Read South Giziga 1JN 2 Bible Online

1JN 2 - South Giziga bible

1JN 2

¹Ziri ɗuwoy, ya matuhukum ɗerewol hana na, ɓa ki gam mungra ta. Amma da a sa ndilo le avu mburo, a gi mungra le na, ndr'ada ti mbur mijiniˀis asi ndra a mbuŋ Cine ndra. I Yesu Kristu, mbur mijeŋŋe.

²Asi naŋ, i mbur muvula hirnga naŋ ngi gi mikuli a mbuŋ Buymisemuŋ ɓa ngi zuɓa mungra ndrahay avra. I mungra ngi ndrahay tew ta, amma vur mungra ngi mizli ngi duniya gar.

³Ɓimuɗuvahaya, da i ra jaka taŋ a hirnga na, naɓa i sinaka Buymisemuŋ le.

⁴Mbur maɓi: «I si na Buymisemuŋ le», amma anta ja ɓimuɗuva a hirnga ta na, naɓa i mbur migi slir, yo ɓi mikaslsla anta a hur naŋ ta.

⁵Amma mbur maja mingiɓi ngi Buymisemuŋ a hirnga na, naɓa wuɗa Buymisemuŋ migisiŋ gisiŋ, naŋ da a hur naŋ, ndra masinaka, ndr'ada jom ati naŋ na ava.

⁶Mbur mawa kaɓa naŋ jom ati Buymisemuŋ na, sey naŋ vuna a sipi jiviɗ mupurla ka Yesu misipa na ya.

⁷Yeme ɗuwoy, ya matuhukum di na, i ɓimuɗuva nawaya ta, amma i ɓimuɗuva magala, kum mulumaka zle angi zli virzi naŋ. Ɓimuɗuva magala, i ɓi, kum micinaka zlezle na.

⁸Amma kwana, i tuhukum di i ɓimuɗuva nawaya na si. Kaslsla naŋ, a njik tisi Yesu waɗ tisi kumo ma, asi luvuŋ ara cuh, yo li minjahha migisiŋ gisiŋ ara pusluɗu.

⁹Mbur mawa vu naŋ ka naŋ ar li minjahha, amma ara hirsa sukum naŋ ma na, naŋ angi luvuŋ aruŋ na si.

¹⁰Mbur mawuɗ sukum naŋ na, naŋ angi li minjahha, ko gwat mahizigiɗaŋ ng'ar mungra anta ava ta.

¹¹Amma mbur mahirsa sukum naŋ na, naŋ angi luvuŋ, ara rudigi angi luvuŋ, yo aru vuna kini nga maka na, a si na ta, asi luvuŋ a hulufoŋ le.

¹²Ziri ɗuwoy, i tuhukum ɓi ani: «Mungra kumoy i mupuyahay le avra tisi slimiɗ ngi Yesu.»

¹³Kum cine ngi ziri, i tuhukum ɓi ani: «Mbur misi zle angi ɗuva virzi naŋ na, ki sinaka le.» Kum gawla ati diilihey, i tuhukum ɓi ani: «Ki paka hirnga le da ɓi malambaˀa.»

¹⁴Ziri ɗuwoy, i ra tuhukum ɓi ani ma: «Ki sinaka Cine ndra le.» Kum cine ngi ziri, i ra tuhukum ɓi ani ma: «Ki sinaka mbur misi zle angi zli virzi naŋ na le.» Kum gawla ati diilihey, i ra tuhukum ɓi ani ma: «Kum gidaŋ, yo mingiɓi ngi Buymisemuŋ naŋ da a hur kumo.»

¹⁵Anja ki wuɗam duniya ta, ko gwat ngir duniya, ki wuɗam ta. Da mbur ara wuɗ duniya na, naɓa wuɗa Cine ndr'anta a hur naŋ ta.

¹⁶Gwat ngir duniya gar, kaɓa: may gwat ngi dumvu, hiyĩ gwat ngi hiri mapura gar waɗ pula vu mbak da huhumvu ti zlili gar na, a so tivi Cine ndra ta, amma a so tivu duniya.

¹⁷Asi duniya ati hiyĩ gwat naŋ gar na, ara kiɗ mi. Amma mbur magi gwat Buymisemuŋ mawuɗo, a zik hã ngi sete.

¹⁸Ziri ɗuwoy, hana i hin ngi dirba wãˀ. Taŋ mitilam di mi, miɓam: mesene ngi Kristu ara sawa na, ki cinam le. Dambalaka, zle wurenna, mesene ngi Kristuhoy ada haɗi si. Ndra masinaka i hin ngi dirba wãˀ na ava.

¹⁹Mizli tayna, a bam ti wuzla ndra, amma t'anta i ngi ndrahay gisiŋ zleˀe ta. Da i ngi ndrahay zleˀe na, anja a cifam le ati ndra. Amma taŋ misi kanah gar taŋ na, a bigi le i ngi ndrahay ta.

²⁰Na, kum gar na, ki lumam ˀUf Mipala le tivi Kristu, vurˀe, ki sinaka ɓi mikaslsla le.

²¹Ya matuhukum di na, vur ki sinaka ɓi mikaslsla ta kini ta, amma ki sinaka le, yo ko slir anta bo tir ɓi mikaslsla ta na, ki sinaka le ma.

²²Misi slir i wa, mbak mbur maɓi: «Yesu i Mesi ta» na maka? Mbur nah masli himaˀ avu Cine ndra, waɗ avu Mangala na, mesene ngi Kristu, i naŋ.

²³Ko wa gar misina Mangala ta na, kite a si na Cine ta ya si. Mbur matiɓa Mangala na, kite ara tiɓa Cine ya.

²⁴Ngi kumo na, anja ɓi kum micinaka zle angi zlivirzi naŋ na, a ndir a mevel kumo. Da ɓi kum micinaka zle angi zlivirzi naŋ na, naŋ da a mevel kumo na, naɓa kumo kwana, kum jom ati Mangal waɗ ati Cine.

²⁵Gwat, Kristu miɓa ndra di ɗaˀ le na, n'anihĩ: i siifa ngi sete.

²⁶Ɓi ya mawuɗ i tuhukum di ar ɓi ngi mizli mawuɗam zizi kum na, i hana so.

²⁷Amma kumo, ˀUf Kristu muvulukum di na, naŋ da a hur kumo. Kum anta ti may ngi mbur ngi dubunukum gwat ta. Vur mike na, ˀUf Mipala, gwat gar, naŋ madubunukum di na, naŋ jeŋŋe, ko slir anta anga ta. Ndiram jom ati ˀUf Mipala so. Asi mike na, a dubunukum gwat le.

²⁸Naŋ kanah so, ziri ɗuwoy, ndiram jom ati naŋ, ɓa ti naŋ misa bugo vu le na, i sa cifam gidaŋ gidaŋ manja zluwun neˀ, yo ti naŋ misa so le na, ndr'anta sa ndiram ti mesem, kileŋ ava mata.

²⁹Ani, ki sinaka le, Kristu, naŋ jeŋŋe. Yo naŋ kanah ya, ko wa gar magi gwat mijeŋŋe na, i zuŋ ngi Buymisemuŋ.