Read South Giziga 1PE 5 Bible Online

1PE 5 - South Giziga bible

1PE 5

¹I ra ga ambuh ambuh da mizli micawwahay misi a wuzla kumoyo, yi mbur micawwa ka taŋ vuna ya. Yi migi sedewo ngi bonoy ngi Kristu, yo dudok, Buymisemuŋ masa bugo di na, i sa lum aya.

²Jiginaka ginew ngi Buymisemuŋ mupula taŋ asi haŋ kum na. Anta ti tikaˀay ta, amma asi ki ngumam le kaɓa Buymisemuŋ mawuɗo.

³Ki zumam buy ar mizli Buymisemuŋ mupula taŋ asi haŋ kum na ta, amma tiram mizli mezlehey, ɓa a sipaka sar kumo.

⁴Yo da Kristu, Mijigin madiɗa, misa njiko vu le ngbah na, kisa lumam loppol ngi dudok misi wucuɗ naŋ makiɗ mi ta wãˀ na.

⁵Naŋ kanah ya, kum gawlahay, hinam hirnga a mbuŋ mizli micawwahaya. Ar jumoˀay kum gar ar wala kum na, kaka hina hirnga ɓaˀ avu vu ka zana, asi a tohoko na: «Buymisemuŋ a cici kaŋ kaŋ avu mizli mahuhumom vu hoyo, amma a ga mezle da mizli mahinam hirnga a mbuŋ naŋ.»

⁶Hinam hirnga asi haŋ ngi Buymisemuŋ misi ti gidaŋ na so, ɓa a sa gukum ɗongor angi hin naŋ muɗuva.

⁷Da ki ra likam na, pulaka ɓi naŋ gar da Buymisemuŋ, asi naŋ ara ki slimiɗ ar kum.

⁸Jiginaka vu kumo, ki hinjam ta! Satan, mesene kum, ara mbiɗi gun hirnga kumo, ara tuwuy kaɓa mobor maru ti pura mbur ngi humbuɗu.

⁹Cicam gidaŋ gidaŋ ar tiɓi kum na, slam himaˀ avu Satana. Sinaka sin le, sukum kumoy ar duniya, ara sam bonoy misi purla ka ngi kum na ya.

¹⁰Amma a dirba kum musam bonoy le ngi hin neˀ na, Buymisemuŋ magi mezle gar, muzulukum ɓa ki lumam dudok naŋ, dudok misi hã ngi sete, ar kum mujom ati Kristu na, naŋ ti haŋ naŋ, a sa ɗiyukum ar li kumo, a sa cucukum zlak, a sa tiri ti kum gidaŋ gidaŋ, yo a sa cucukum, ko gwat makiruhukum anta wãˀ.

¹¹Gidaŋ ngi zumabuy inga naŋ hã ngi set, ngi samadin! Amin.

¹²Mingiɓi mineˀ hana, mijiniy ar tuh naŋ i Silas, ya mupura i sukum ɗu miteŋteŋ na, ɓa a vulukum gidaŋ, yo ɓa ki sinaka njah wãˀ, kum angi gimezle ngi Buymisemuŋ gisiŋ gisiŋ wãˀa.

¹³Mizli ngi Kristu ngi Babiloŋhoy, Buymisemuŋ muwuna taŋ, waɗ mangal ɗu Marke, a jukum haŋ le.

¹⁴Jam haŋ ar wala kumo ti ji vu kuɓuy kuɓuy ngi sukumuŋ misikristuhoy. Anja kum mujom ati Kristu gar na, ki ndiram zuy zuy.