Read South Giziga 2PE 2 Bible Online

2PE 2 - South Giziga bible

2PE 2

¹Zleˀe na, mijiviɗ misi slirey ada a wuzla mizli Israyeleye. Naŋ kine ya, mizli madubuna gwat ti slirey da mizli, ada sa boko a wuzla kum aya. A sa coko dubuna ɓi ngi ziza vu, hã a sa jam mi, a ɓam: a sinaka Buy mumbuɗo hirnga taŋ na ta. A sa soko ti zizi nga hirnga taŋ kutum si.

²Mizli haɗa a sa sipaka taŋ ar gi sulome taŋ na, vurˀe jiviɗ mikaslsla ngi sipi, mizli a sa zizaka asi taŋ.

³Mizli mudubuna ɓi ngi slir tayna, ti may dala taŋ na, a sa zumukum ti mingiɓi taŋ mukoloŋ koloŋ ngi gi gilaw da mbur na. Taŋ na, migi kiita taŋ a wi vu le weˀ zlezle si, yo mizizi taŋ anta hinje ta.

⁴Asi Buymisemuŋ naŋhay migam mungra na, a pula taŋ manja zuma dangay ta. Amma a zliɗa taŋ le ng'ar luvuŋ titra, ar heleleŋ mijileŋ a ruwuy. A wi taŋ vu le weˀ vur hin ngi kiita.

⁵Ko duniya misi zleˀe kwana, Buymisemuŋ a pulaŋ, manja gi kiita ta ya. A sluno mekepel madiɗa ngi ziza mizli migi mungraˀahaya. Amma Nowe, mbur mitil mi ti ɓi ngi gi jeŋŋe na, a lahaŋ le, waɗ mizli mekelemey tarnaˀa.

⁶Waɗ ma na, Buymisemuŋ a ga kiita da walahay Sodom ati Gomoro, a zlizlira taŋ le kap, ɓa mizli mazirɗa mihey na, a biga taŋ di i gwat masa ndilo avu taŋ tumbuŋ.

⁷Amma a laha Lot, mbur mijeŋŋe le. Gwat ngi gi malambaˀ mukuyta wãˀ ngi sulome tayna, a giraŋ le kupuyah wãˀ.

⁸Asi naŋ, mbur mijeŋŋe na, a cifi le a wuzla taŋ. Gwat ngi ji mevel, taŋ magaka, Lot mapura ati naŋ macina vur hin gar na, ɓi naŋ a giraŋ a mevele mezle tuwa.

⁹Naŋ kine, mizli mikaslslahay na, Bumbulvuŋ a laha taŋ tir bonoy taŋ gu, yo mizli migi gwat mijeŋŋehey ta na kwana, a wi taŋ vu ngi sa ga taŋ bonoy, tapas naŋ masa ga taŋ kiita.

¹⁰Wãˀ naŋ na, Buymisemuŋ a sa kuti di i mizli masipam gwat ngi dili dumvu taŋ makwuɗ, waɗ mapuraka dudok ngi Buymisemuŋ khiris le na. Mizli tayna, a puraka kaɓa taŋ muk si, a huhumom vu taŋ. Tˀanta zluwunam ngi za gwat misi ti dudok ngi muŋhoyo ta.

¹¹Na modrohoy vuna, taŋ gidaŋ, i guromoy fineˀ taŋ ngbaŋ, amma t'anta zaka taŋ a mbuŋ Bumbulvuŋ ta.

¹²Amma mizli tayna, taŋ kaɓa gwat misããmi manja lesley, mihĩˀĩ ngi ji ti ngamngamay ati ngi kiɗ vagay vagay na si na, a zam di i gwat taŋ misina ka ta A sa zãˀãm hirɓislik hirɓislik ka gwat misããmihey mazãˀãm na ya.

¹³Naŋ kanah, a sa gaka sifi ngi gwat ngi gi taŋ mijeŋ ta na. A hĩyãka hizigiɗa mbur ng'ar mungra papas papasa si. Da t'ada akẽh, ar li zuma gwat ngi muguzlum ati kum na, slir taŋ magaka na, a gi vu kuyta wãˀ kaɓa gwat ngi dili ati gwat ngir kitikil.

¹⁴Pura hiri taŋ, i pura hiri ngi gi madama. Gi mungra anta ɓula taŋ mi ta wãˀ. A pam mazaɓ a mbuŋ mizli hĩhĩyahay. I bugawla ngi may zlilihey, nis ngi Buymisemuŋ naŋ da avu taŋ.

¹⁵A pulaka jiviɗ mezle le, a sipam jiviɗ ngi Balaˀam, mangal ngi Bosor. Balaˀam i mbur muwuɗ luuma dala ti gi gwat mijeŋ ta.

¹⁶Amma a mbiɗakaŋ hirnga le asi naŋ mingila ɓi ngi Buymisemuŋ na. Zungu maɓi ɓi gu ta, a ɓi ti ˀay ka ngi mburu, a tika gi gwat migilaw gilaw ngi mijiviɗ na le [1].

¹⁷Mizli tayna, taŋ ka vigiɗ ngi yam munjololoŋ kine, taŋ ka gazlavay, burkataŋ makil di sikikiki lambaˀ. Buymisemuŋ a wa taŋ vu le ti luvuŋ mititim titim.

¹⁸A ɓam ɓi ngi huhumvu, mingiɓi migilaw gilaw. Mizli mulohoko wureˀ aruŋ, ti wuzla mizli misi ar malambaˀ na ma na, a wuɗam ji taŋ ti may gwat ngi dumvu taŋ magi mesem na.

¹⁹A ɓaka mizli tayna, a sa lumaka hirnga taŋ, dambalaka taŋ vuna, i beke ngi gwat maziza taŋ. Asi mbur gar na, i beke ngi gwat mufuna gidaŋ le.

²⁰Asi mike na, mizli muɗuɗoko vu taŋ le tir dili ngi duniya, asi taŋ misinaka milih ndra Buy Yesu Kristu na, da ara pulaka vu taŋ mbak da dili ngi duniya a sirta taŋ, yo a wa taŋ a muŋ na, naɓa joˀ taŋ a sa tiri malambaˀ wãˀ fineˀ mudumbuŋ ma.

²¹Ar taŋ mambiɗam duba avu ɓimuɗuva mipal, miɓaka taŋ di, taŋ misinaka na, anja zuwen taŋ misinaka jiviɗ mijeŋŋe sin le zleˀe ta.

²²A gi le kaslsla kaɓa mizli maɓam: «Kiri a mbiɗi hiri le ng'ar vunuh naŋ a muŋ», yo ma na: «Fedem mubun wureˀe, ara putukul ar ndileɓ a muŋ ma.»