Read South Giziga HEB 12 Bible Online

HEB 12 - South Giziga bible

HEB 12

¹Naŋ kine so, ndra kwana, migi sedewohoy haɗi a gunom ndra hirnga le gun. Gwat ndra majijiraka gar ati mungra maja ndra kutum kutom kutom na, hizigukum taŋ avra. Kulukum mi humbaɗ, i kiɗaka mi ngi pi mi ndra.

²Ɗuvukum hiri taˀ angi Yesu, maga ɓa i tiɓam na, zle avu zli virzi naŋ hã vu kiɗa mi naŋ. A ɓusa le ɓa a dirakaŋ angi dum mizliraŋ, manja mesem. Vur a ɗuva dibiɗ naŋ le taˀ angi mumul, muwakaŋ di vu, yo a cifi le joˀ tir vay hazum ngi janga ngi Buymisemuŋ.

³Naŋ kine, wulkaka Yesu, muɓusa bonoy, mizli migi mungrahay migakaŋ di, ɓi micicam kaŋ kaŋ ng'ar naŋ na, ɓa ki pulaka vukumo mbak, zluwun a hĩhĩyukum kupuyah ta.

⁴Ar cika vukum ati mungra na, ko ki cikam vu gbaˀ avu muco ɗaˀ t'aruŋ.

⁵Ɓi ngi vula gidaŋ, Buymisemuŋ maɓukum di, kaɓa da zir naŋhay na, ki puykoko hirnga naŋ le kwa? A ɓi na: «Mangal ɗu, da Bumbulvuŋ ara kutuw na, ki pura ka ɓi ngi sefel ta. Da ara mbuɗuw hirnga na, ki hĩhĩy ta.

⁶Vur Bumbulvuŋ a kuti di i mbur naŋ mawuɗo, a sliɗ di i mbur gar, naŋ misina le, i mangal naŋ.»

⁷Kum masam bonoy na, ɓa ki sirkam di. Buymisemuŋ a gi ti kum kaɓa zir naŋhay. Naŋ kine, zuŋ, cine makutaŋ ta na, ada kwa?

⁸Da naŋ anta kutukum kaɓa naŋ makuta ziri gar ta na, naɓa kum i ziri miya ngi madamahay, kum i ziri naŋ muyukum gisiŋ ta.

⁹Cine ndra ngi ruwuyoy aka, a kutam ndra le, yo i ɗuvaka taŋ hirnga le. Na Cine ndra misi a muŋ, buy ngi musuɗukoy na, i hinam hirnga a mbuŋ naŋ, ɓa i lumam siifa ta mbri jak ka?

¹⁰Asi mike na, cine ndra ngi ruwuyoy aka, taŋ a kutam ndra ngi hin neˀ si, avu taŋ mupuraka le kuy. Amma Buymisemuŋ a kuta ndra na, vur lum ndra ada ara, ɓa i ndiram ti kpak nga naŋ mipal na ya.

¹¹A haŋhaŋ na, kuti vu gar i ɓi ngi mumul ta, i ɓi ngi ndurɓo hiri. Amma nga mbuŋ so na, mizli misirkam le ti kuti gar na, a sa sinaka, dambalaka i ɓi ngi cifi zuy zuy, yo i ɓi ngi gi gwat mijeŋŋe.

¹²Haŋ kum milaway laway ati poprok kum migalaɓ galaɓay na, cicaka taŋ gidaŋ gidaŋ so.

¹³Sipam jiviɗ micir cir, ɓa jegwer a ngil ta, amma ɓa a ɗiyi jaka.

¹⁴Puram jiviɗ ngi cifi zuy zuy ati mizli gar, cifam kum pal. Da kanah ta na, ko mbur pal masa pura Bumbulvuŋ anta.

¹⁵Jam lesl, anja mbur purla a mbiɗi duba avu gimezle ngi Buymisemuŋ na ta. Anja ko mbur a tiri kaɓa widis miɗalak, magil ngi gi ngaˀa, yo ngi hirya mizli haɗi ti muwuŋ naŋ na ta.

¹⁶Jam lesl, anja mbur a gi sulome ta, a gi lambaˀ ti gwat muvuku vu taŋ na ta, kaɓa Esaw, naŋ modogom na, a hiɗika gi modogom naŋ avra ti ɗaf sikiɗ purla.

¹⁷Ki sinaka le, a dirba nah, a wuɗ ɓa cine a ɗuwulaŋ mi, amma a bakaŋ le avra. Ɓa a mbiɗa gwat naŋ miga na, ko ti naŋ mutumbulo cine ti tuwuy kwana, a gi mata.

¹⁸Muwã, mbur matutuma gu na, kumo, ki kiraham ng'ava ta. I muwã Sinay mitiɓi vu njilim njilim, li titra ati luvuŋ, burkataŋ mihimaˀ,

¹⁹ˀay ngi tulum, yo ˀay ngi mbur a cinawa ti raˀa. Mizli Israyeley micinam ˀay nah na, a ngumam ɓa a cinam mingiɓi naŋ ava mata.

²⁰Asi ɓi miɓa ɗaˀ ani na, a ɓusaka ɓi nah gu ta: «Da mbur malla ko ginew muwusa muwã na le na, a kuypakaŋ ti ɗugur.»

²¹Gwat, taŋ mupuraka nah na, i gwat magi zluwun haɗa wãˀ. Ko Moyis kwana, a ɓi: «Kay, yi zluwun le haɗi wãˀ, hã yi jijiki.»

²²Amma kumo, ki kiraham ng'avu muwã Siyoŋ waɗ ng'avu walahay madiɗa ngi Buymisemuŋ misi ti siifa, Zeruzalem ngi muŋ, modrohoy durmuk mbeˀ mbeˀ ar kus ngi muguzlum a diga.

²³Yo ki kiraham ng'avu kus ngi ziri modogomoy, misi a tohoko slimiɗ taŋhaya le a muŋ, yo ki kiraham ng'avu Buymisemuŋ, migi kiita da mizli gar, waɗ ng'avu musuɗuk ngi mizli mijeŋŋehey mindilaka le kuy kuy wãˀ,

²⁴yo ki kiraham ng'avu Yesu misi ar wala ngi jumoˀay manawaya, waɗ ng'avu pumbus naŋ mipa, pumbus maɓi ɓi fineˀ pumbus ngi Abel ma.

²⁵Jam lesl so, mbur maɓukum na, ki cinakaŋ di, ki slam himaˀ ta. Mizli mislam himaˀ ngi cine mi ngi mbur miɓa taŋ ɗaˀ ɗaˀ le a ruwuy aka, da a laham avu kuti ti bonoyo ta na, ndra, da i ra mbiɗam duba avu mbur maɓo ndra paɗ ti muŋ na, i sa laham ava gu mbri mbri jak ka?

²⁶ˀAy nga naŋ zleˀe na, hã a wusa hirwuyo ngbir ngbir, wurenna a til mi, a ɓi: «I sa wusa hirwuyo is purla ava ma, i hirwuy tewle mata, amma waɗ muŋ ma.»

²⁷Naŋ miɓi: «Is purla ava ma» na, a ɓi di i ɓi ngi gwat migahay, misi mawusam mawusam gar na, a sa susuymom, ɓa masa ndir pal naŋ i gwat mawus ta tewle.

²⁸Gukum sise da Buymisemuŋ so, asi i sa lumam di i Zumabuy misi mbur mawusa gu ta. Dilkukum avu Buymisemuŋ kaslsla ka naŋ mawuɗo, ti hina hirnga, waɗ ti zluwun.

²⁹Vur Buymisemuŋ ndra, i vu mazum gwat nam nam.