Read South Giziga 1TI 6 Bible Online

1TI 6 - South Giziga bible

1TI 6

¹Sey bekehey gar a puraka buy taŋhaya, a ndilaka le ɓa a cinaka taŋ mi gisiŋ wãˀ, ɓa ko mbur maza Buymisemuŋ, yo maza ɓi ndra madubunaka da mizli na, anta.

²Beke misi buy taŋhay i mitiɓihey na, anja a hirsaka taŋ vur taŋ i sukum taŋhaya ta. Amma anja a gaka taŋ slra kuy kuy jaka, asi buy taŋhay i mitiɓihey, yo i sukum taŋhay Buymisemuŋ mawuɗ taŋ haɗa, yo taŋ kwana, ara pulaka taŋ gir ti slra taŋ mezlehey na. Sey ki dubuna gwat hana da mizli, yo ki til di mi.

³Da mbur ara dubun gwat mekelem pal da mizli, da i ɓi mizliram ati ngi Buy ndra Yesu Kristu ta, yo a zliram ati ɓi ngi sipa jiviɗ ndra na ta ma na,

⁴na ɓa mbur nah, huhumvu a hulfoŋ le. I mbur misin gwat ta, i mingila mi ngataraŋ, i mitiri asi ɓi lambaˀ. Joˀ a bo ti suloŋ, tiri, zivu, si hiri ar mbur.

⁵Mizli misi lesl taŋ mihiryahaya, a tiram, ko a taˀaka ta, a sinaka ɓi mikaslsla ta. A waka na, tiɓa Buymisemuŋ, i ɓi ngi luuma zlili.

⁶Haˀaw, tiɓa Buymisemuŋ na, i ɓi ngi luuma zlili gisiŋ gwaɗ naŋ, na sey da mbur ara mumul ti gwat naŋ misi ti naŋ.

⁷Ti taŋ miyam ndra ar duniya na, i soko ti gwat a haŋ ta. Yo tapas ndra masa micama ya kwana, ko ndr'anta sa ram ti gwat a haŋ ta ya.

⁸Amma da ndr'ada ti gwat ngi zum ati zana ngi ki si na, ter ti ndra si.

⁹Amma mizli mawuɗam ɓa a gam zlili na, a sa cam ar tikin kutum, ar may gwat miwal wal ngi gilaway, maso ti mendere, maru ti mizli nga hiryi, a ziza taŋ.

¹⁰Asi mike na, dimbasl ngi gwat malambaˀhay gar na, i may dala. Mizli mekelemey a vulaka vu taŋ wãˀ ngi sipi dala, a ngizlam le kileŋ avu tiɓi taŋ, yo gaka bonoy da vu taŋ haɗa, a zluɓaka le.

¹¹Amma ka, mbur ngi Buymisemuŋ, kil kileŋ avu gwat tayna. Pur jiviɗ ngi gi gwat mijeŋŋe, ngi sipi jiviɗ ngi Buymisemuŋ, ngi tiɓi, ngi wuɗavu, ngi cici zlak gidaŋ gidaŋ, ngi cifi teˀteˀe.

¹²Kiɗ vu ti cika vu mezle ngi tiɓi, ɓa ki lum siifa ngi sete, Buymisemuŋ muziluw na, ngi lum naŋ. Tapas ka miɓi njah a mbuŋ sedewohoy haɗa, ki tiɓa Yesu le na, ki si na le.

¹³A mbuŋ Buymisemuŋ mavula siifa da gwatay gar, waɗ a mbuŋ Yesu Kristu, migi sedewo a mbuŋ buy Poŋs Pilat, naŋ miɓi a tiɓi le kuy kuy na, i ra ɓuw:

¹⁴Ja ɓimuɗuva a hirnga, manja hereweɗ, manja ɓi ngi mbuɗuw hirnga aseˀe, hã tapas Buy ndra Yesu Kristu masa njiko vu.

¹⁵A sa bugo vu kasl angi pas Buymisemuŋ misla. I Buymisemuŋ mavul mumul, buy i naŋ pal naŋ, Buy Madiɗa ngi buy madiɗahay, buy miwi buyoy.

¹⁶Mamuc ta wãˀ, i naŋ pal naŋ. Naŋ angi li miciɗak ciɗak, mbur a ndil ng'ava gu ta. Ko mbur mupuraŋ ɗaˀ anta, yo mbur mapuraŋ gu anta wãˀ. Dudok ati gidaŋ ngi sete, inga naŋ. Amin.

¹⁷Mizli misi ti zlili ngi ruwuy hanayna, ɓa taŋ: anja a huhumom vu ta, anja a njaham hiri asi zlili mandir caˀa gisiŋ ta na ta. Amma anja a njaham hiri angi Buymisemuŋ mavula ndra zlili haɗi, ɓa i mumulom di na.

¹⁸Anja a gam mezle, sey gimezle a tiri i zlili taŋ, anja a vulam ti gula ti hazum, a wunkaka zlili taŋhay ati mizli mekelemey.

¹⁹Kite a kusom di i zlili mezle, mahiryi ta wãˀ da taŋ nga mbuŋ, dar a sa lumam siifa migisiŋ gisiŋ.

²⁰Aw yeme ɗu Timote, ja Ɓimezle mupulukuw di asi haŋ ɗik na kuy kuy. Kirih kileŋ avu dufa mi lambaˀ ati ngila mi, mizli mapuraka kaɓa i sin madiɗa na.

²¹Mizli numuŋhoyo, a waka kaɓa t'ada ti sin nah vuna, a kiraham kileŋ avu tiɓi. Anja Buymisemuŋ a gukum mezle.