Read South Giziga 2TI 1 Bible Online

2TI 1 - South Giziga bible

2TI 1

¹I ya Pol, mislin ngi Yesu Kristu, asi Buymisemuŋ a wuɗ le. A vuliy slra ngi tila mi ti ɓi ngi siifa, naŋ miɓa ɗaˀ le zleˀe tisi Yesu Kristu.

²I ra toho ɗerewol hana da ka Timote, mangal ɗu, ya mawuɗow haɗa. Anja Cine ndra Buymisemuŋ ati Buy ndra Yesu Kristu a gukuw mezle, a purukuw ˀircece, a vulukuw zuy.

³Duvuɗ ti papas, ya miradir dibiɗ gar na, i ra zila slimiɗ ɗike, ko mbak le anta. I ra ga sise da Buymisemuŋ, ya magaŋ slra ti mevel mezleŋ, kaɓa dideˀ ɗuwoy zleˀe na ya.

⁴Ya muwulka tuwuy ɗik na le na [1], i wuɗ pur ɗike haɗa haɗa, ɓa yi mumul wãˀ.

⁵Tiɓi migisiŋ gisiŋ misi a mevel ɗik na, naŋ da keŋŋe a hirnga ɗu. I tiɓi mudumbuŋ misi zleˀe a mevel Lowis, dunuk mongoso waɗ a mevel munuk Enike na. I si na le gisiŋ, tiɓi nah na, naŋ da a hur ɗik aya.

⁶Vurˀe, i ra ɓuw ava, gwat Buymisemuŋ muvuluw di, zle ti ya mubucuw haŋ a hirnga na, bula hiri nah ava ka vu.

⁷Asi ˀUf, Buymisemuŋ muvula ndra di na, i ˀUf ngi zluwun ta, amma i ˀUf mavul gidaŋ, wuɗavu, waɗ tikaˀay da vu ndra.

⁸Buy ndra na, anja ki gi mesem ngi ga sedewo naŋ ta so, yo ya mbur dangay aseˀe na kwana, ki gi mesem ti ya ta ma. Amma sukum bonoy cuwa asi Ɓimezle, ti njahha hiri njah asi gidaŋ Buymisemuŋ mavula na.

⁹I naŋ milaha ndra, a zila ndra ɓa i tiram mizli naŋhay. Anta asi gwat ngi gi ndra ta, amma asi wuluk naŋ mujuwa a mevele, waɗ asi gimezle naŋ. I gimezle naŋ miga ndra di dumbuŋ angi hin ngi sete, tisi Yesu Kristu.

¹⁰Wurenna, a biga ndra di le tisi Milih ndra Yesu Kristu mubugo vu na. Yesu a pa hirnga le da muco, a biga ndra siifa ngi sete le ti Ɓimezle na.

¹¹Buymisemuŋ a tiri ti ya bugawla le, mislin waɗ mudubuna gwat da mizli, ɓa ngi tila mi ti Ɓimezle nah vuna.

¹²Ya masi bonoy hana na, aseˀeŋ. Amma y'anta gi di mesem ta, asi i si na mbur, ya muɗuva tiɓi ɗu ar naŋ na le, yo i si na le gisiŋ, gwat naŋ mupula asi haŋ ɗu na, a wi di vu gu hã a ndila hin ngi kiita.

¹³Ɓi mikaslsla ka micina avu ya na, zuɓa, sipi di i nah. Cici kuy kuy angi tiɓi ɗik waɗ angi wuɗavu ndra tisi Yesu Kristu na.

¹⁴Gwat mezlehey mupulukuw taŋ asi haŋ ɗik na, ja taŋ ti jini ngi ˀUf Mipal misi a hur ndra na.

¹⁵Ki si na le, mizli misi a Azihey gar a pulikiy le. Figel ati Hermogene, t'ada a wuzla taŋ.

¹⁶Anja Bumbulvuŋ a pura ˀircece haɗa da mizli ngi hay Onesiforoyo, asi naŋ a vuliy gidaŋ le is mbeˀmbeˀe. Ko ti ya misi angi dangay na kwana, mesem a gaŋ nga pur ɗu ta.

¹⁷Ti naŋ mindilo ndil a Roma si na, aru ti sipiy gǝr gǝr jak, hã a lumiy.

¹⁸Anja Buy Yesu a jinaŋ, ɓa Bumbulvuŋ a puraŋ ˀircece tapas naŋ masa ga kiita da mizli na. Gwat naŋ migiy di gar a Efez na, ka ki si na le kuy kuy fineˀ mizli gar.