Read South Giziga PHM 1 Bible Online

PHM 1 - South Giziga bible

PHM 1

¹I ya Pol, ya mbur dangay asi ɓi ngi Yesu Kristu, waɗ sukum ndra Timote matuhukuw ɗerewol hana da ka Filemoŋ, ka ngama ndra muyummo, ndra magam slra bummoˀ,

²yo da mizli ngi Kristuhoy makusom a hay ɗike, da Apiya, sukum ndra mongoso, waɗ da Arsip, cil ndra, ndra macikam vu bummoˀ.

³Anja Cine ndra Buymisemuŋ ati Buy ndra Yesu Kristu a gukum mezle, a vulukum zuy.

⁴Filemoŋ, da ya mira dir dibiɗ gar na, i ra ga sise da Buymisemuŋ ɗu asi ka.

⁵Asi i ra cin maɓaka ɓi ngi ka mawuɗ mitiɓihey ati ka matiɓa Buy Yesu Kristu na.

⁶Anja tiɓi ɗik mujom ati ndra na, a gi slra mezle wãˀ, gimezlehey ndra magaka taŋ gu tisi Kristu na, biga taŋ gar.

⁷Sukum ɗu, wuɗavu ɗik na, a vuliy mumul le, yo a tisliy mevel le haɗi si, asi ka muvula gidaŋ da mitiɓihey na.

⁸Naŋ kine, tisi Kristu na, jiviɗe naŋ baŋ, ɓa i ɓuw ɓi ngi gwat ɓa sey ki ga.

⁹Ya macufuɗuw na, asi ya mawuɗow. Haˀaw, ya midigila Pol, yo wurenna, yi mbur dangay asi Yesu Kristu.

¹⁰I ra tumbuluw vur mangal ɗu Onezim, asi yi tiri le kaɓa cine ar dangay aka.

¹¹Zleˀe na, anta puluw gir ta, amma wurenna, ara pula ndra gir cuw ndra.

¹²I ra slunuw di a muŋ, naŋ kaɓa i tanday ɗu.

¹³I wuɗ le zleˀe, ɓa naŋ da aciki ɗu aka, ar dangay ya mazuma asi Ɓimezle na, ɓa a jiniy ar deɗe ɗike.

¹⁴Amma i ngum gi gwat kanah ko neˀ ta, sey da ka mupuliy jiviɗ le. Y'anta wuɗ tukuw ˀay ɓa ki giy mezle ta, amma anja ki ga kaɓa ka mawuɗo.

¹⁵Asinta, Onezim mupuluw na, ngi hin neˀkini si, ɓa kisa luuma a muŋ, a ndir avu ka wãˀ.

¹⁶Anta ka beke mata, amma naŋ zuwen angi beke: I sukum ɗik misikristu ka mawuɗaŋ. Yi wuɗaŋ haɗa, amma kisa wuɗaŋ haɗi fineˀ ya ma, anta asi i mburo si ta, amma asi i sukum ɗik misi Kristu ma gar.

¹⁷Da ki puriy le kaɓa yi sukum ɗik mitiɓi so na, tiɓaŋ a hay ɗike kaɓa i ya vuna si.

¹⁸Da a guw malambaˀ le zleˀe ɗaˀa, malla ko da duvus ɗik ada ava kwana, kisa cufuɗa avu ya.

¹⁹I ya Pol matuhuw di ani ti haŋ ɗu: I ya masa wurkuw di. Ka kwana, duvus ɗu ada avu ka ya, i hirnga ɗik vuna, y'anta muw hiri nah mata.

²⁰Haˀaw sukum ɗu, ambuh, jiniy ar ɓi hana tisi Bumbulvuŋ. Tisliy mevel asi ndra mujom ati Kristu.

²¹Ɓi ya mutuhuw di hana, i si na le gisiŋ, kisa ga gwat nah. Gisiŋ, kisa ga hã fineˀ ya macufuɗ vuna ma.

²²Yo ma na, ɗiyiy viŋ ngi hin, yi wa na, mbele diradibiɗ kum na, Buymisemuŋ a sa mi ti ya ng'avu kum a muŋ.

²³Epafras mbur dangay, cil ɗu tisi Yesu Kristu na, a juw haŋ le,

²⁴waɗ Mark, Aristark, Demas waɗ Luk, mizli ndra magam slra bummoˀhoy.

²⁵Anja Buy ndra Yesu Kristu a gukum mezle