Read South Giziga 1TI 2 Bible Online

1TI 2 - South Giziga bible

1TI 2

¹Dumbuŋ na, i ɓi so na: anja misikristuhoy a cufuɗam gwat avu Buymisemuŋ, a diram dibiɗ, a tumbulokoŋ, yo a gakaŋ sise vur mizli gar.

²A diram dibiɗ vur buy madiɗahay ati mizli miwi hirwuyoy gar, ɓa i cifam zuy zuy, setette, i sipam jiviɗ ngi Buymisemuŋ, yo i gam gwat mezle.

³Hana i gwat mukuy macira hiri da Buymisemuŋ, Milih ndra.

⁴Buymisemuŋ a wuɗ ɓa mizli gar a laham, yo ɓa a sinaka ɓi mikaslsla.

⁵Asi Buymisemuŋ, naŋ purla tewle, yo mbur misi ar wala ngi mizli ati Buymisemuŋ kwana, naŋ purla ma, i Yesu Kristu.

⁶Naŋ, a vula hirnga naŋ le, ɓa ngi mbuɗo hirnga ngi mizli gar. Naŋ kine, Buymisemuŋ a wuɗ ɓa mizli gar a laham. A biga tisi Yesu Kristu muvula hirnga naŋ angi hin Buymisemuŋ misla na.

⁷Buymisemuŋ mitiri ti ya bugawla, yo mislin naŋ na vurˀe. A sliniy ng'avi mizli Yudehey ta na, ɓa i dubuna taŋ tiɓi waɗ ɓi mikaslsla. Ya maɓa na, i gisiŋ gisiŋ, i gi di i slir ta.

⁸Yi wuɗ so na, anja ko amaka gar, mizli mizilehey madiram dibiɗ gar na, a zuɓaka haŋ manja dili paɗ nga muŋ, a diram dibiɗ manja himaˀ, manja tiri.

⁹Anja ngwasaya kwana, a juwaka zana ti jiviɗnaŋ kaslsla, anja a ɗiyam vu weˀe, ti wuya ta. Anja a ɗiyam vu ti slupa hirnga mutuwaˀ haɗi ta, malla ko ti gwat ngi wuya ngi ɓiri tapasl tapasl ta, ti virzle hirpatu ta, malla zana ngi slimiɗey ta.

¹⁰Amma anja a ɗiyam vu ti gwat ngi gi taŋ mezle jaka, i gwat mizlir le avu ngwasay mazluwunam ti Buymisemuŋ.

¹¹Anja ngwasay a dubunaka gwata ti mi teˀteˀe, a hinam hirnga wãˀ.

¹²Ɓa ngwas a dubun gwat da ziley, malla ɓa a wa taŋ na, yi pula jiviɗ nah ta. Anja a cifi teˀteˀe.

¹³Asi Buymisemuŋ a ndir dumbuŋ i Adamu. A dirba nah kwana i Hawwa.

¹⁴Kaw mitikin na, i Adamu ta, amma a tikin di i ngwasa, a ngila ɓi ngi Buymisemuŋ.

¹⁵Amma ngwas a sa lih tisi naŋ mayi ziri na, na sey da ara hurdum ti tiɓi, a wuɗ vu, a ndir naŋ pal, yo a wuɗ wuya ta.