Read South Giziga 1JN 3 Bible Online

1JN 3 - South Giziga bible

1JN 3

¹Puraka, Cine ndra muwuɗ ndra na ɗi. Wuɗavu naŋ na, naŋ haɗi, hã a zilam ndra ziri ngi Buymisemuŋhoy. Ndr'i ziri naŋhay gisiŋ. Puraka, duniya masina ndra gu ta na, asi a si na Buymisemuŋ ta.

²Yeme ɗuwoy, zle wurenna, ndr'i ziri ngi Buymisemuŋhoy, amma ndra masa mbiɗam pal na, a bigi njak wãˀ taruŋ ɓula. I sinaka le, ti naŋ masa bugo vu na, i sa bam vu ati naŋ, asi mike na, i sa purakaŋ ti hiri ndra.

³Yo ko wa gar minjih hiri le njah angi naŋ na, naŋ manja dili, kaɓa Kristu, naŋ manja dili na ya.

⁴Mbur magi mungra na, kite ara gi gwat mijeŋ ta avu Buymisemuŋ. Asi mike na, mungra i mbiɗi duba avu ɓimujuwa.

⁵Na, ki sinaka le, Yesu a so ngi zuɓa mungra ngi mizli avra, amma naŋ, ko mungra anta ava ta.

⁶Ko wa gar, mandiram zlaɓ ati Yesu na, a gi mungra mata. Ko wa gar magi mungra na, anta pura Yesu ta, yo a sinaŋ ta ma.

⁷Ziri ɗuwoy, anja mbur a gukum gilaw ta. Mbur magi gwat mijeŋ na, naŋ jeŋŋe, kaɓa Yesu vuna mijeŋŋe na ya.

⁸Mbur magi mungra na, i mbur ngi milyam, asi zle angi zli virzi naŋ na, milyam i migi mungra. Mangal ngi Buymisemuŋ mubugo vu na, ɓa ngi hirya slra ngi maliyam avra.

⁹Da mbur i zuŋ ngi Buymisemuŋ na, a pula gi mungra, asi hilfa ngi Buymisemuŋ naŋ da a hur naŋ. N'anta gi mungra gu mata, asi Buymisemuŋ i Cine naŋ.

¹⁰Mbur magi gwat mijeŋ ta, yo mbur mawuɗ sukum naŋ ta na, i zuŋ ngi Buymisemuŋ ta. Ndra maslaka wala ngi ziri ngi Buymisemuŋhoy ati ziri ngi milyamay na, avu gwat hana.

¹¹Ɓi kum micinaka zle angi zli virzi naŋ na, n'anihĩ: anja i wuɗam vu ar wala ndra.

¹²I gam ka Kayin ta. Naŋ, mbur migi mungra nah, a sla ˀay ngi sukum naŋ. A slaŋ ˀay vuna asi mike? Asi gwat ngi gi nga naŋ miga na, i malambaˀa, amma ngi sukum naŋ, naŋ jeŋŋe.

¹³Sukum ɗuwoy, da duniya ara hirsukum na, anja ɓi nah a zumukum hirnga ta.

¹⁴Ndr'i sinaka le, i cohom le tir muco ng'ar li ngi siifa, asi ndra i ra wuɗam sukum ndraˀahaya. Mbur mawuɗ vu ta na, muc ara zum buy ar naŋ.

¹⁵Ko wa gar mahirsa sukum naŋ na, i mikiɗa hirnga. Na, ki sinaka le, mbur makiɗ hirnga na, siifa ngi sete anta a hur naŋ ta.

¹⁶Kristu a vula siifa naŋ le vur ndra, zle dana, ndra masinaka wuɗavu na, avaˀa. Ndra kwana, sey i vulaka siifa ndra vur sukum ndraˀahaya ya.

¹⁷Da mburo, naŋ da ti zlili ngi duniya hana, yo da naŋ mupura sukum naŋ le, a ro ti may ngi gwat, amma da a puraŋ ˀircece ta na, wuɗavu ngi Buymisemuŋ a cifi a mevele mbri mbrike?

¹⁸Ziri ɗuwoy, i wuɗam vu ti mi ɗaˀ ɗaˀ malla ti irne mundum tew ta, amma anja ti gwat ngi gi ndra waɗ ti ɓi mikaslsla.

¹⁹Puraka, ndra masa sinaka, ndr'i mizli ngi ɓi mikaslsla, yo mevel ndra matisl a mbuŋ Buymisemuŋ na, aseˀeŋ.

²⁰Asi, da mevel ndra ara biga ndra di, i gam malambaˀ le na, Buymisemuŋ i madiɗa fineˀ mevel ndra, yo a sla wala ngi gwat gar gu.

²¹Yeme ɗuwoy, da mevel ndr'anta biga ndra di, i gam malambaˀ le ta na, naɓa i ɓam a mbuŋ Buymisemuŋ manja zluwun.

²²Yo ko mike gar, ndra mucufuɗam le ava na, a vula ndra di, asi i ra jaka ɓimuɗuva ngi Buymisemuŋ a hirnga, yo i ra gam gwat maciraŋ hiri.

²³Ɓimuɗuva naŋ, n'ani: i gumbaˀam ng'avi Mangal naŋ Yesu Kristu ti tiɓi, yo i wuɗam vu ar wala ndra kaɓa Kristu miɓa ndra di ɗaˀ le.

²⁴Mbur maja ɓimuɗuva naŋ a hirnga na, naŋ jom ati Buymisemuŋ, yo Buymisemuŋ kwana, naŋ jom ati naŋ aya. Ndra masinaka Buymisemuŋ, naŋ da jom ati ndra na, mbele ˀUf naŋ muvulo ndra di na.