Read South Giziga HEB 11 Bible Online

HEB 11 - South Giziga bible

HEB 11

¹Tiɓi na, i gwat mbur manjih hiri aseˀeŋ, a tiɓa le i gisiŋ. I gwat migisiŋ mbur mapura ta, amma a si na le, naŋ da gisiŋ.

²Buymisemuŋ mingilwuy ti mizli misi zleˀehey na, asi tiɓi taŋ.

³Buymisemuŋ miga si gazlavay gar ti mingiɓi naŋ, ndra maslaka wala nah, naŋ kanah gisiŋ na, asi tiɓi. Naŋ kine, gwat, mizli mapuraka taŋ gar na, a boko ti vu gwat mizli mapuraka taŋ gu ta.

⁴Abel a ga mikuli mezle da Buymisemuŋ fineˀ ngi Kayẽ na, asi tiɓi. Buymisemuŋ miɓi, Abele, naŋ jeŋŋe, a hĩyã mikuli naŋ migaŋ di na, asi tiɓi. Ko da Abel a muc le tekeɗe kwana, kite ara ɓi ɓi aruŋ na, asi tiɓi.

⁵Buymisemuŋ muzuɓa Henok nga cikeˀe, manja a mucu, ko mbur mulumaŋ, anta mata, asi Buymisemuŋ a zuɓaŋ le tuwa na, asi tiɓi. Asi mike na, Ɓimutoho a ɓi: Dumbuŋ ar muzuɓaka Henoko t'aruŋ na, Buymisemuŋ a hĩyãŋ le.

⁶Dambalaka, da tiɓi anta na, ɓa Buymisemuŋ a hĩyã mburo na, a gi ta. Asi mbur makirih ng'avu Buymisemuŋ na, sey a tiɓa le, Buymisemuŋ naŋ da, yo ara wurka mizli masipakaŋ.

⁷Buymisemuŋ miɓa Nowe ɗaˀ ɗaˀ le, vur gwat masa gi, ko da Nowe anta pura gwat tayna t'aruŋ tekeɗe kwana, amma a ki slimiɗ le ar ɓi nah kuy kuy, a ɗiya palalam ngi laha hirnga naŋ ati ngi mizli ngi hay naŋhaya na, asi tiɓi. Naŋ kine, Nowe a ga kiita le da duniya, joˀ Buymisemuŋ a puraŋ, naŋ jeŋŋe na, asi tiɓi.

⁸Abrahama, Buymisemuŋ mizilaŋ, naŋ micinaŋ mi, aru nga hirwuy Buymisemuŋ miɓi a sa vulaŋ di, yo a cuh, manja a si na li naŋ maru ng'ara vuna na, asi tiɓi.

⁹Abraham a ru, ara cifi moholoy angi hirwuy Buymisemuŋ miɓaŋ di ɗaˀ le tuwa na, asi tiɓi. A cifi ar guɗukoy, naŋ ati Izak waɗ Zakop, mizli mulumam gwat mupurla nah Buymisemuŋ miɓa le ɗaˀ le tuwa.

¹⁰Asi mike na, Abraham a kutuk di i walahay, virzi naŋ muɗuvaka na, naŋ gidaŋ gidaŋ, miwi naŋ ati mindir naŋ, i Buymisemuŋ vuna.

¹¹Sara kwana, vi ngi yi a cuh le ava. Amma a lum gidaŋ ngi yi na, asi tiɓi. Vur a si na le Buymisemuŋ miɓaŋ ɗaˀ le vur gwat na, naŋ teŋteŋ.

¹²Vurˀe, mbur mupurla nah, ko ti naŋ masa muc gweˀ na tekeɗe kwana, a tiri dideˀ ngi zigiduw haɗa teˀe, kaɓa wurzlaŋ ngi muŋhoy, a slufam ta, kaɓa muyuŋ ar mubuliy.

¹³Mizli tayna, a micam pam ti tiɓi taŋ a mevele na si, manja a lumam gwatay Buymisemuŋ miɓi a sa vula taŋ di vuna. Amma a puraka taŋ le, a mumuloko taŋ le deŋ kileŋ. A ɓam: taŋ i mulakay, i moholoyoy a ruwuyo.

¹⁴Asi mizli maɓam kahana na, a bigi le njah wãˀ, a sipam di i hirwuy nga taŋ mijeŋŋe.

¹⁵Yo da a wulkaka hirwuy, taŋ mupuloko di na le zleˀe a muŋ na, anja a mam le nga diga a muŋ.

¹⁶Amma taŋ, a hĩyãm di i hirwuy mimezle da taŋ wãˀ, mbiɗeˀvra: li ngi muŋ. Vurˀe, mesem anta ga Buymisemuŋ asi taŋ mazilakaŋ i Buymisemuŋ taŋ na ta, asi mike na, a ɗiya taŋ walahay madiɗa le.

¹⁷Buymisemuŋ a ci a kwacay Abrahama, a ɓaŋ ɓa a gaŋ mikuli ti Izak. Amma Abraham mujuw vu ngi gaŋ mikuli ti mangal naŋ kirmalay na, asi tiɓi. Na Buymisemuŋ a ɓaŋ le ɗaˀ le vur mangal vuna ngbaŋ.

¹⁸Buymisemuŋ a ɓaŋ zleˀe: «A sa zilam dideˀ ɗik na, tisi Izak.»

¹⁹Amma Abraham a ɓi ti kwacay naŋ na, ko mbur mumuca kwana, Buymisemuŋ a ndila le ngi slikiɗaŋ ti wuzla mumucahaya. Joˀ a luuma mangal naŋ Izak a muŋ, ɓi hana i ɓi miwa weˀ ti wi.

