Read South Giziga JDG 1 Bible Online

JDG 1 - South Giziga bible

JDG 1

¹A dirba Zozuwe mumuc na, Israyeley ara puraka Bumbulvuŋ, a ɓakaŋ na: «Masa ru dumbuŋ nga kiɗa Kanaˀanay na, i sukwi wana asi ndra ka?»

²Bumbulvuŋ a mbiɗa taŋ di: «I sukwi ngi Zuda masa ru, asi i vula hirwuyo le asi haŋ naŋ.»

³Sukwi ngi Zuda a ɓa dideˀ ngi Simeyoŋ, sukum naŋhaya na: «Soko asi ya nga hirwuy muvulikiy di, ɓa i ra kiɗaka Kanaˀanaya. A dirba nah, ya kwana, i sa ru asi ka nga hirwuy muvulukuw di.» Dar dideˀ ngi Simeyoŋhoy tuwa, a ram aseˀeˀ.

⁴Sukwi ngi Zuda tuwa, aru nga kiɗa vu so, Bumbulvuŋ a vula taŋ Kanaˀanay ati Perizihey asi haŋ taŋ. A kiɗam asi taŋ, mizli durmuk kuruˀ a Bezeke.

⁵Naŋ kine, ara lumaka buy Adoni-Bezek ar walahay Bezeke. A zlaka kiɗa vu, a lumam bugawla ar Kanaˀanay ati Periziheye.

⁶Buy Adoni-Bezek tuwa, a kil, amma a ɓulakaŋ, ara jakaŋ is, dar a bukokoŋ muzuŋ haŋ madiɗahay ati muzuŋ sar madiɗahaya.

⁷Akẽh na, buy Adoni-Bezek tuwa, a ɓi: «Buyoy kukur tarnaˀ mubukoko taŋ muzuŋ haŋ madiɗahay ati muzuŋ sar madiɗahay na, a guɗumam ngi zumo i misimi ɗu. Gwat ya miga na, Bumbulvuŋ a miy di le nga hirnga ɗu.» A ram ti Adoni-Bezeke nga Zeruzalem, a muc a diga.

⁸Mizli Zudahay a zlaka Zeruzaleme ngi kiɗa vu, a tiɓakaŋ. A kiɗaka mizli sunok sunok ti maslalam, a wuraka walahaya.

⁹A dirba nah ma na, Zudahay a ram nga kiɗa Kanaˀan misi tir vay muwã ati misi tir Ayzaw waɗ misi tir vay zugudumo.

¹⁰A dirba nah ma na, Zudahay ara kiɗaka Kanaˀan ngi Hebroŋhoyo, a zilaka Hebroŋ vuna zleˀe Kiriyat-Arba, a kiɗaka mizli Sesayay ati Ahimaŋhay waɗ Talmayaya.

¹¹A ram baɗ ti kẽh nga kiɗa mizli Debirey, a zilaka Debir vuna zleˀe Kiriyat-Sefer.

¹²Kalep a ɓi na: «Mbur mikiɗa Kiriyat-Sefere le, yo a tiɓa hirwuy naŋ le na, i sa vulaŋ zuŋ ɗu Aksa na ngi ngwasa.»

¹³Otniyel, mangal ngi Kenas, sukum meciɗek ngi Kalep vuna, a tiɓa walahay tuwa, joˀ Kalep a vulaŋ zuŋ naŋ Aksa tuwa ngi ngwasa.

¹⁴Aksa mindil ndil a hay Otniyel tuwa si na, a pa mi da Otniyele, ɓa a cufuɗ guva avu cine naŋ Kalepe. Zuŋ tuwa mipi sar cak tir zungu si na, cine naŋ Kalep a ɓaŋ: «Ki wuɗ mike?»

¹⁵Aksa a mbiɗaŋ di: «Giy mezle takwa! Ani ki vuliy hirwuy Ayzawa le, na, vuliy vigiɗ ngi yamaya ma.» Dar Kalep a vulaŋ vigiɗ ngi yam vay muŋhoy waɗ vay ruwuyoyo.

¹⁶Mizli Kenihey, jomo ngi Moyiseye, a slikiɗoko baɗ ar walahay dibinojihey ati mizli Zudahay misi a wuzlaɓuh mikirɗak kirɗak ngi Zuda mikini tir vay ngi ruwuy Arat, ara pam a wuzla mizli.

