Read South Giziga 1PE 1 Bible Online

1PE 1 - South Giziga bible

1PE 1

¹I ya Piyer, mislin ngi Yesu Kristu, matuhukum ɗerewol hana da kum mizli, Buymisemuŋ muwunukum, kum micifam i mulakay, mizliɗam hirnga pal pal angi hirwuy Poŋ, Galat, Kapados, Azi waɗ angi hirwuy Bitini.

²Cine ndra Buymisemuŋ muwunukum kaɓa naŋ miɗiya jiviɗ naŋ zleˀe si na, tisi ˀUf Mipal, ɓa ki cinaka mi da Yesu Kristu, yo ɓa pumbus naŋ a bunukum. Anja Buymisemuŋ a gukum mezle, a vulukum zuy haɗa haɗa.

³Hunumukum Buymisemuŋ, Cine ngi Buy ndra Yesu Kristu. Ar pura ˀircece naŋ mihaɗi na, a ya ndra le sar mucuw naŋ ma ti naŋ mislikiɗa Yesu Kristu ti wuzla mumucahay na, ɓa njaha hiri ndra ar gwat mezlehey, naŋ masa vula ndra taŋ na, a muc ta,

⁴ɓa i sa lumam gwat mezle Buymisemuŋ miwi di vu vur mizli naŋhay na. I gwat mahiryi ta, a jup ta, wucuɗ naŋ a susuyum ta wãˀ, Buymisemuŋ a wi di vu le weˀ a muŋ

⁵da kum, gidaŋ ngi Buymisemuŋ majiginukum tisi tiɓi kum, ɓa kisa lumam lih migweˀ masa njiko vu angi kiɗa mi ngi hin na.

⁶Anja da ko ki ra ndurɓom hiri ngi hin neˀ ti bonoy wal wal maso ngi purukum na tekeɗe kwana, kum mumulom haɗa na si.

⁷Ɓiri tapasl tapasla, a puraka le angi vu ngbaŋ ni. Gar ti nah kwana, anta ndir caˀa ta. Naŋ kanah ya, tiɓi kumo, naŋ puɗaw haɗa, a funa le, amma a puraka le ya, ɓa ngi si na puɗaw naŋ vuna. Vurˀe, tapas Yesu Kristu masa bugo vu na, kisa lumam hunum, dudok waɗ ɗuva hirnga asi tiɓi kum na ya.

⁸Yesu Kristu, ko da ki purakaŋ ɗaˀ ta tekeɗe kwana, ki ra wuɗakaŋ. Kum anta purakaŋ t'aruŋ, amma ki ra tiɓakaŋ. Vurˀe, ki ra mumulom ti mumul mududok haɗa wãˀ, a funa ngi ɓi avu mi le.

⁹Mumul nah na, ki lumaka asi ki laham le. Hana i migir ngi kum asi kum matiɓaka Yesu Kristu.

¹⁰Asi ɓi ngi lih hana na, mijiviɗey a puraka ɓi nah le, a wunjilaka le kuy kuy, yo a ɓaka ɓi ngi gwat Buymisemuuŋ minjika taŋ di vur ɓi ngi gi mezle, naŋ muwukum di vu na le.

¹¹Gwat ˀUf ngi Kristu mibiga taŋ di, misi avu taŋ na, a sipaka ɓa a sinaka hin naŋ ati li naŋ. Asi ˀUf Mipal a njika le daf dumbuŋ, bonoy ara kutuko Kristu, yo a dirba nah na, a sa lum dudoko.

¹²Mijiviɗeye, ɓi taŋ matilam di mi, Buymisemuŋ minjika taŋ di na, vur taŋ tehhe a muŋ ta, amma vur kum. Wurenna mizli matilam mi ti Ɓimezle na, a tulukum di le muduba ti gidaŋ ngi ˀUf Mipal muso paɗ ti muŋ. Yo ko modro ngi Buymisemuŋhoy kwana, a wuɗam sli wala naŋ le ya.

¹³Vurˀe, sey ki juwam vu ar lesl kumo ngi gi slra. Ndiram hiri ɗeŋ ɗeŋ, anja ki njaham hiri kuy kuy ar gwat mezle, Buymisemuŋ masa vulukum di tapas Yesu Kristu masa bugo vu na.

¹⁴Cinaka mi da Buymisemuŋ. Anja ki sipam gwat vu kum mahĩyã kaɓa kum migam tir manja sin naŋ zleˀe na mata.

¹⁵Amma Buymisemuŋ muzulukumo, naŋ pal, kumo kwana, ar gwat kum magaka gar na, tiram pal aya.

¹⁶Asi Ɓimutoho a ɓi na: «Ndiram pal, asi ya, ya pal.»

¹⁷Buymisemuŋ maga kiita da mizli gar ti jiviɗ mupurla, weˀe avu gwat ngi gi taŋ na, da kum mira diram dibiɗe, ki ra zilakaŋ, Cine kum na, ɗuvakaŋ hirnga ar gwat ngi gi kum gar angi hin ngi siifa kum mindir a ruwuy aka.

¹⁸Ki sinaka le, Buymisemuŋ mumbuɗo hirnga kum tir gi gwat malambaˀ kum mulumoko di avu dideˀ kumoy na, a vul di i ɓiri bara malla ɓiri tapasl tapasl, gwat ngi ruwuy mahiryamay na ta.

¹⁹Amma a mbuɗo hirnga kumo ti pumbus hirnga wãˀ ngi Yesu Kristu, mitiri kaɓa tumuŋ manja malambaˀ ava, manja hereweɗ ava na.

²⁰Buymisemuŋ, ti naŋ miga duniya taruŋ na, a wina Kristu le dumbuŋ si. Angi kiɗa mi ngi hin ngi dirba hanayna, a biga le njoy wãˀ vur kumo.

²¹Kum matiɓaka Buymisemuŋ na, mbele naŋ, naŋ mislikiɗaŋ ti wuzla mumucahay, yo muvulaŋ dudok, hã tiɓi kum ati njaha hiri kum, a cici angi Buymisemuŋ.

²²Kum magaka gwat, ɓi mikaslsla maɓa na, kite ki ɗiyaka musuɗuk ngi vu kumoyo le, ɓa ki wuɗam sukum kumoyo ti kwacay cuw cuw ta. Hurdumom ngi wuɗavu ar wala kumo ti mevel purla so.

²³Asi mike na, a yukum le sar mucuw naŋ a muŋ ma ti mingiɓi ngi Buymisemuŋ mamuc ta, misi ti siifa mindrehhe hã ngi set na.

²⁴A tohoko na: «Mizli gar, taŋ kaɓa kalafay, dudok taŋ gar kwana, naŋ kaɓa mufuyuk ngi gwatay. Kalafa, a muˀul, joˀ mufuyuk naŋ a diɗi.

²⁵Amma mingiɓi ngi Bumbulvuŋ a ndir hã ngi samadin.» Dambalaka mingiɓi nah na, i Ɓimezle mutulukum di mi na.