kahana vur mike? Ki ɓam ndra: kum i mizli ngir li mikileŋhey, dambalaka kum i midigwi ndrahay ngbaŋ?

²³Zle dana, kum i minisahay. Gi beke anta sa kiɗ mi avu kumo ta. Kum i mupuɗuka dumoy ati munuwa yamay ng'ar hay ngi Buymisemuŋ ɗu.»

²⁴Mizli tuwa, a mbiɗaka da Zozuwe: «Bumbulvuŋ, Buymisemuŋ kumo, miɓa gawla naŋ Moyise ɗaˀ le, ɓa a sa vulukum hirwuy hana gar da kum, yo a sa ngizla mizli ngisi ruwuy hanayna gar a mbuŋ kumo na, ndra gawla ɗikey i cinaka ɓi nah le si. I zluwunam ti kum haɗa teˀe, ndra migam kahana na, vurˀe.

²⁵Wurenna na, ndra ani asi haŋ ɗiki. Gi ti ndra kaɓa ka muwuɗ le, yo kaɓa ka mupura le naŋ jeŋŋe.»

²⁶Zozuwe a gi ti taŋ kanah so, a laha taŋ tisi haŋ ngi Israyeleye, mbak a kiɗaka taŋ vagay vagay mata.

²⁷Zle ti di nah na, Zozuwe a cifa taŋ ngi puɗuka dum ati ngi nuwa yam da jum ngi Israyeley waɗ ng'ar li gi mikuli da Bumbulvuŋ, ar li Bumbulvuŋ muwuna le. A ra gaka slra nah, hã dana aruŋ.