Read South Giziga 1JN 5 Bible Online

1JN 5 - South Giziga bible

1JN 5

¹Ko wa gar matiɓa, Yesu i Kristu na, i zuŋ ngi Buymisemuŋ, yo ko wa gar mawuɗ Buymisemuŋ Cine ngi mizli na, naɓa a wuɗ zuŋ ngi Buymisemuŋ vuna ya.

²Da i ra wuɗam Buymisemuŋ, yo da i ra gam slra ti ɓimuɗuva naŋ na, i sa sinaka, i ra wuɗam ziri ngi Buymisemuŋhoyo na, avaˀa.

³Wuɗa Buymisemuŋ na, sey da i ra jaka ɓimuɗuva naŋ a hirnga. Ɓimuɗuva naŋ na, i gwat ngi jijir ti jijir ta.

⁴Asi zuŋ ngi Buymisemuŋ gar na, a pa hirnga da duniya gu. Mapa hirnga da duniya, i tiɓi ndra.

⁵Mapa hirnga da duniya gu, i wa mbak mbur mitiɓa le, Yesu i Mangal ngi Buymisemuŋ na ka?

⁶Yesu Kristu i mbur muso ti yam waɗ pumbusu. A so ti yam pal naŋ ta, amma yam waɗ pumbusu. I ˀUf ngi Buymisemuŋ maga sedewo naŋ. Asi mike na, ˀUf ngi Buymisemuŋ i ɓi mikaslsla.

⁷Migi sedewohoyo, taŋ makir:

⁸ˀUf Mipal, yam waɗ pumbuso, taŋ makir taŋ, a gam di i sedewo mupurla.

⁹Da ndr'ada tiɓaka sedewo ngi mizli na, sedewo ngi Buymisemuŋ, naŋ fineˀ nah jaka, asi sedewo nga naŋ, i sedewo, naŋ miga ar Mangal naŋ.

¹⁰Mbur matiɓa Mangal ngi Buymisemuŋ na, naɓa sedewo nah vuna, ada a mevele. Mbur matiɓa Buymisemuŋ ta na, naɓa ara gi ti Buymisemuŋ i misi slir, asi sedewo Buymisemuŋ miga ar Mangal naŋ na, a tiɓa ta.

¹¹Sedewo nah n'anihĩ: Buymisemuŋ a vula ndra siifa ngi sete le. Siifa nah na, naŋ avu Mangal naŋ.

¹²Mbur misi ti Mangal ngi Buymisemuŋ a hur naŋ na, naɓa naŋ ti siifa. Amma mbur manja Mangal ngi Buymisemuŋ a hur naŋ na, naɓa naŋ anta ti siifa ta.

¹³Kum mizli mitiɓaka Mangal ngi Buymisemuŋ na, yi tuhukum ɗerewol hana, ɓa ki sinaka, kum ti siifa ngi sete.

¹⁴Ndra macicam a mbuŋ Buymisemuŋ manja zluwun na, asi da i ra cufuɗam gwat avu naŋ kaɓa naŋ mawuɗ na, ada cine ndra di.

¹⁵Yo ndr'i sinaka le, ko mike gar, ndra mucufuɗam le ava na, a cine ndra di. I sinaka le ma, gwat ndra mucufuɗam le ava na, i lumaka si.

¹⁶Da mbur a pura sukum naŋ le, ara gi mungra, amma i mungra maru ti mbur ng'ar muc ta na, anja a dir dibiɗ, ɓa Buymisemuŋ a vula siifa da sukum naŋ nah. Amma sey da i mungra maru ti mbur ng'ar muc ta gisiŋ ɓula. Asi mungra ada pal, maru ti mbur ng'ar muco, ya maɓukum ɓa ki diram dibiɗ na, asi mungra nah ta.

¹⁷Gi gwat mijeŋ ta gar na, i mungra. Amma maru ti mbur ng'ar muco, i mungra wanaka gar ta.

¹⁸I sinaka le, zuŋ ngi Buymisemuŋ gar na, anta gi mungra mata, asi Mangal ngi Buymisemuŋ ara jiginaŋ, yo Milyam a gaŋ malambaˀ gu ta.

¹⁹I sinaka le, ndr'i ngi Buymisemuŋhoy, amma duniya keɗeɗe gar na, taŋ asi haŋ ngi Malambaˀvu.

²⁰I sinaka le, Mangal ngi Buymisemuŋ a so le, a vula ndra lesl le ɓa i sinaka Buymisemuŋ migisiŋ gisiŋ. Ndra mujom ati Buymisemuŋ migisiŋ gisiŋ na, mbele Mangal naŋ Yesu Kristu. Naŋ i Buymisemuŋ migisiŋ gisiŋ, yo i siifa ngi sete ma gar.

²¹Ziri ɗuwoy, jiginaka vu kum avu kuliheye.