Read South Giziga 1TI 5 Bible Online

1TI 5 - South Giziga bible

1TI 5

¹Anja ki buca mbur midigila ti buc ta, amma vulaŋ gidaŋ kaɓa i bunuku. Gi ti mizli ziri ziri na, kaɓa i sukum ɗikey.

²Ngwas micawwahaya, gi taŋ kaɓa i mumuŋ ɗikey, yo ngwas misi i ziri ziri aruŋ kwana, gi taŋ kaɓa i sukum ɗik mongosohoy tewle, manja ki ci ar dili.

³Ɗuva hirnga da ngwas wudigahay mupula fuk fukoy na.

⁴Amma da ngwas wudiga naŋ da ti ziri naŋhay, malla dideˀ naŋhay na, anja sey ziri tayna, a sirkaka gi slra ngi Buymisemuŋ a hay taŋhaya. Yo a zlir le ɓa a wurkaka gwat miyi taŋhay ati dideˀ taŋhay migaka taŋ di zleˀe na ya. Gwat macira hiri da Buymisemuŋ gisiŋ gisiŋ, i nah.

⁵Ngwas wudiga migisiŋ gisiŋ pal naŋ na, miki slimiɗ anga anta na, a njih hiri le njah ar Buymisemuŋ, ara hurdum ti dira dibiɗ waɗ ti tumbulo Buymisemuŋ, duvuɗ ti papas gar, ɓa a jinaŋ.

⁶Amma wudiga mawuluk nga naŋ sey gwat maciraŋ hiri na, ko vur naŋ misi ti siifa tekeɗe kwana, kite a muc le si.

⁷Sey ki ɓa ɓi hana da ngwas wudigahay gar, ɓa mbur a lum ɓi avu taŋ ngi mbiɗa taŋ hirnga ta.

⁸Da mbur anta ki slimiɗ ar muy naŋhaya ta, wãˀ naŋ anta ki slimiɗ ar mizli ngi hay naŋhaya ta na, kite a pula tiɓi le, a gi gwat mukuy ta le wãˀ, fineˀ mbur mitiɓi ɗaˀ ta.

⁹Ɓa ki toho slimiɗ ngi ngwasa nga wuzla wudigahay na, sey da a ndila le vi kukur merkeɗ far, a sliˀi ɗaˀ ta, yo a ngilakaŋ ɗaˀ ta.

¹⁰Anja mizli a sinaka le, i ngwas magi slra mezle, a gila ziri naŋhaya le kuy kuy, a tiɓi mulakay le a hay naŋ, a bun sar ngi mitiɓihey le. Mizli muroko ar bonoyo, a jina taŋ le, a gi sukwi ngi gwat mezlehey le gar.

¹¹Amma ngwas wudigahay misi i ziri ziri aruŋ na, anja ki toho slimiɗ taŋ ta. Asi da may zil ara ja taŋ na, a sa mbiɗam duba avu Kristu, hã a zuɓam zil ma.

¹²Joˀ Buymisemuŋ a sa ga taŋ kiita asi taŋ mingilaka ɓi taŋ majuwaka mudumbuŋ zleˀe na.

¹³Yo ma na, slra taŋ misi anta tuwa na, a sirkam liˀi caŋ caŋ, vur hay vur hay. I nah tew ta ma, a gam mi haɗa, a cikislam ɓi, yo a puwam ɓi lambaˀ lambaˀa ma.

¹⁴Yi wuɗ na, anja wudiga ziri ziri aruŋ na, a zuɓam ziley a muŋ, a yam ziri, a jaka hay taŋhaya, ɓa mizli maziram ti ndra ta na, a lumam ɓi ngi cikisl a hirnga ndra ta.

¹⁵Asi ngwas wudiga mekelemey ada, a zizam le, ara sipam Satan.

¹⁶Amma da ngwas mitiɓi, muy naŋ wudigahay ada na, sey a ki slimiɗ ar taŋ, anja a pula mazuɓaka gir taŋ, i Cikil ngi misikristuhoy ta, ɓa a ga taŋ kefek ngi ki slimiɗ ar wudiga migisiŋ gisiheye.

¹⁷Mizli micawwahay maram ti Cikil ngi misikristuhoyo kuy kuy na, a ndilaka le ɓa a lumam migire makaw cuw, wãˀ naŋ na, mizli masam bonoy ti tila mi ti ɓi ngi Buymisemuŋ ati ngi dubuna gwat da mizli.

¹⁸Naŋ kine, Ɓimutoho a ɓi na: «Anja ki ca taɓak a mi sla maɗug daw a milaŋ ta.» Yo ma na: «Mbur migi slra, a ndila le ɓa a wurkakaŋ.[1].»

¹⁹Da mburo kupa ɓi le da mbur micawwa na, anja ki tiɓa ta, sey da sedewohoy ada cuw malla makir far.

²⁰Mizli magam mungra na, anja ki mbiɗa taŋ hirnga a mihiri ngi mizli gar, ɓa mekelemey a zluwunam ngi gi nah.

²¹I ra tumbuluw a mbuŋ Buymisemuŋ, yo a mbuŋ Yesu Kristu, waɗ a mbuŋ modro ngi Bumbulvuŋhoy: sipa ɓi ngi kuti hana, ki wunka mizli pal pal ta, ki jina mbur mekeleme mbak numuŋ le ta.

²²Angi Cikil ngi misikristuhoyo, ko ki wus vu ngi buca haŋ da mbur a hirnga ta. Ki ci ar mungra ngi mizli magaka na ta. Ka vuna, jigina hirnga ɗik avu ɓi ngi dili.

²³Anja ki si yam tewle ta. Si mbaazla neˀ ɓa a vuluw kefek da kwacaya, asi jiji masupuw ndrehhe na.

²⁴Mungra ngi mizli mekelemeye, ko a gaka taŋ kiita t'aruŋ kwana, naŋ njak ar li babara si. Amma ngi mizli numuŋhoyo, a sa njikam ti naˀnaˀ aruŋ.

²⁵Naŋ kanah ya, slra mezleheye, taŋ njak njak a mihiri ngi mizli. Ko da mekelemey anta njikam ta tekeɗe kwana, a ɗumom ta.