Read South Giziga JAS 2 Bible Online

JAS 2 - South Giziga bible

JAS 2

¹Sukum ɗuwoy, Buy ndra Yesu Kristu misi ti dudoko, ki tiɓakaŋ le, na so na, anja ki winam mizli ti wini ta.

²Kaɓa ani, mbur misi zlili, dangwa ngi ɓiri tapasl tapasl kulaˀ avu muzuŋ haŋ, zana hirnga ɓaˀ avu vu, a co le ng'ar cikil kumo, waɗ mbur misi murga, zana miyaraɓ yaraɓ ɓaˀ avu vu, a cawa ya.

³Dar ki ɗuvaka hirnga da mbur miki zana ngi slimiɗ tuwa, ki ɓakaŋ: «So cifi ar li mezle hana.» Amma ki ɓaka mbur misi murga: «Cici deŋ akẽh», malla ta na, «Cifi a ruwuy asi sar ɗu aka.»

⁴Kite kum vuna, ki winam mizli ti wini takwa? Ki ra gam gwat ti wuluk malambaˀ takwa?

⁵Yeme ɗuwoy, cinam! Misi murga ngir duniya hanayna, i Buymisemuŋ muwuna taŋ, ɓa a tiri ti taŋ misi zlilihey ar tiɓi, yo ɓa a zumam buy, naŋ miɓa le ɗaˀ le da mizli mawuɗakaŋ na.

⁶Amma kumo, ki hirsaka misi murgahaya. Mizli maguzuvrukum na, i misi zlilihey vuna takwa? Yo maɗiɗukum nga mbuŋ migi kiitahay na, i taŋ vuna takwa?

⁷Maɓam ɓi malambaˀ ar slimiɗ mezle Buymisemuŋ mucukum di na, i taŋ takwa?

⁸Ɓimujuwa a ɓi: «Wuɗ mbur cil ɗike, kaɓa ka mawuɗ vu ɗiki.» Da ki ra gam kanah na, naɓa ki gam di i gwat mezle.

⁹Amma da ki ra winam mizli ti wini na, ki gam di i mungra, yo ɓimujuwa ara gukum kiita, asi ki ngilaka ɓi nah le.

¹⁰Naŋ kine, ɓimujuwa na, da mbur a ja le gar a hirnga, amma da a kicaŋ le pal na, kite a ngila ɓi nah le gar.

¹¹Asi miɓi «Ki gi madama ta» na, i Buymisemuŋ mupurla miɓi «Ki kiɗ hirnga ta» na ma. Yo da k'anta gi madama ta, amma ki ra kiɗ hirnga ɓula na, kite ki ra ngila ɓimujuwa vuna.

¹²Ɓam, yo gam kaɓa mizli migaka taŋ kiita le weˀe avu ɓimujuwa, ndra malumam hirnga ndra aseˀe na.

¹³Asi, mbur mapur ˀircece da mizli ta na, Buymisemuŋ a sa gaŋ kiita manja a puraŋ ˀircece. Amma pura ˀircece a pa hirnga da kiita.

¹⁴Sukum ɗuwoy, da mbur a ɓi: «Y'ada i tiɓi,» amma da naŋ anta biga tiɓi nah vuna ti slra ta si na, kite a gi gwat le kwa? Tiɓi misi kanah, a lih vu gu kwa?

¹⁵Da sukum kum mizile malla mongosoŋ, zana anta vu taŋ ta, yo gwat ngi zum ara kica taŋ ndrehhe ma,

¹⁶angi nah na, mbur purla a wuzla kumo, a ɓa taŋ: «A ram zuy zuy so! Kam zana avu vu, yo zumam kuy kuy», manja ki vulaka taŋ gwat ɓa a ngiram ti naŋ vuna si na, mingiɓi kum a gi slra le kwa?

¹⁷Naŋ kanah ya, tiɓi manja slra na, i mumuca le.

¹⁸Amma da mbur a sa ɓi le: «Ka, ka ti tiɓi, ya kwana, i ra gi slra na, i sa mbiɗaŋ di: inga bigiy tiɓi ɗik, manja slra na, yo ya kwana, i sa buguw slra ya maga ti tiɓi na.»

¹⁹Buymisemuŋ naŋ purla, ki tiɓa le takwa? Kuy haɗa! Na, ko setenehey kwana, a tiɓaka le ya, a zluwunam di kir kir ma.

²⁰Mbur manja lesle, tiɓi manja slra, i gwat mupuɗaw ta na, ki si na le takwa?

²¹Buymisemuŋ a pura dideˀ ndra Abrahama, naŋ jeŋŋe a mbuŋ naŋ na, vur mike? Asi gwat naŋ miga, naŋ muvula mangal naŋ Izak ngi gi di mikuli na takwa?

²²Da ki pura le na, tiɓi naŋ, i gwat mujom ati slra naŋ na. I slra naŋ miga na, minaha mi ngi tiɓi naŋ.

²³Yo Ɓimutoho ngi Buymisemuŋ miɓi na, a gi le muduba: «Abraham a tiɓa Buymisemuŋ le, Buymisemuŋ mupuraŋ i mbur mijeŋŋe na aseˀe.» Joˀ Buymisemuŋ a zila Abrahama «Ngama ɗu.»

²⁴Ki puraka takwa, mbur a tiri jeŋŋe, asi slra naŋ, anta asi tiɓi tew ta.

²⁵Naŋ kanah ya, Rahap, ngwas sulome, a tiɓa mislin ngi Israyeleye, a biga taŋ jiviɗ mekelem ɓa a lahama. Naŋ mitiri jeŋŋe na vurˀe takwa?

²⁶Naŋ kine, dumvu manja musuɗuk na, i mumucaŋ. Naŋ kanah ma, tiɓi manja slra na, kite i mumucaŋ.