Read South Giziga JDG 19 Bible Online

JDG 19 - South Giziga bible

JDG 19

¹Hirak ti nah na, buy anta asi ruwuy Israyele ta. Mbur levi ada, a pi a mivay wãˀ ngi hirwuy muwã Efrayim, ngwas mangasl naŋ ada, i zuŋ Betelyem ruwuy Yuda.

²Mangasl naŋ tuwa, a ji mevel anga, a kil ngi hay taŋ a Betelyem, a gi kiya mufaɗ a diga.

³Zil naŋ a sipaŋ, ara tumbulo di, ɓa a mawa a muŋ. A ram ati gawla naŋ waɗ zunguhoy cuw. Mangasl naŋ tuwa, a ci di ngi hay cine. Cine ngi zuŋ mupura jomo naŋ keɗ na, a tiɓaŋ mulaka ti mumul.

⁴Jomo naŋ tuwa, a tikaŋ, a gi hin makir a hay naŋ, a zum, a si gwat, yo a hin akẽh.

⁵Ngi hin mumufaɗ naŋ na, a slikiɗam ngi miprik prik, mbur levi tuwa, ara juw vu ngi cuh le. Jomo naŋ a ɓaŋ: «Zum gwat neˀ, ɓa ki lum gidaŋ, a dirba nah kisa ram!»

⁶Dar mbur tuwa, a zumam, a sam gwat cuw taŋ ati jomo naŋ joarleˀe. Mbur levi, jumo naŋ tuwa, a ɓaŋ: «Tuɓa, ɓa ki hin dana aka, musuk vu kuy kuy!»

⁷Na mbur levi ara juw vu, ɓa a cuh le na si, amma jomo naŋ a hurdum di hirdam, hã a mbiɗa wuluko, a hin akẽh ma.

⁸Ngi hin muzlum naŋ na, a slikiɗ prik prik ɓa a cuh le, amma jomo naŋ tuwa, a ɓaŋ: «Ambuh! Inga zum kwaɗay takwa, ɓa kisa ram pas mingil ˀay le.» Dar a zumam cuw taŋ arleˀe.

⁹Mbur Levi tuwa, a wuɗ ɓa a cohom ati mangasl naŋ waɗ gawla naŋ, amma jomo naŋ a ɓaŋ: «Pastaˀ a gi le si, yo hiikuɗ ara ji, hin sini! Musuk vu kuy kuy, hiikuɗ ara ji, hin aka. Ti prike, kisa slikiɗam ti li ngi hay ɗike.»

¹⁰Amma mbur levi a ngum hin mata. A slikiɗam ati mangasl naŋ waɗ zungu naŋhaya cuw taŋ, kaˀ kaˀ ti sarde taŋhaya, a cohom, ara ndilam a Zebu, mbiɗeˀvra Zeruzalem.

¹¹Ti taŋ mindilam gweˀ avu Zebu na, naɓa pas a wuɗ a diɗi. Gawla tuwa, a ɓa buy naŋ mbur levi na: «Akum nga ruwuy ngi Zebusihey hana, ɓa i ra hinam a diga!»

¹²Buy naŋ a ɓaŋ: «I cicam ar walahay ngi mizli mulakaya ta, mbur Israyel pal anta a diga ta. Akum sesẽŋ a Gibeya.»

¹³A ɓaŋ ma: «Akum ng'ar walahay pal asi ngi digahay na, i ra hinam malla a Gibeya, malla a Roma.»

¹⁴A zuɓam jiviɗ, a ram, pas ara ndil ti taŋ gweˀ avu Gibeya, ruwuy Benjameŋ.

¹⁵A jikam dibiɗ ɓa ra hinam a Gibeya so. A cam, ara cifam ar li ngi luuma. Amma ko mbur mizila taŋ, ɓa ara hinam a hay naŋ na, anta.

¹⁶Keɗ na, mbur midigila ada, ara mo ti ɓuh, i mbur ngir vay muwã Efrayim, amma hay naŋ a Gibeya, Gibeya i walahay ngi Benjameŋhey.

