Read South Giziga JDG 17 Bible Online

JDG 17 - South Giziga bible

JDG 17

¹Mburo ada, naŋ tir vay muwã Efrayim, a zilaka Mika.

²Ti di numuŋ ada na, a ɓa mumuŋ: «Suloy ɗik gabal ti skat mihiloko na, ki si na buy naŋ mihiri ɗu. Naŋ kuy! Dala naŋ da avu ya, muzuɓa zleˀe i ya!» Mumuŋ a mbiɗaŋ di: «Anja Buymisemuŋ a ɗuwuluw mi mangal ɗu!»

³A mi ti suloy gabal ti skat tuwa da mumuŋ a muŋ. Amma mumuŋ a ɓaŋ: «Naŋ kine, i vula dala nah le tihaŋ ɗu da Buymisemuŋ vur ka mangal ɗu, i sa ɗiyam di foto ngi kuli misirit sirit ti ɓiri. I wuɗ i muw di wurenna a muŋ.»

⁴Mika muvula dala da mumuŋ so na, mumuŋ a hil ara suloy skat cuw, a vula da mbur muluwusla ɓiri. Dar mbur tuwa, a ɗiyi di foto ngi kuli misirit sirit ti ɓiri, ara ɗuvaka taˀ a hay Mika.

⁵Dambalaka mbur Mika nah vuna, naŋ da ti kuli ɗugur kaˀ a haya. A ɓi ɓa a tufakaŋ jampa waɗ a ɗiyakaŋ kuli memeɗe naŋhaya ma. Dar a ga mezegwel ngi vula slra da pal asi ziri naŋ mizileheye, a tiri di masay naŋ.

⁶Ti nah na, naɓa buy anta asi ruwuy Israyele ta, mbur gar a gi ka naŋ mawuɗo.

⁷Dambalaka mangal gawla levi ada, naŋ i mulak a Betelyem, hirwuy ngi sukwi ngi Zuda.

⁸Mbur tuwa, a pula walahay Betelyem hirwuy Zuda tuwa, ɓa ara cifi asi ruwuy mekelem. Naŋ maru na, ara ndil a hay Mika misi tir vay muwã Efrayim.

⁹Mika a ɓaŋ: «Ki so ti damaka?» Mbur tuwa, a mbiɗaŋ di: «Yi mbur levi, ya a Betelyem ngi Zuda, i ra sipi li ngi pi.»

¹⁰Mika a ɓaŋ: «Cifi a hay ɗu aka, ɓa ki tiri masay ngi hay ɗu ngi gi mikuli. I sa vuluw suloy kuruˀ vur vi gar, waɗ zanahay ati gwat ngi zum.» Mbur Levi tuwa, a ci,

¹¹dar a ngum cifi a hay Mika, Mika a puraŋ ka mangal naŋ.

¹²Mika a ga mezegwel ngi vula slra a hirnga mbur levi tuwa. Gawla tuwa, a tiri masay naŋ ngi gi mikuli, a ndir wãˀ a hay Mika.

¹³Akẽh Mika a ɓi: «Wurenna, i si na le gisiŋ Bumbulvuŋ a sa giy mezle, asi mbur levi hana mitiri masay ɗu migi mikuli na.»