Read South Giziga JDG 14 Bible Online

JDG 14 - South Giziga bible

JDG 14

¹Ti di numuŋ ada na, Samsoŋ aru nga Timna, a pur zuŋ diili a wuzla ziri diili Filistihey.

²Ti naŋ mumo na, a ɓa miyi naŋhaya: «Yi pur zuŋ diili le a wuzla diili Filistiheye. Wurenna, ara zuɓikiy di ngi ngwasa.»

³Miyi naŋhay a ɓakaŋ: «Ɓa hã ki ra zuɓ ngwasa a wuzla Filisti manja ci mizaway na, diili ngi zuɓo anta a wuzla ziri diili ngi sukum ɗikey ati muy ndraˀahaya ta kwa?» Amma Samsoŋ a ɓa cine: «Yi hiyĩ nga ya i naŋ, ara zuɓiy di ngi ngwasa.»

⁴Miga ɓa Samsoŋ a hiyĩ zuŋ Filisti i Bumbulvuŋ na, ti cine ati mumuŋ a si na ka ta Buymisemuŋ a sipi di i jiviɗ ngi zlira taŋ ngi gi vurum ati Filistiheye. Ti nah na Filistihey a paka hirnga le da Israyeleye.

⁵Akẽh Samsoŋ a ram ati miyi naŋhay nga Timna so. Ti taŋ mindilam ar guva ngi gudubun ngi Timnahay na, zingaˀ ngi mobor a bo ti Samsoŋ gur ti tuwuy.

⁶(ˀUf) ngi Bumbulvuŋ a ci avu Samsoŋ, manja gwat kaw a haŋ si na, Samsoŋ a wursla mobor tuwa, wurasl a wuzla cuw, kaɓa i zuŋ ˀawa si. Amma ko a ɓa ɓi ngi gwat naŋ miga nah, da miyi naŋhaya ta.

⁷Joˀ a zuɓa jiviɗ naŋ nga Timna, ara bubuɗam ati zuŋ Filisti tuwa, a hĩyã zuŋ le haɗa.

⁸A gam hin neˀ na, Samsoŋ a mo nga Timna, ɓa a zuɓa zuŋ tuwa. Amma aru bal avu maara ngi mobor tuwa, keɗ na, mam ɗap ɗap liw avu tesl ngi mobor mi ngiyam tuwa waɗ mamalam naŋ.

⁹A muɗa mamalama ceɗ ceɗ jup a haŋ, dar aru bal ti zum naŋ. Ti naŋ mindil a hay miyi naŋhay na, a vula taŋ mam tuwa ya, miyi naŋhay a zumam. Amma a ɓa taŋ di, i muɗo di ar tesl ngi mobor mingiyam na, a ɓa taŋ di ta.

¹⁰Cine ngi Samsoŋ aru ng'avi zuŋ diili Filisti tuwa so. Samsoŋ kwana, a da gwat ngi kisa ngwasa, kaɓa gawla ati diilihey magaka hõyyõ.

¹¹Filistihey mupuraka Samsoŋ keɗ sina, a hilam gawla kukur makir aseˀe.

¹²Samsoŋ a ɓa taŋ: «Y'ani wuɗ i ɓukum ɓi ngi kicuwul ani. Da ki mikiy ti mbiɗebra naŋ le angi hin mitarnaˀ ngi muguzlum ngi kisa ngwas hana na, i sa vulukum godohoy kukur makir waɗ zana kukur makir, da ngi kumoy a jupam le na, kisa kaka taŋ.

¹³Amma da ki lumaka mbiɗeˀvra naŋ ta na, i kum masa vulikiy godohoy kukur makir waɗ zana kukur makir ngi mbiɗa nga yahaya ya.» Taŋ a ɓakaŋ so na: «Ɓo ndra ɓi ngi kicuwul ɗike, i ra cinam.»

¹⁴Samsoŋ a ɓa taŋ: «Mbur mazumo, gwat mazumaka a bo ti vaŋ. Mbur migidaŋ, gwat mideɗeke a bo ti vaŋ. I mike?» Gawlahay a gam hin makir, ko a lumaka ɓi mukicuwula tuwa t'aruŋ.

¹⁵Na angi hin mitarnaˀ naŋ muduba na, a ɓaka ngwas ngi Samsoŋ: «Inga ka mi ngi zil ɗik na, ɓa a ɓo ndra ɓi ngi kicuwulo, da kanah ta na, i sa wurukum kuɗup ati hay ngi bunuko keɗeɗe. Ki ziloko ndra na, nga tiɓa ndra gwataya kwa mbrike?»

¹⁶Ngwas ngi Samsoŋ a sipa Samsoŋ ti tuwuy. A ɓa Samsoŋ na: «Ɓi ngi kicuwul ka miɓa da mizli ɗuwoy na, ki hirsiy ti hirisi, ki wuɗiy ti wuɗ ta. Ki ɓiy mbiɗeˀvra naŋ ɗaˀ le ta.» Samsoŋ a mbiɗaŋ di: «Ko i ɓa mbiɗeˀvra naŋ da mbur loŋ ta, ko da baha ko da maha, ɓa i ɓuw di ka vur mike?»

¹⁷Ngwas ngi Samsoŋ ara sipaŋ ti tuwuy, hã hin mitarnaˀ ngi kisa ngwasa gar. Angi hin mitarnaˀ naŋ so na, a ɓaŋ mbiɗeˀvra naŋ so, asi a suroŋ mi le wãˀ! Dar ngwas tuwa, ara njika da mizli naŋhaya ya.

¹⁸Angi hin mitarnaˀ naŋ, ngi pas mawuɗ a diɗ na, mizli ngir walahay a soko, a ɓaka Samsoŋ: «Gwat mideɗek fineˀ mam ada makwa? Gwat migidaŋ fineˀ mobor ada makwa?» Samsoŋ a mbiɗa taŋ di: «Da ki huvam zleˀe ti madiya sla ɗu ta na, anja ki lumaka mbiɗeˀvra ngi ɓi mukicuwula ɗu na ta.»

¹⁹Akẽh na, ˀUf ngi Bumbulvuŋ a ci avu Samsoŋ, a cuh nga Askaloŋ, a kiɗ mizli kukur makir vagay vagay, a cuko zana taŋhaya, a sa vula taŋ da mizli mulumaka mbiɗeˀvra ngi ɓi mukicuwula tuwa. Mevel ngi Samsoŋ a tiɓi ka vu, dar a mi ngi hay cina.

²⁰A vulaka ngwas ngi samsoŋ da cil naŋ taŋ misi cuwa zleˀe, ɓa ɗuvaŋ.