Read South Giziga 1JN 1 Bible Online

1JN 1 - South Giziga bible

1JN 1

¹Ndr'i ra tuhukum ɓi vur mingiɓi mavul siifa. N'ada zle ti gwatay gar muɗuvam virzi na. I cinaka le, i puraka le ti hiri ndra. I singilaka le singal singal, yo i tutumaka le ti haŋ ndraˀahaya.

²Asi siifa nah na, a bugo vu le, i puraka le. Vurˀe, i ra gaka sedewo naŋ, yo i ra tulukum mi ti ɓi ngi siifa ngi sete, misi zleˀe aciki Cine, yo mubugo ndra vu na.

³Gwat ndra mupuraka ati ndra micinaka na, i ra tulukum di mi ya, ɓa kumo kwana, ki ndiram jom ati ndra. Jum ndra na, i jum ati Cine, waɗ ati Mangal naŋ Yesu Kristu.

⁴Ndra matuhukum ɗerewol hana na, ɓa i mumulom haɗa wãˀ.

⁵Ɓi ndra micinaka avu Yesu Kristu, ndra manjikukum di na, n'anihĩ: Buymisemuŋ i li minjahha, ko luvuŋ neˀ anta ava ta.

⁶Da i ra ɓam: i jumom le ati Buymisemuŋ, amma i ra ram angi luvuŋ ma na, kite i ra gam slir. Naɓa ndr'anta gam gwat mikaslsla ta.

⁷Amma da i ra ram angi li minjahha kaɓa naŋ vuna misi angi li minjahha na, naɓa jumoˀay ada ar wala ndra, yo pumbus ngi Yesu Kristu, Mangal ngi Buymisemuŋ, a buna mungra ndraˀahaya gar avra.

⁸Da i ra ɓam: mungra anta avu ndra ta na, kite i ra gam di i gilaw da vu ndra tehhe a muŋ. Naɓa ɓi mikaslsla anta a hur ndra ta.

⁹Amma da i ra ɓaka mungra ndraˀahaya njah njah na, Buymisemuŋ, ndra misinakaŋ njah, yo naŋ mijeŋŋe, yo naŋ kaslsla na, a sa puya mungra ndrahay avra, a buna ndra gwat malambaˀ ndraˀahaya gar avra.

¹⁰Da i ra ɓam: «Ndr'anta gam mungra ta» na, kite i ra gam ti Buymisemuŋ i misi slir, yo mingiɓi naŋ anta a hur ndra ta.