Read South Giziga 1JN 4 Bible Online

1JN 4 - South Giziga bible

1JN 4

¹Yeme ɗuwoy, ˀuf wanaka gar na, anja ki tiɓaka ta, amma puraka ɗagay, ɓa ki sinaka, da i ˀUf ngi Buymisemuŋ kwana. Asi mijiviɗ misi slirey a yam vu le haɗa asi ruwuyo.

²Ki sa sinaka ˀUf ngi Buymisemuŋ avu gwat ani: mbur maɓi njah ti balam naŋ: Yesu Kristu a tiri mbur le gisiŋ na, i mbur misi ti ˀUf ngi Buymisemuŋ.

³Amma ko wa gar maɓi: Yesu a tiri mbur ta na, i mbur misi ti ˀUf ngi Buymisemuŋ ta, naɓa i mbur misi ti ˀuf ngi mesene ngi Kristu, kum micinaka, mitilam di mi: ara sawa tuwa, ani wurenna, naŋ da ar duniya si.

⁴Kumo so na, ziri ɗuwoy, kum i mizli ngi Buymisemuŋhoy, ki paka hirnga le da mijiviɗ misi slir tayna, asi ˀUf misi a hur kumo, naŋ gidaŋ haɗa fineˀ misi ar duniya.

⁵Taŋ i mizli ngi duniyahay, a ɓam ti mi ngi duniya, joˀ duniya a cine taŋ di.

⁶Amma ndra, ndr'i ngi Buymisemuŋhoy. Mbur mawuna mevele ɓa a si na Buymisemuŋ na, a cine mingiɓi ndra. Mbur ngi Buymisemuŋ ta na, naŋ anta cine mingiɓi ndra ta. Ndra masinaka ˀUf ngi ɓimikaslsla ati ˀuf ngi zizavu na, avaˀa.

⁷Yeme ɗuwoy, wuɗukum vu ar wala ndra, asi wuɗavu a so tivu Buymisemuŋ. Mbur mawuɗ vu na, i zuŋ ngi Buymisemuŋ, yo a si na Buymisemuŋ le.

⁸Mbur mawuɗ vu ta kwana, a si na Buymisemuŋ ta. Asi mike na, Buymisemuŋ i wuɗavu.

⁹Buymisemuŋ a slino Mangal naŋ kirmalay ng'ar duniya, ɓa i lumam siifa ti seˀeŋ. Buymisemuŋ mibiga wuɗavu naŋ a wuzla ndra na, ti jiviɗ hana.

¹⁰Wuɗavu na, n'ani: i ndra muwuɗam Buymisemuŋ ta, i naŋ muwuɗ ndra, a slino Mangal naŋ ngi gi mikuli ngi puya mungra ndrahay avra.

¹¹Yeme ɗuwoy, da Buymisemuŋ a wuɗ ndra le kanah na, sey ndra kwana, i wuɗam vu ar wala ndra ya.

¹²Mbur mupura Buymisemuŋ ɗaˀ anta ndiɗaˀ wãˀ. Amma da i ra wuɗam vu ar wala ndra na, Buymisemuŋ naŋ da jom ati ndra, yo naɓa wuɗavu naŋ, naŋ njah wãˀ a hur ndra.

¹³Ndra masinaka, ndra jom ati naŋ, yo naŋ kwana, naŋ jom ati ndra na, asi naŋ muvulo ndra ˀUf naŋ na.

¹⁴Cine ndra a slino Mangal naŋ le ngi laha duniya, ndr'i puraka le, i ra gaka sedewo naŋ.

¹⁵Ko wa gar maɓi njah: «Yesu i Mangal ngi Buymisemuŋ» na, Buymisemuŋ naŋ jom ati naŋ, yo naŋ kwana, naŋ jom ati Buymisemuŋ ya.

¹⁶Na, ndr'i sinaka le, Buymisemuŋ a wuɗ ndra le, yo i ra tiɓakaŋ. Buymisemuŋ i wuɗavu. Mbur mandir ti wuɗavu na, naŋ jom ati Buymisemuŋ, yo Buymisemuŋ kwana, naŋ jom ati naŋ ya.

¹⁷Gwat mabiga wuɗavu ngi Buymisemuŋ, a ndila le kaslsla a hur ndra na, n'anihĩ: angi hin ngi Buymisemuŋ masa ga kiita da mizli na, ndr'anta sa zluwunam ko neˀ ta, asi gwat ngi gi ndra ar duniya a bam vu le rak rak ati ngi Yesu Kristu.

¹⁸Zluwun anta ar wuɗavu ta, wuɗavu mikaslsla wãˀ na, a bi ti zluwun avra jaka, asi zluwuno, taŋ zlaɓ ati kiita. Mbur mazluwun na, naɓa wuɗavu naŋ a ndila kaslsla ta.

¹⁹Ndra, ndra mawuɗam vu na, asi Buymisemuŋ a wuɗ ndra le dumbuŋ.

²⁰Da mbur a ɓi: «I ra wuɗ Buymisemuŋ», amma ara hirsa sukum naŋ na, naɓa i mbur misi slir. Asi mike na, sukum naŋ, naŋ mapura, da naŋ anta wuɗaŋ ta na, a sa wuɗa Buymisemuŋ, naŋ mapura gu ta mbri mbrike?

²¹Ɓimuɗuva ngi Kristu muvula ndra di, n'ani: mbur mawuɗ Buymisemuŋ na, anja a wuɗ sukum naŋ ya.