Read South Giziga JAS 5 Bible Online

JAS 5 - South Giziga bible

JAS 5

¹Kum misi zlilihey, cinam: tuwam ˀirslik ˀirslik asi bonoy ara kutukukum.

²Zlili kumoy a zãˀãm le. Tiler a zuma zana kumoyo le.

³Ɓiri tapasl tapasl ati ɓiri bara kumoy a nduvam le. Taŋ munduvam na, a sa gaka sedewo ngi gwat malambaˀ kum magaka na, yo a sa zuma useˀ ngi vu dumvu kumo kaɓa vu. Angi hin ngi dirba muwãˀ na, ki cikilam zlili le haɗi.

⁴Puraka ɗi, migi slrahay mugukum sifi ngi gwat ngir guva kumoyo, ki wurkaka taŋ ta. Cinaka, taŋ mawudam, hã widi taŋ a ndil gbaˀ a slimiɗ Bumbulvuŋ Buymisemuŋ, misi gidaŋ wãˀ.

⁵Ar siifa kum a ruwuyo, kum ar wuya, ki ra lumam gwat macirukum hiri, ki zlumbram le ka ginewey vur hin ngi sliˀay taŋ.

⁶Mbur mijeŋŋe na, ki gakaŋ kiita le, ki kiɗaka le vagay. A sli himaˀ avu kumo ta.

⁷Sukum ɗu misikristuhoy, ɓusam ɓi, hã avu so ngi Bumbulvuŋ. Puraka, mbur muhuf maɓus ɓi, hã guva a gi na, a kutuko zle avu vuŋ munduvun hã avu vuŋ ngi dirba wãˀ.

⁸Kumo kwana, ɓusam ɓi. Tumom vu a mevel kumo, asi Bumbulvuŋ ara so gweˀ.

⁹Sukum ɗuwoy, anja ki curɓom ar cil kumoyo ta, ɓa Bumbulvuŋ a gukum kiita ta. Migi kiita, n'ani deŋ a miviŋ kum.

¹⁰Sukum ɗuwoy, wulkaka ɓi ngi mijiviɗey miɓam ɓi ti slimiɗ ngi Bumbulvuŋ na, a sam bonoy le, a ɓusaka le. Kumo, sipaka sar taŋ.

¹¹Mizli ɓi micicam zlak gidaŋ gidaŋ ar bonoy taŋ na, puraka, i ra ngilam wuy ti taŋ. Jopo kwana, a ɓusa bonoyo le, ki cinaka ɓi nah le takwa? Yo gwat Bumbulvuŋ migaŋ di ar kiɗa mi naŋ na, ki sinaka le takwa? Asi Bumbulvuŋ, naŋ ti mevel mezleŋ, yo a pur ˀircece haɗa.

¹²Sukum ɗuwoy, ar gwat gar na, ki hudumom ta, ko ti birngiŋ ngi muŋ, ko ti hirwuy, malla ko ti gwat wanaka gar na, ki hudumom ta. Da ki ɓam le: «hĩ» na, i «hĩ» gisiŋ, da «aˀa» na, i «aˀa» gisiŋ, ɓa Buymisemuŋ a gukum kiita ta.

¹³Mbur masi bonoy ada a wuzla kumo kwa? Anja a dir dibiɗ. Da ara mumul na, anja a hunuma Buymisemuŋ ti dimisi.

¹⁴Mbur muguta ada a wuzla kumo kwa? Anja a zilo micawwa ngir cikil ngi misikristuhoy, ɓa a dirba taŋ mupuyakaŋ mal le a midibiɗ ti slimiɗ ngi Bumbulvuŋ na, a diram dibiɗi.

¹⁵Diradibiɗ jom ti tiɓi na, a laha mbur misi jiji. Bumbulvuŋ a sa vulaŋ zuy, yo mungra, naŋ miga taŋ gar na, a sa puyaŋ taŋ avra.

¹⁶Da ki wuɗam le ɓa ki mbulom na, anja mbur gar a njika mungra naŋ da cala, yo mbur gar a dir dibiɗ vur cala. Diradibiɗ ngi mbur mijeŋŋe na, naŋ ti gidaŋ haɗi.

¹⁷Eli, i mbur kaɓa ndra vuna zleˀe ya, a dir dibiɗ ti mevele wãˀ ɓa vuŋ a gi ta. Dar vuŋ a gi a ruwuyo ta, hã vi makir ti reta.

¹⁸A dirba nah, a dir dibiɗ a muŋ ma. Dar vuŋ a gawa, gwatay a gam a ruwuy a muŋ.

¹⁹Sukum ɗuwoy, da mbur pal a wuzla kum a zizi le kileŋ avu ɓi mikaslsla ngi Buymisemuŋ, yo da mbur a mo di le a muŋ na,

²⁰sinaka sin le, mbur mamo ti mbur magi mungra baɗ tir jiviɗ naŋ malambaˀ na, a sa laha hutuŋ ngi mbur magi mungra nah, yo Buymisemuŋ a sa puyaŋ mungra naŋhay mihaɗa na avra.