Read South Giziga 1PE 4 Bible Online

1PE 4 - South Giziga bible

1PE 4

¹Ani, ki sinaka le, Kristu a si bonoy le ar dumvu naŋ. Kumo kwana, juwam vu ngi si bonoy ti wuluk mupurla kaɓa nah ya. Mbur misi bonoy le ar dumvu naŋ na, a wunkam le ati mungra wãˀ,

²ɓa zle wurenna, hin mindir ar siifa kum a ruwuy na, ki gam di i gwat Buymisemuŋ mawuɗ muduba, amma gwat dumvu ngi mbur mawuɗ mata.

³Naŋ kine, gwat, mizli duniyahay mawuɗam gi naŋ na, ki gaka le, muk muduba. Zleˀe, ki gam sulome, ki hĩyãm gwatay, ki wam ti mbaazla, ki zumam fineˀ gidaŋ, ki gam dungur ngi mbaazla haɗa, ki dilkam huruk huruk mukuy ta wãˀ a mbuŋ kulihey.

⁴Wurenna, ɓi kum a zuma hirnga le da mizli duniyahaya, asi a puraka na, kum anta jumom ati taŋ ɓa ngi gi sulome mumbak le ta tuwa mata. Joˀ a zukum vurˀe.

⁵Amma gwat, taŋ magaka gar na, a sa slufaka a mbuŋ Buymisemuŋ, migweˀ ngi ga kiita da mizli misi ti siifahay ati mumucahaya.

⁶Vurˀe, a tilam mi le ti Ɓimezle le da mizli mumucahaya, da ko a gaka taŋ kiita le ar dumvu taŋ, kaɓa magaka da mizli gar na kwana, ˀUf Mipal na, a vula taŋ gidaŋ ɓa a gam gwat Buymisemuŋ mawuɗo.

⁷Gwatay gar a sa kiɗam mi gweˀe. Ndiram ti sinmijileŋ, gam gwat weˀe ɓa ki diram dibiɗ gu.

⁸Dumbuŋ na, hurdumom ti wuɗavu ar wala kumo, asi wuɗavu na, a susuyum mungrahay haɗa.

⁹Tuɓam mulak ar wala kumo, manja sisikaˀay.

¹⁰Anja ko wa gar, mulum gwat Buymisemuŋ muvulaŋ di wal na le na, a gi di slra ngi jina mizli mekelemey, kaɓa mizli mezle migi slra ti gwat Buymisemuŋ mavula taŋ walwal na.

¹¹Da mbur a ɓi di i ɓi na, sey a til mi ti ɓi ngi Buymisemuŋ. Da mbur a gi di i slra na, sey a ga ti gidaŋ Buymisemuŋ muvulaŋ di, ɓa mizli a hunumaka Buymisemuŋ kuy kuy wãˀ tisi Yesu Kristu, misi ti dudok waɗ gidaŋ hã ngi set ngi samadin! Amin.

¹²Yeme ɗuwoy, da kum mira sam bonoy mutuwaˀ kaɓa bonoy ngir vu na, anja a zumukum hirnga kaɓa i gwat ɓa a gi avu kumo zleˀe kanah ta na ta.

¹³Amma, da kum mira sam bonoy ka ngi Kristu misa na ya na, kum mumulom, ti naŋ masa njiko dudok naŋ na, ɓa kumo kwana, kisa mumulom ti zluzluɓ haɗa wãˀ.

¹⁴Da ara zukum asi slimiɗ ngi Kristu na, kum mumulom, asi ˀUf ngi Buymisemuŋ, misi ti dudoko, a cifi le a hur kumo.

¹⁵Anja mbur pal a wuzla kumo, a si bonoy asi naŋ mikiɗ hirnga le ta, asi naŋ muhul malla asi naŋ migi malambaˀ le ta, malla ko asi naŋ maci ar ɓi micaŋ ta ta.

¹⁶Amma da a si bonoyo vur naŋ i misikristu na, anja a gi mesem ta. Zuwen naŋ maga sise da Buymisemuŋ jaka, asi taŋ mucakaŋ slimiɗ ngi Kristu na.

¹⁷Asi mike na, i zli hin ngi gi kiita, ɓa Buymisemuŋ a zla gi naŋ tivu mizli naŋhay ɗagay. Ani, da a zla le avu ndra na, mizli mangumam tiɓa Ɓimezle ngi Buymisemuŋ ta na, kiita nga taŋ a sa kiɗ mi mbrike?

¹⁸Yo Ɓimutoho a ɓi na: «Da mbur mijeŋŋe a lih ti tuwaˀ tuwaˀ na, mizli mizirɗa mihey ati magam mungraˀahaya, nga taŋ a sa gi mbrike?»

¹⁹Naŋ kine, mizli masam bonoy ka Buymisemuŋ muwuɗ na, anja a gam gwat mezle ti pula vu taŋ mbak da Buy miteŋteŋ miga gwataya.