¹⁷Midigila tuwa, a pura na, mulakay joar li ngi luuma, a ɓa mbur levi tuwa: «Ki ru nga maka? Ki so ti damaka?»

¹⁸Mbur Levi a mbiɗaŋ di: «I slikiɗoko ti ruwuy Betelyem ngi Yuda, i zuɓam jiviɗ kini nga mivay ngi ruwuy muwã Efrayim. Hay ɗu naŋ a diga. I ru na ng'ar hay ngi Bumbulvuŋ, amma ko mbur mitiɓiy ngi hay naŋ anta.

¹⁹Na y'ada ti murbuc waɗ zlamba da zungu ɗuwoyo, ngi ndra ati gawla ɗu waɗ mangasl ɗu mikisoko ya na, ɗaf ada waɗ mbaazla ma, ko gwat mikica ndra neˀ anta.»

²⁰Akẽh na, mbur midigila tuwa, a ɓaŋ: «Jaɓama! Gwat ka muro ti may naŋ gar na, i zuɓa ɓi nah le, amma ki hin ar li ngi luuma ta.»

²¹Aru ti taŋ ngi hay naŋ, a vula murbuc da zunguhoyo. Mulakay tuwa, a bunaka saraya, a zumam, jo a sam gwat.

²²Ti taŋ mazumam tuwa na, mizli kesef ngir walahaya, a soko, a ndahaka haya ndah ndah, a kiɗaka miviŋ ti gidaŋ, a ɓaka midigila buy ngi hay tuwa: «Bo ndra ti mbur ngi hay ɗik na, i hinam di.»

²³Buy ngi hay tuwa, a bawa, a ɓa taŋ: «Kanah ta sukum ɗuwoy, ambuh kum, ki gakaŋ malambaˀ ta, mbur hana i mulak ɗu!

²⁴Zuŋ ɗu diili mungbuˀo ani, y'ani bo di, gam di ka kum mawuɗam. Amma mbur hana, ki gakaŋ malambaˀ misi kahana ta.»

²⁵Ko mizli tuwa, a ngumam cin naŋ ta wãˀ. Akẽh mbur levi, a jo mangasl naŋ tuwa, a bo taŋ di ng'avra. A tikakaŋ ˀay, a hinam di kap, hã li daŋ daŋ, li mawun na, a pulaka kiciɓirah.

²⁶Gweˀ avu miprik na, ngwas tuwa, a so diɗ simtraˀ avu mizlingre ngi mbur misi zil naŋ nga hay naŋ tuwa, hã li a wun di.

²⁷Zil naŋ a puɗuk ngi miprik prike, a wuna miviŋ, a bawa, ɓa a cuh le, keɗ na, mangasl naŋ tuwa, a ro simtraˀ avu miviŋ, haŋhaya sek ar hohoy ngi miviŋ.

²⁸Zil a ɓaŋ: «Slikiɗ, a kum le!» Ngwas a mbiɗaŋ di ta. Mbur tuwa, a zuɓa nga duba zungu naŋ, a mi ngi hay naŋ.

²⁹Naŋ mindil a hay naŋ na, a zuɓ sliwiɗ, a puwa mangasl naŋ tuwa paw paw, taˀ taˀ kuruˀ nga cuw. A slin di pal pal da sukwi Israyeleye tiɗeˀe.

³⁰Mizli mupuraka le gar na, a ɓam: «Diga sukwi Israyel mubo ti ruwuy Ezipte, hã dana na, gwat kahana a gi ɗaˀ ta, yo i puram ɗaˀ ta!» Mbur Levi, ti naŋ mislina mizli naŋhay na, a ɓa taŋ: «A ra ɓaka mizli na: Diga sukwi Israyele mibawa ti ruwuy Ezipte, hã dana na, gwat misi kahana, a gi le ɗaˀ kwa? Wulkam a ra, cikilam ɓa ki puraka ɓi nah.»