Read South Giziga 1TI 1 Bible Online

1TI 1 - South Giziga bible

1TI 1

¹I ya Pol, mislin ngi Yesu Kristu matoho ɗerewol hana. Miɓiy i Milih ndra Buymisemuŋ ati Yesu Kristu, ndra minjah hiri asi naŋ na.

²I ra tuhuw di da ka Timote, mangal ɗu migisiŋ gisiŋ ar tiɓa. Anja Cine ndra Buymisemuŋ ati Buy ndra Yesu Kristu a gukuw mezle, a purukuw ˀircece, yo a vulukuw zuy.

³Ti ya maru nga Maseduwan na, i cufuɗuw ɓa kisa cifi a Efez, ɓa ki tika mizli mekelemey madubunaka ɓi mijeŋ ta da mizli na.

⁴Sey ki ɓa taŋ ɓa a pulaka mambaˀhay ati slufa dideˀhey mutororo makiɗ mi ta na. I ɓi maso ti tiri tewle, ɓi Buymisemuŋ mujuwa a mevele ngi gi ngi gi, magi gisiŋ tisi tiɓi na, anta jinaŋ ko neˀ ta.

⁵Ɓi ya miɓa ɗaˀ le na, hĩˀĩ ɓa mizli a wuɗam vu ti mevel purla, ti wuluk mezle, yo ti tiɓi minjah wãˀ.

⁶Mizli mekelemey, a ngizlam le avu jiviɗ hana, ara zizam ti gi mi ngatara lambaˀ.

⁷A puraka vu taŋ ka buy ngi ɓimujuwahay. Na, ko a sinaka wala ngi ɓi taŋ maɓaka vuna ta, yo ko a sinaka ɓi taŋ macicam kaŋ kaŋ ara vuna ta ma.

⁸Naŋ kine, i sinaka le, ɓimujuwa, da mbur ara gi di slra ti jiviɗ naŋ na, naŋ kuy.

⁹Cunukum ɓi ani kuy kuy: ɓimujuwa na, naŋ vur mizli mijeŋŋehey ta. Amma naŋ vur mizli mahinam hirnga ta, mislikiɗa ɓihey, mizirɗa mihey ati migi mungrahay, maɗuvaka hirnga da Buymisemuŋ ta, yo da gwat ngi Buymisemuŋhoy ta, mikiɗa cine ati mumuŋ taŋhay vagay vagay, mikiɗa hirngahay,

¹⁰sulomehey, zil mihin ti cil taŋhay ati migi terere ngi bekehey, misi slirey, muhudum ti slirey, waɗ mizli magam gwat mekelemey ngi ngila ɓi mikaslsla ngi Kristu.

¹¹Dubun hana, naŋ da ar Ɓimezle mupulaka asi haŋ ɗu na. I Ɓimezle maɓi ɓi ngi Buymisemuŋ misi ti dudok, mavula ndra mumul na.

¹²I ra ga sise da Yesu Kristu, Buy ndra muvuliy gidaŋ ngi gi slra na. A zuɓiy ngi gi slra, asi a puriy, i ndila le.

¹³Ti zlezle zleˀe na, i zaŋ le, i sipaŋ le nder nder, yo i guzuvraŋ le. Amma Buymisemuŋ a puriy ˀircece le, asi i tiɓa Kristu zleˀe t'aruŋ, yo i ga tir manja sin.

¹⁴Haˀaw, gimezle ngi Bumbulvuŋ ndra a gi le haɗi ar ya, a vuliy tiɓi a mevel waɗ wuɗavu tisi Yesu Kristu.

¹⁵Yesu Kristu a so a ruwuyo, ɓa ngi laha migi mungrahay, yi madiɗa ngi migi mungrahay gar. Mingiɓi hana i gisiŋ, a ndila le ɓa mizli gar a tiɓakaŋ.

¹⁶Na, Buymisemuŋ a puriy ˀircece le na, aseˀeŋ. Yi madiɗa ngi migi mungrahay gar, Yesu Kristu a biga naŋ mandi ɓi haɗi na le avu ya. Yo ɓa nga mbuŋ, mizli masa tiɓakaŋ, ɓa a lumam siifa ngi set na, a sa puraka avu ya.

¹⁷Buy madiɗa ngi sete, Buymisemuŋ mamuc ta, mbur mapura gu ta wãˀ, Buymisemuŋ mupurla na, anja mizli a ɗuvakaŋ hirnga, a gakaŋ dudok hã ngi sete, ngi samadin! Amin.

¹⁸Ka mangal ɗu Timote, ɓi ya maɓuw di hana, mijiviɗey a ɓaka le zleˀe vur ka, i ra puluw di asi haŋ ɗike, ɓa a vuluw gidaŋ ngi cici zlak, ngi gi vurum kuy kuy ti naŋ,

¹⁹ti tiɓi ɗik, ti wuluk mezle ngir mevel ɗik. Mizli mekelemey a kam slimiɗ ar wuluk ngir mevel taŋ ta, joˀ tiɓi taŋ a zizi kuɗup wãˀ.

²⁰Himene ati Alekzaŋdire, t'ada a wuzla mizli tayna. Yi vula taŋ le da Satan, ɓa a sinaka, dambalaka a zaka Buymisemuŋ ta.