Read South Giziga 2TH 1 Bible Online

2TH 1 - South Giziga bible

2TH 1

¹I ya Pol ati Silas waɗ Timote matuhukum ɗerewol hana da kum Cikil ngi misikristu ngi Tesalonikey. Kum mizli ngi Cine ndra Buymisemuŋ waɗ Buy ndra Yesu Kristu.

²Anja Cine ndra Buymisemuŋ ati Buy ndra Yesu Kristu a gukum mezle, a vulukum zuy.

³Sukum ndra misikristuhoy, sey i gaka sise da Buymisemuŋ ndrehhe vur kumo. A zlir le kanah gisiŋ, vur tiɓi kumo, ara sik nga mbuŋ nga mbuŋ, yo wuɗavu misi ar wala kum na, ara sik a mevel kumo purla purla gar.

⁴Vurˀe, i ra jijaham haɗi vur kumo, a wuzla Cikil ngi misikristuhoy gar. Asi ko ar bonoy, ko da mizli ra supukum nder nder kwana, ki ra ɓusakaŋ, ki ra cicam zlak kuy kuy, yo ki ra tiɓam kuy kuy na si.

⁵Hana i gwat mabiga Buymisemuŋ a sa ga kiita nga naŋ ti jiviɗ mikaslsla. Asi mike na, bonoy kum masaka gar na, hĩˀĩ ɓa a tiri ti kum mizli mindilaka le ter ngi ci ar Zumabuy ngi Buymisemuŋ.

⁶Naŋ kine, Buymisemuŋ naŋ jeŋŋe, mizli magukum bonoy na, a sa pula bol naŋ avu taŋ.

⁷Tapas Buy ndra Yesu masa bugo vu ti muŋ ati modro naŋ migidaŋhay na, kum masam bonoy na, a sa cufukum ɓa ki muskam vu ati ndra ya.

⁸A sa sawa a wuzla vu matiɓi njilim njilim. Ti nah na, mizli mangumam tiɓa Ɓimezle ngi Buy ndra Yesu ta gar na, a sa kuta taŋ.

⁹Kuti taŋ na, i zizi wãˀ hã ngi surmutuk, kileŋ a mi hiri ngi Bumbulvuŋ, ɓa a puraka dudok naŋ mawucuɗo ta wãˀ.

¹⁰Tapas naŋ masa mawa, ɓa mizli naŋhay keɗeɗe, a sa ɗuvakaŋ hirngaŋ, a sa purakaŋ hiri ngal ngal, waɗ a sa tiɓakaŋ na, kumo kwana, kisa ndiram bumoˀ ati taŋ aya, asi ki tiɓaka ɓi ndra mutulukum di mi na le.

¹¹Vurˀe, i ra diram dibiɗ ndrehhe vur kumo, ɓa Buymisemuŋ ndra a purukum, ki ndilaka le ngi zile. I ra tumbulokoŋ ɓa a jinukum ti gidaŋ naŋ, ɓa ki gam gwat mezle, kum muroko ti may naŋ gar, yo ɓa ki gam slra ti tiɓi kum na.

¹²Ɓa kahana so na, kisa gaka dudok da Buy ndra Yesu, yo naŋ kwana, a sa gukum di ya. Hana gar a sa gi mbele gimezle ngi Buymisemuŋ ndra ati ngi Buy ndra Yesu Kristu.