¹⁷Mizli Zudahay a ram ati mizli Simeyoŋ, sukum taŋhaya, a kiɗaka mizli Kanaˀanay misi a Sefata, a ngizlaka walaha yakap wãˀ. A zilaka walahay nah vuna zleˀe Horma, a mbiɗeˀvra ‹diŋ.›

¹⁸Zudahay a tiɓaka walahay Gaza, Askaloŋ ati Ekroŋ waɗ prok taŋhaya.

¹⁹Bumbulvuŋ naŋ da ati Zudahaya, a tiɓaka li vay muwãhaya. Amma a tiɓaka walahay ngir li micaya gu ta, asi mota ngi vurum taŋhay i ngi ɓirihey.

²⁰A vulaka hirwuy Hebroŋ da Kalep, kaɓa Moyis miɓa tuwa. Kalep a tiɓi di i walahay ngi ziri ngi Anakay makir.

²¹Mizli Benjameŋhey a ɓulaka mizli Zebusihey misi a Zeruzaleme gu ta. Zebusihey a cifam ati Benjameŋhey a Zeruzaleme hã dana aruŋ.

²²Dideˀ ngi Efrayim ati ngi Manase, ziri ngi Zozefeye kwana, ara zlaka Betele ngi kiɗa vu aya, Bumbulvuŋ naŋ da ati taŋ.

²³Mizli ngi hay Zozefey tuwa, a slinam nga jiɗa walahay Betele ɗagay. A zilaka Betele zleˀe Luz.

²⁴Mijiɗa lihey tuwa, a puram mbur ara bawa tir walahaya, a ɓakaŋ: «Inga biga ndra li walahaya takwa, ɓa i sa gukuw mezleŋ.»

²⁵Mbur tuwa, a biga taŋ di, dar dideˀ ngi Manase ati ngi Efrayimeye, a ngizlaka mizli ngir walahaya ti maslalam, amma a pulaka mbur mibiga taŋ li tuwa, a cohom ati muy naŋhaya gwaɗ naŋ.

²⁶Mbur tuwa, aru nga ruwuy Hiti, a ɗuv walahay madiɗa taˀ, a caŋ slimiɗe Luz. Hã dana a zilaka kanah aruŋ.

²⁷Walahay Bet-Seyaŋ, Taˀanak, Dor, Ibileyam, Megido ati prok taŋhaya, mizli ngi Manasehey a zumaka walahay tayna gu ta. Joˀ mizli Kanaˀanay a ndiram angi hirwuy nana.

²⁸Amma ti Israyeley mulumam gidaŋ so na, a tikaka ˀay da Kanaˀanaya ti slra mutuwaˀ, amma a ɓulaka taŋ gu ta.

²⁹Kanaˀanay mipam a Gezer na, mizli Efrayimey a ɓulaka taŋ gu ta, joˀ Kanaˀanay a ndiram a wuzla Efrayimey a Gezere.

³⁰Kanaˀanay misi a Kitroŋ ati Nahalal na, mizli Zabuloŋhoy a ɓulaka taŋ gu ta. Kanaˀanay a ndiram a wuzla Zabuloŋhoyo, amma a vulaka taŋ slra mitakˀay ɓula.

³¹Mizli ngi ruwuy Ako, Sidoŋ, Aksip, Helba, Afik waɗ ngi ruwuy Rehopo, mizli Aserey a ɓulaka taŋ gu ta.

³²Mizli Asereye t'ada a wuzla Kanaˀanay misi a si ruwuyo, a si a ɓulaka taŋ zleˀe ta.

³³Mizli ngi Bet-Semek ati ngi Bet-Anata, mizli Neftalihey a ɓulaka taŋ gu ta, t'ada a wuzla mizli Kanaˀanay misi asi ruwuyo, amma mizli Neftalihey a vulaka taŋ slra mitakˀay le ɓula.

³⁴Mizli Amorihey a ɓulaka mizli Daŋhaya nga muwã, ko a pulaka taŋ a poko sar ng'ar li micaya ta.

³⁵Mizli Amorihey a ndiram a Har-Heres, a Ayaloŋ waɗ a Saˀalbime. Amma nga mbuŋ, mizli ngi hay Zozefey a waka taŋ le, a vulaka taŋ slra mitakˀay.

³⁶Maakway ngi ruwuy Amoriheye, a zli zle a miɗingir ngi ruwuy Edom, zle a mandazlay, paɗɗa ngir ti muŋ.