Read South Giziga HEB 2 Bible Online

HEB 2 - South Giziga bible

HEB 2

¹Vurˀe, da i wuɗam le ɓa i zizam ta na, sey i kam slimiɗ kuy kuy ar mingiɓi mikaslsla, ndra micinaka na far.

²Asi mingiɓi ngi Buymisemuŋ, modro naŋhay mitilam di mi na, a ga slra naŋ le, yo mbur mingila ɓi nah, micin mi ta gar na, Buymisemuŋ a kutaŋ le weˀe avu malambaˀ naŋ.

³Na, da ndra vuna, i ra gam ti ɓi madiɗa ngi lahavu hana kaɓa ɓi ngi sefel na, i sa laham avu kiita ngi Buymisemuŋ mbri mbrike? I Bumbulvuŋ ti haŋ naŋ vuna mitil mi ti ɓi ngi lahavu hana dumbuŋ. Dar mizli micinaka na kwana, a ɓam ndra ɓi nah kasl kasla.

⁴Yo ma na, Buymisemuŋ a jina ɓi nah le ti gwatay naŋ mibiga taŋ, ti gwat migam ɗaˀtahay, naŋ miga taŋ, ti cekenehey wal wal haɗi, waɗ ti gwat ˀUf Mipal mavula, naŋ mawuɗka da mizli ka naŋ muwuɗu.

⁵Naŋ kine, duniya ngi mbuŋ, ndra maɓaka ɓi naŋ na, Buymisemuŋ muvula na, asi haŋ ngi modro naŋhay ta. Mbur a ga sedewo naŋ ani ar ɗerewol mekelem, a ɓi na:

⁶«Aw Buymisemuŋ, mbur i mi, ɓa hã ki wuluk anga na ka? Malla mbur titra i mi, ɓa hã ki ki slimiɗ anga na ka?

⁷Ki ma mburo le nga ruwuy ngi hin neˀ, avu modrohoyo. Ki tuwuɗaŋ dudok ati gi ɗongoro, ka loppol.

⁸Ki pa gwataya le gar asi sar naŋ.» Buymisemuŋ mipa gwatay gar a mbuŋ naŋ na, ko gwat pal mindir manja a hin hirnga a mbuŋ naŋ na, anta. Na, ndr'anta puraka mburo, i buy ngi gwatay gar vuna t'aruŋ ngbaŋ.

⁹Amma ndra mapurama, i Yesu mima hirnga naŋ nga ruwuy ngi hin neˀ avu modrohoyo, ɓa a si bonoy, a muc vur mizli gar tisi gimezle ngi Buymisemuŋ. Vurˀe, Buymisemuŋ a tuwuɗaŋ gi dudok ati gi ɗongoro le ka loppol.

¹⁰Naŋ kine, Buymisemuŋ miga gwatay gar, yo naŋ majaha taŋ gar na, a zlir le ava ɓa a tiri ti Yesu, a sa bonoy naŋ na, ko gwat makic neˀ anga, anta wãˀ, ɓa aru ti ziri haɗi nga lum dudok naŋ na ya. Asi mabiga taŋ jiviɗ ngi lih, i naŋ.

¹¹Asi mike na, Yesu, naŋ mbur migi mikuli a mbuŋ Buymisemuŋ ati mizli, naŋ muvula taŋ le da Buymisemuŋ vuna na, taŋ gar a boko ti vu Cine purla. Vurˀe, naŋ anta gi mesem ngi zila taŋ sukum naŋhaya ta.

¹²Yo ma na: «Aw Buymisemuŋ, i sa til mi ti ɓi ɗike da sukum ɗuwoyo, waɗ i sa hunumuw a wuzla mizli mukusom le.»

¹³Yo a ɓi ma: «I sa pula vu ɗu mbak wãˀ da Buymisemuŋ.» Waɗ ma na: «Y'ani ati ziri Buymisemuŋ muvuliy taŋ.»

¹⁴Ani so na, ziri, kaɓa Yesu mazila taŋ vuna na, taŋ ti dumvu ati pumbusu. Naŋ vuna kanah ya, naŋ ti kpak ngi vu, rak rak ka taŋ vuna ya. Vurˀe, a muc na, ɓa ngi ziza mbur misi gidaŋ ngi muc asi haŋ naŋ na, mbiɗeˀvra milyam,

¹⁵yo mizli mitiram bekehey asi taŋ mazluwunam ti muc angi hin ngi siifa taŋ gar na, ɓa a tuɓo taŋ.

¹⁶Asi naŋ muso na, ngi jina modrohoy ta, amma ngi jina dideˀ ngi Abrahamay.

¹⁷Vurˀe, sey a tiri rak rak kaɓa sukum naŋhay ar gwat gar, ɓa a tiri masay madiɗa a mbuŋ Buymisemuŋ, mapur ˀircece, miteŋteŋ ar slra naŋ a mbuŋ Buymisemuŋ, ɓa ngi puya mungra ngi mizli avra.

¹⁸Naŋ kine, Yesu a si bonoy le, yo Satan a ci le a kwacay naŋ, wurenna, a ndila le ngi jina mizli masam bonoy ti tikin na ya.