Read South Giziga JDG 15 Bible Online

JDG 15 - South Giziga bible

JDG 15

¹A zikam neˀ a dirba nah na, naɓa i sifi ngi alkamari, Samsoŋ aru nga pura ngwas naŋ, aru ti zuŋ ˀaw a haŋ, a ɓi: «I wuɗ ci ng'ar viŋ ngi hin ngi ngwas ɗu.» Amma jomo naŋ a pulaŋ jiviɗ ta,

²dar a ɓa samsoŋ na: «Yi wa na, ki hirsaŋ le gisiŋ zleˀe, yi vula le ngi ngwas da cil ɗik kum misi cuwa zleˀe. Na sukum naŋ meciɗeke, a funaŋ le ti kuyo ta kwa? Zuɓa ar deɗe naŋ!»

³Samsoŋ a ɓa taŋ: «Wurenna da i ga malambaˀ le da Filistiheye na, ko mbur a mbiɗiy hirnga ta.»

⁴Salomoŋ tuwa, a cuh, ara jo biigaɗay skat skat makir, a hila taŋ cuw cuw, a mbuɗo virzi taŋhaya pulaˀ pulaˀ, a juwa taŋ dangwalaya slac arleˀe waɗ dali i vu kulaˀ a wuzla, slac arleˀe waɗ dali i vu kulaˀ a wuzla.

⁵A nduvuɗa vu avu dali i vuhoy tuwa cek, dar a pula taŋ girɗiɗiɗi ng'ar guva ngi Filistiheye, biigaɗay tuwa, a nduvuɗaka vu da daw misi a mizer ati mikaˀ kaˀ, diga guva ngi gudubun ati ngi tutumbur taŋhaya cek.

⁶Filistihey a ɓam: «Miga gwat hana i waka?» A mbiɗaka taŋ di: «I Samsoŋ jomo ngi mbur Timna, asi jomo naŋ vuna, a zuɓa ngwas naŋ, a vula ngi ngwas da cil ngi Samsoŋ vuna.» Akẽh na, Filistihey ara wuraka zuŋ vuna jom ati cine.

⁷Samsoŋ a ɓa taŋ: «Kum magam kahana na, y'anta cifi teˀ ta, sey da ya mupula bol ɗu le avu kumo far.»

⁸A kiɗa taŋ kuy kuy, a pa hirnga le wãˀ da Filistiheye. A dirba nah, ara cifi ar wala muwã a Etam.

⁹Filistihey a sa paka walahay guɗuk taŋ ar walahay Zuda, a paka soje taŋhay zaɓ zaɓ hã a Lehi.

¹⁰Mizli ngi Zudahay a ɓaka taŋ na: «Ki soko zlaka ndra ngi kiɗa vu vur mike?» Filistihey a mbiɗaka taŋ di: «I soko ɓa i juwaka Samsoŋ kaˀ kaˀa, ɓa i gakaŋ gwat naŋ miga ndra di na ya.»

¹¹Mizli Zudahay durmuk makir, a pam sar ngir tivi wala muwã Etam tuwa, a ɓaka samsoŋ na: «Filistihey a tikam ndra ˀay le na, ki si na ta kwa? Ki ga ndra hana i gwat mike?» Samsoŋ a mbiɗa taŋ di: «I ga taŋ di i gwat taŋ migikiy di da ya na ya.»

¹²Mizli Zudahay a ɓakaŋ: «I soko ɓa i juwukuw, i ram ti ka da Filistihey.» Samsoŋ a ɓa taŋ: «Da ki wuɗo kiɗikiy vagay ti haŋ kumo ta na, inga hudumom.»

¹³A ɓakaŋ: «Ĩˀĩ, ndr'anta kuɗuku ta, i wuɗam i ram ti ka majuwakaˀ kaˀ da Filistihey tewle si, ko Ndr'anta ti wuluk ngi kiɗ ɗike ta.» A juwaka kaˀ kaˀ ti zeweɗ nawayahay tap cuw, a zuɓoko di tir wala muwã.

¹⁴Ti Samsoŋ mindil a Lehi na, Filistihey a zluzluɓoko cərəwcərəw nga hirnga naŋ. ˀUf ngi Bumbulvuŋ a ci avu samsoŋ: zeweɗey majuwakaŋ haŋhay ti nah tuwa, a pam kacap kacap kaɓa gugumay mislirkeɗ, vu muwura le, a gi tif tif avu haŋ.

¹⁵Akẽh na, Samsoŋ a lum tesl ngi kwala ngi zungu mupuwaka wureˀe, a zuɓa vavar, a kiɗ mizli durmuk ti nah.

¹⁶Samsoŋ a ɓi: «I kiɗ mizli zikitiŋ zikitiŋ ti tesl ngi kwala ngi zungu. I kiɗ mizli durmuk ti tesl ngi kwala ngi zungu.»

¹⁷Naŋ mitika mingiɓi naŋ tikeˀ si na, a hiziga tesl ngi kwala ngi zungu tuwa fuk kileŋ ava. Dar a zilaka li nah Kamat-Lehi.

¹⁸Yam a wuɗ a kiɗa Samsoŋ. A zila Bumbulvuŋ, a ɓaŋ: «Muvula bugawla madiɗa hana da gawla ɗik i ka. Na wurenna mbak i muc ti madalyam, ɓa i ci ng'asi haŋ ngi mizli manja ci mizaw tayna sukwa?»

¹⁹Dar Buymisemuŋ a cira muwã ar pilay ngi Lehi kpah, yam a bo ti raŋ. Samsoŋ a si, a lum gidaŋ, a tiri wirwir a muŋ. Vurˀe, a zilaka miviɗiviɗi ngi yam nah ‹miviɗiviɗi ngi Kore.› N'ada hã dana aruŋ.

²⁰Hirak ti Filistihey misi ada na, Samsoŋ a cifi i migi kiita ngi Israyel hã vi kukur cuw.