Read South Giziga 1PE 2 Bible Online

1PE 2 - South Giziga bible

1PE 2

¹Vurˀe, moˀore gar, wer malambaˀ, ɓi mi cuw cuw, may gwat waɗ kuw gar na, pulaka taŋ avra so.

²Ziri gazahay mawuɗam ɗuwa ndrehhe na, kumo kwana, wuɗam mingiɓi ngi Buymisemuŋ, ɗuwa mikaslsla na, ɓa ki gilam, ki laham ti naŋ.

³Ɓimutoho a ɓi na: «Bumbulvuŋ ndra i mezle, ki titilaka le.»

⁴Kirohoko ng'avu Buy Yesu, naŋ i ɗugur misi titiri, mizli mihizigaka avra na. Amma Buymisemuŋ, a winaŋ le, i ɗugur hirnga wãˀ.

⁵Kumo kwana, kirohoko, kum i ɗugur misi titirihey, ɓa a ndiram ti kum hay ngi ˀUf Mipal, ɓa ki tiram mijiviɗey, ngi gaŋ mikuli maciraŋ hiri tisi Yesu Kristu.

⁶Vur Ɓimutoho a ɓi na: «Ani, i ra ki ɗugur da mizli a Siyoŋ. I ɗugur muwuna le, yo mupuɗaw wãˀ. Mbur mitiɓa le na, anta sa pi mesem ta wãˀ.»

⁷Ɗugur hana, i ɗugur mupuɗaw wãˀ avu kum mizli mitiɓiheye, amma avu mizli mitiɓihey ta na, «Ɗugur, mindira hayay mihizigaka avra na, mitiri ɗugur hirnga, i naŋ.»

⁸Yo a tohoko na: «I ɗugur ngi bi sar da mizli, mandazlay muwãˀ ngi hizigiɗa vu.» A ba taŋ sar, asi t'anta ngumam tiɓa ɓi ngi Buymisemuŋ ta. Vurˀe Buymisemuŋ a zuwula taŋ ng'ara.

⁹Amma kum i sukwi Buymisemuŋ muwunu kum le. Kum i masay madiɗa ngi Buy madiɗa, sukwi ngi Buymisemuŋ, kum i mi nga naŋhay wãˀ. Buymisemuŋ muzulukum tir luvuŋ ɓa ki cam ng'ar li minjahha naŋ, misi ɓi naŋ a ɓi ta na, ɓa ki tilam mi ti ɓi ngi gi gwat madiɗahay, naŋ miga taŋ na.

¹⁰Zleˀe na, kum i mizli naŋhay ta, amma dana, kum i mizli naŋhay. Zleˀe na, Buymisemuŋ a purukum ˀircece ta, amma dana, a purukum ˀircece le.

¹¹Yeme ɗuwoy, kum i mulakay, kum i mizli mizliɗam hirnga le pal pal asi ruwuyo. Ambuh ambuh kum so, jiginaka vu kum avu may gwat ngi vu kum magi vurum ti musuɗuk kum na.

¹²Sey ki cifam ti gi gwat mezle a wuzla mizli ngi duniyahaya, da ko ara kupukum ɓi, a ɓukum, kum i migi malambaˀhay tekeɗe kwana, tapas Buymisemuŋ masa so na, ɓa a sa puraka gi gwat kum mezle tuwa, yo a sa hunumaka Buymisemuŋ.

¹³Hinam hirnga a mbuŋ mizli madiɗa ngi duniyahaya asi Buymisemuŋ. Hinam hirnga a mbuŋ buy mimadiɗa, asi i naŋ mufuna buyoy gar.

¹⁴Hinam hirnga a mbuŋ buy miwi lihey, i mizli, buy madiɗa mislina taŋ, ɓa ngi kuta mizli magam gwat malambaˀhay, yo ɓa a ɗuvaka hirnga da mizli migi gwat mezleheye.

¹⁵Asi gwat Buymisemuŋ mawuɗo, n'anihĩ: mizli manja lesley magam tir manja sin na, gucoko taŋ mi ti gimezle kum na.

¹⁶Gam ka mizli diimuhoy, na so na, anja diimu kum na, ki tiram di kaɓa i gwat ngi ɗumo moˀore kum ta, amma, gam ka kum i migi slra ngi Buymisemuŋhoy.

¹⁷Ɗuvaka hirnga da mizli gar. Wuɗam sukum kum mitiɓiheye. Zluwunam ti Buymisemuŋ. Ɗuvaka hirnga da buy mimadiɗa.

¹⁸Kum migi slrahay, hinam hirnga a mbuŋ buy kumoyo ti cine taŋ mi kuy kuy wãˀ. Anta da buy kum mezlehey ati miteˀ teˀhey tew ta, amma ko da mukuwahaya ma.

¹⁹Asi bonoy, kum masaka ngatara lambaˀ kine, kum maɓusaka asi Buymisemuŋ na, i gwat mezle.

²⁰Naŋ kine, da taŋ makuɗukum asi kum migam gwat malambaˀa, ki ra ɓusaka na, a sa pulukum gir ngi mike? Amma da ki ra ɓusaka bonoyo, asi kum migam mezle na, naɓa i gwat mukuy a mihiri ngi Buymisemuŋ.

²¹Buymisemuŋ muzulukum na vurˀe. Asi mike na, Kristu a si bonoy le vur kum, a bugukum di i jiviɗ ɓa ki sipaka sar naŋ ya.

²²Naŋ a gi mungra ɗaˀ ta. Mbur a cin ɓi ngi gi gilaw da mbur ɗaˀ ti balam naŋ ta.

²³Mizli mizakaŋ na, naŋ a za taŋ ta. Ar si bonoy naŋ na kwana, a buc mbur ta. Amma a pula vu naŋ da Buymisemuŋ migi kiita mijeŋŋe.

²⁴Kristu ti haŋ naŋ, a zuɓa mungra ndraˀahaya le avu dumvu naŋ, angi dum mizliraŋ, ɓa i micam avu mungra ndraˀahaya, yo ɓa i cifam ti gi gwat mijeŋŋe. Kum mumbulom na, asi waˀa naŋhay na.

²⁵Asi kum zleˀe ka tumuŋ mizizahay, amma wurenna, ki moko le ng'avi mijigin mukutuko musuɗuk kumoyo.