Read South Giziga JAS 1 Bible Online

JAS 1 - South Giziga bible

JAS 1

¹I ya Zak, gawla ngi Buymisemuŋ waɗ ngi Buy ndra Yesu Kristu. I ra jukum haŋ, da kum mizli ngi Buymisemuŋhoy mizliɗam hirnga pal pal asi ruwuy gar.

²Sukum ɗu misikristuhoy, da bonoy wal wal gar mulumukum le ɓa ngi purukum na, tiɓaka kuy kuy ti mevel mezle.

³Ki sinaka le, tiɓi kumo, da kum ada gidaŋ gidaŋ ti naŋ ar bonoy mulumukum le na, kisa ɓusam ɓi.

⁴Amma anja sey ki ɓusam ɓi kuy kuy njah wãˀ, ɓa kisa ndiram manja hereweɗ, jeŋŋe wãˀ, manja gwat a kic neˀ avu kum.

⁵Amma da mbur a wuzla kumo, sinmijileŋ a kicaŋ le na, anja a cufuɗ avu Buymisemuŋ masa vulaŋ di. Asi Buymisemuŋ a vul gwat da mizli gar ti gula ti hazum, manja mbiɗi hirnga.

⁶Amma sey a cufuɗa ti tiɓi, manja wuluk cuw cuw. Asi mbur mawuluk cuw cuw na, a bam vu ati diɓel ngi yam ar mubuliy, himiɗ maslikiɗa jirif jirifi.

⁷Mbur misi kanah na, anja a wa kaɓa a sa lum gwat tivu Bumbulvuŋ ta.

⁸Vur naŋ anta cica wuluko deŋ purla ta. Gwat naŋ maga gar na, a si na ɓa a gi dar, i hana ta.

⁹Anja sukum ndra misi murga a jijih, asi Buymisemuŋ magaŋ ɗongor na.

¹⁰Yo mbur misi zlili kwana, a jijih asi Buymisemuŋ mamaŋ nga ruwuyo. Asi mbur misi zlili, a sa kiɗ mi kaɓa mufuyuk a pala.

¹¹Da pas a jiɗo le, ara zlum ŋcoˀ ŋcoˀ na, a muˀulo kalafa, mufuyuk tuwa a diɗ, kuy naŋ tuwa a susuyum le. Naŋ kanah ya, mbur misi zlili a sa susuyum ar slra naŋ maga gar.

¹²Mbur maɓusa bonoy muso le avu naŋ ngi puraŋ na, a mumul! Asi da naŋ muɓusa le na, a sa lum siifa, Buymisemuŋ miɓa le ɗaˀ le da mizli mawuɗakaŋ na.

¹³Da tikin muso le avu mburo na, ɓa a ɓi: «I Buymisemuŋ matikiniy» na, anja a ɓi kanah ta. Asi Buymisemuŋ anta gi gwat malambaˀa ta, yo anta tikina mburo ta ma.

¹⁴Matikina mburo, i may gwat nga naŋ. A ɗiɗaŋ, a jaŋ kaɓa mazaɓ.

¹⁵Da may gwat a kicuw zingaˀ le na, a yi mungra. Yo da mungra a nih le na, a yi mucu.

¹⁶Sukum ɗuwoy, ya mawuɗokum haɗa, anja mbur a gukum gilaw ta.

¹⁷Gwat ngi vul mupuɗaw puɗaway ati gwat ngi vul ngatara mikaslsla wãˀ gar na, a poko sar paɗ ti muŋ, tivu Buymisemuŋ, buy ngi gwat mupusluɗa lihey. Naŋ, naŋ anta mbiɗi ta, naŋ anta wus ta, yo naŋ anta gi luvuŋ ta.

¹⁸Buymisemuŋ a wuɗ le ti haŋ naŋ, a vula ndra siifa ti mingiɓi naŋ mikaslsla, ɓa i tiram mudumbuŋ dumbuŋ ngi gwatay naŋ miga taŋ gar.

¹⁹Yeme ɗuwoy, anja mbur gar a ndir wirwir ngi cine ɓi, amma anja a wus vu ngi ɓi ɓi ta, yo a zuɓ himaˀ kutum ta.

²⁰Asi da mbur muzuɓ himaˀ le na, anta gi gwat mijeŋŋe a mbuŋ Buymisemuŋ ta.

²¹Vurˀe, kiraham avu ɓi ngi dili ati gi moˀore mifineˀ gidaŋhay gar. Mingiɓi Buymisemuŋ mica a hur kum na, tiɓaka ti hina hirnga. I mingiɓi misi ti gidaŋ ngi luhukum.

²²Ki gam gilaw da vu kum tehhe a muŋ ta. Anja ki cinaka mingiɓi ngi Buymisemuŋ ti cin tew ta, amma gaka gwat naŋ maɓa vuna.

²³Asi mike na, mbur micina mingiɓi ngi Buymisemuŋ le, da naŋ anta ga slra nah ta na, a bam vu ati mbur mapura vu naŋ ar dorogal.

²⁴A dirba naŋ mupura vu naŋ le na, a cuh, a puyuk hirnga ti dumvu naŋ, naŋ mupura tuwa kutum si.

²⁵Amma mbur mapula vu naŋ mbak da ɓimujuwa, ɓi mbur malum di hirnga naŋ, da a ja ɓi nah le gidaŋ gidaŋ, anta cin ti cin tew ɓa a puyuk di hirnga kutum ta, amma ara ga gwat naŋ maɓa vuna na, mbur nah, a sa cin ndum ar gwat naŋ maga gar.

²⁶Da mbur a wa vu naŋ kaɓa naŋ i mbur masipi jiviɗi, manja a ji lejeŋ avu irne naŋ na, a gi di i gilaw da hirnga naŋ vuna tehhe a muŋ. Yo sipi jiviɗ naŋ na, i ngataraŋ.

²⁷Da mbur ara ki slimiɗ ar mutuhuhoy ati wudigahay masam bonoyo, da ara jigina vu naŋ avu duniya, ɓa a ci ar dili ta na, sipi jiviɗ mijeŋŋe manja hereweɗ a mbuŋ Buymisemuŋ, i nah so.