²⁰Izak a ɗuwula mi da Zakop ati Esawa, vur hin ngi mbuŋ na, asi tiɓi.

²¹Zakopo, hirak ti naŋ mawuɗ a muc na, a ɗuwula mi da ziri ngi Zozefeye tiɗeˀe na, asi tiɓi. Joˀ a jih jah ti mejegeɗ naŋ, a tumbulo Buymisemuŋ.

²²Zozefe, ti naŋ migweˀ ngi muco, a ɓa ɓi ngi Israyeley masa bam tisi ruwuy Ezipte le, yo a ɓa taŋ ɗaˀ le vur tesl naŋhaya na, asi tiɓi.

²³Ti taŋ miyaka Moyis na, miyi naŋhay a ɗumokoŋ ɗum, hã kiya makir na, asi tiɓi. Vur a puraka le, mangal taŋ, naŋ kuy, ɓi ngi buy madiɗa ɓi micica na, a zluwunam ngila ɓi nah ta.

²⁴Moyise migi mbur muduba na, ɓa a zilakaŋ «mangal ngi maˀãy, zuŋ ngi buy Faraˀoŋ» na, a ngum ta, asi tiɓi.

²⁵A hiyĩ nga naŋ ɓa a guzuvrakaŋ jom ati mizli ngi Buymisemuŋhoy jaka, mbak mumul ti mungra ngi pas neˀ na le.

²⁶A pura hina hirnga ngi Mesi na, i zlili mifineˀ zlili ngi Ezipte, asi a ro hiri taˀ ar migir ngi mbuŋ.

²⁷Moyis a pula hirwuy Ezipte, manja a zluwun ti buy madiɗa masa zuɓ himaˀ na, asi tiɓi. Dar a cici zlak gidaŋ gidaŋ, kaɓa naŋ da pura Buymisemuŋ, naŋ mapura gu ta na.

²⁸Moyis a cica ɓi ngi muguzlum Paka, yo a ɓa mizli ɗaˀ le, ɓa a puyaka pumbus avu miviŋ ngi hayaya, ɓa modro mingizla vu, a wusa ziri modogom ngi Israyeleye ta na, asi tiɓi.

²⁹Israyeley a tuwuɗaka mubuliy gaza njiraŋ njiraŋ, i li muˀulo na, asi tiɓi. Amma Eziptehey mututumaka ɓa a tuwuɗam aya na, yam a nda taŋ pay.

³⁰Israyeley mugunoko hirnga ngi mohol ngi walahay Zeriko hin tarnaˀ, a dirba nah, mohol a mbizli rip rip na, asi tiɓi.

³¹Mizli macinam mi ta da Buymisemuŋ, Rahaɓ, ngwas sulome, a micam bumoˀ ati taŋ ta na, asi tiɓi. Asi ti di mizli mupura lihey musoko na, naŋ a tiɓa taŋ mulaka le ti zuy.

³²I sa ɓi mbri aruŋ maka? Zedeyoŋ, Barak, Samsoŋ, Zefte, Davit, Samuyel waɗ mijiviɗey gar na, i lum haŋ ngi ɓa ɓi taŋ tiɗeˀe mata.

³³Taŋ na, mbele tiɓi taŋ na, a zumam hirwuyoy le avu buyoy, a gam gwat mijeŋŋe le, gwat Buymisemuŋ miɓa ɗaˀ le na, a puraka, taŋ magama le. A caka taɓak le a mi moboroyo.

³⁴A mucaka gidaŋ ngi vu matiɓi njilim njilime le, a laham le avu ngum ti maslalama. A mbulom le tir jijiheye, taŋ gboŋgboŋ. A bigaka le, taŋ i gambarahay ar vurumo. A ɓulaka soje ngi hirwuy mekelemeye le.

³⁵Ngwas mekelemeye, asi tiɓi taŋ na, a lumaka mizli mumuca taŋhay a muŋ, asi a slikiɗam le ti wuzla mumucahaya. Amma a guzuvuraka mizli mekelemeye, asi taŋ a ngumam laha hirnga taŋ ta, ɓa a sa slikiɗam tir muco ng'ar siifa mimezle naŋ.

³⁶Mekelemeye, mizli a singiram ar taŋ, a sliɗaka taŋ, a juwaka numuŋhoyo ti juw, a paka taŋ ng'ar dangay.

³⁷Mekelemeye ma na, a kuypaka taŋ ti ɗugur, a bukoko taŋ wurasl wurasl. A kiɗaka numuŋhoyo vagay vagay ti maslalam. A lumam cifi ar li purla ta. A kam zana ngi garak ngi tumuŋhoy malla zana mijaka ti ngwic ngi ˀaway. A tiram misi murgahay, a guzuvuraka taŋ, a gaka taŋ bonoy.

³⁸Duniya i gwat mukuy avu taŋ ta. Ar ti laˀam lambaˀ a wuzlaɓuh waɗ a muwãhay. A cifam angi butumoy waɗ angi hurjijiŋhey a ruwuy.

³⁹Buymisemuŋ mingilwuy ti mizli tayna gar na, mbele tiɓi taŋ. Amma a lumam gwat Buymisemuŋ miɓa ɗaˀ le vuna ta ngbaŋ.

⁴⁰Naŋ kine, Buymisemuŋ a juwa le a mevele, a sa vula ndra gwat mimezlehey wãˀ ma, amma gwat tayna ɓa a gam manja ndra na, a ngum kanah ta.