Read South Giziga 2TI 2 Bible Online

2TI 2 - South Giziga bible

2TI 2

¹Ka so na, mangal ɗu, anja ki lum gidaŋ ti gimezle Buymisemuŋ miga ndra di tisi Yesu Kristu na.

²Ɓi ka micina avu ya a mbuŋ migi sedewohoy haɗi na, pula asi haŋ ngi mizli miteŋteŋhey. Taŋ vuna kwana, a ndilaka le ngi dubuna da mizli mekelemey aya.

³Ɓusa bonoy ɗike, kaɓa soje miteŋteŋ ngi Yesu Kristu.

⁴Mbur mici soje le, da a wuɗ le ɓa a cira hiri da buy naŋ na, naŋ anta ci ar ɓi ngir walahaya ta.

⁵Naŋ kine ya, gi duba cakaya, ɓa mbur a lum migir naŋ na, sey da a zlumbur vu le ti jiviɗ naŋ far.

⁶Mbur muhuf migir le kupuyah ti slra naŋ kwana, masa luuma migir ngi migama dumbuŋ i naŋ kwaɗay.

⁷Sla wala ngi ɓi ya maɓuw di na, is ngi ɓi mindire, i Bumbulvuŋ masa sluw wala nah gar.

⁸Wuluk keŋ ar Yesu Kristu, dideˀ ngi Davit, mislikiɗ baɗ ti wuzla mumucahay, kaɓa Ɓimezle ya matil di mi maɓa na.

⁹Yo ya masi bonoy ka mbur migi gwat malambaˀ, hã a juwikiy ti celelu na aseˀeŋ. Amma ɓi ngi Buymisemuŋ, i mujuwa ti celelu ta ɓula.

¹⁰Ya maɓusa ɓi gar na, vur mizli Buymisemuŋ muwuna taŋ, ɓa taŋ kwana, a lumam lih tisi Yesu Kristu, waɗ ɓa a lumam dudok mihã ngi set na ma.

¹¹Mingiɓi ani na, naŋ njah wãˀ: «Da i micam le ati naŋ na, i sa ndiram ti siifa ati naŋ ya.

¹²Da i ra sam bonoy ati naŋ na, i sa zumam buy ati naŋ ya. Da i ra ɓam: i sinakaŋ ta na, naŋ kwana, a sa ɓi: a si na ndra ta ya.

¹³Ndra, da ndr'anta teŋteŋ ava ta na, naŋ, naŋ da teŋteŋ avu ndra, asi naŋ anta ji mi ti vu naŋ tehhe a muŋ gu ta.

¹⁴Mahiri ngi ɓi hana da mizli ɗikey gar, ɓa taŋ di a mbuŋ Buymisemuŋ: anja a tiram asi ɓi ngatara ta. Tiri anta jini vu ko neˀ ta, sey a ziza mizli macinama ti zizi tewle.

¹⁵Tum vu tum, ɓa Buymisemuŋ a ngilwuy ti ka, ki mbur manduruɓ hiri ti slra naŋ ta, amma matil mi kuy kuy ti ɓi mikaslsla.

¹⁶Gi mi muhoyo hoyo lambaˀ na, ki ci ara ta. Asi mike na, mizli macam anga na, a sa kiraham kileŋ ti vendeke avu jiviɗ ngi Buymisemuŋ.

¹⁷Mingiɓi taŋ, naŋ kaɓa gweh gweh mazuma waˀa. Himene ati Filetuso, t'ada a wuzla taŋ.

¹⁸A kiraham le kileŋ avu ɓi mikaslsla. A ɓam na: Buymisemuŋ a slikiɗa ndra le ti wuzla mumucahaya si. Naŋ kine, a zizam tiɓi ngi mizli le haɗi ti ɓi hana.

¹⁹Amma ɗuva virzi naŋ, Buymisemuŋ muɗuva gidaŋ gidaŋ na, naŋ da. Mingiɓi ani toh toh ava: «Bumbulvuŋ a si na mizli naŋhaya le», waɗ ma na: «Ko wa gar maɓi, naŋ i mbur ngi Bumbulvuŋ na, anja a kirih kileŋ avu gi gwat malambaˀa.»

²⁰Misi angi hay madiɗa na, i tutuŋ ngi ɓiri tapasl tapasl ati ngi ɓiri bara tewle ta, amma tutuŋ ngi dumoy ati ngi hohoyoy ada ma. A paka mekelemeye sek ngi gi gwat mitaˀ ti ɗuf, yo numuŋhoyo, a gam taŋ gwat muho gar.

²¹Mbur mubuna vu naŋ le tir gwat malambaˀ tayna na, naŋ a sa tiri kaɓa i tutuŋ ngi gi gwat mitaˀ ti ɗuf, tutuŋ mipal, mapul gir da Buy naŋ, hĩˀĩ ngi gi slra mezle gar.

²²Kil kileŋ avu may gwat ngi mbur zuŋ zuŋ aruŋ na. Pur jiviɗ ngi gi gwat mijeŋŋe, ngi tiɓi, ngi wuɗavu, ngi cifi zuy zuy ati mizli misi mevel mezlehey mazilaka slimiɗ ngi Bumbulvuŋ.

²³Amma ngila mi malambaˀ migilaw gilaw na, ki ci ara ta. Ki si na le, a slikiɗ tiri.

²⁴Na, mbur migi slra ngi Bumbulvuŋ, anta tiri ta, amma i mbur mawuɗ mizli gar, i mbur mindila le ngi dubuna gwat da mizli, mi ngi dirɗavu kwana, a ɓusa gu.

²⁵Sey a kuta mizli mingila miheye ti sekvu. Asinta, Buymisemuŋ a sa vula taŋ jiviɗ a mbiɗaka mevele, ɓa a sinaka ɓi mikaslsla kwani.

²⁶Yo ɓa a sa moko ti lesl taŋ a muŋ, a sa kiraham tivi mazaɓ ngi Satan mija taŋ, yo mitika taŋ ˀay, ɓa a gam gwat naŋ mawuɗo.