Read South Giziga JDG 2 Bible Online

JDG 2 - South Giziga bible

JDG 2

¹Modro ngi Bumbulvuŋ aru ti Gilgala nga Bokim, a ɓa Israyeleye na: «I bo ti kum le ti ruwuy Ezipte, yo i co ti kum le nga ruwuy ya miɓa ɗaˀ le ti hudum da dideˀ kumoy na. Yi ɓi zleˀe na: ‹Ko y'anta sa ngila ɓi ngi jumoˀay ɗu ati kumo ta ndiɗaˀ wãˀ,

²yo kumo kwana, ko ki ɗiyam ɓi ngi jumoˀay ati mizli ngi ruwuy hana ta, kisa putukusoko li gi mikuli taŋhaya.› Amma ko ki cinikiy mi ta, ki gam hana i gwat mike?

³Dar yi ɓi: ‹Ko y'anta sa ɓula mizli ngi ruwuy hana a mbuŋ kumo ta, mbak a sa tiram ngamngam avu kumo, yo kuli taŋhay a sa tiram mazaɓay avu kumo.›»

⁴Modro ngi Bumbulvuŋ miɓa ɓi hana ɗaˀ da Israyeleye si na, a zlaka widi cərəwcərəw, a tuwam cõh cõh.

⁵A caka slimiɗ da li nah Bokim, dar a gam mikulihey da Bumbulvuŋ a diga.

⁶Zozuwe a waha zigiduwo, Israyeleye, mbur gar na, nga ruwuy nga naŋ nga naŋ, ɓa ngi tiɓa hirwuyo.

⁷Mizli Israyeley a gam slra da Bumbulvuŋ ar siifa ngi Zozuwe gar waɗ ar siifa ngi mizli micawwahay micifam a dirba Zozuwe, i mizli mupuraka slra madiɗahay gar Bumbulvuŋ miga taŋ da Israyeleye.

⁸Zozuwe, mangal ngi Nun, gawla ngi Bumbulvuŋ, a muc ti vi skat ti kuruˀu.

⁹A dikaka angi hirwuy muvulakaŋ di da naŋ, a Timnat-Heres, a muwã Efrayim, kini tir vay muŋ ngi muwã Gaˀak.

¹⁰Akẽh na, mizli mendele tayna gar a micam. A dirba taŋ, mizli mendele mekelemey a slam ma, amma taŋ a sinaka Bumbulvuŋ mata, ko slra naŋ miga da Israyeley na kwana, a si na ka ta

¹¹Israyeley a gam gwat malambaˀ avu Bumbulvuŋ, a huruk hurukam a mbuŋ Baˀalay.

¹²Bumbulvuŋ, Buymisemuŋ ngi dideˀ taŋhay mubo ti taŋ ti ruwuy Ezipte na, a pulakaŋ fuku, dar a sipam kuli ngi mizli mekelemey mugun hirnga taŋ na. A hurukom a mbuŋ kuli tayna, a slikiɗaka mevel da Bumbulvuŋ.

¹³A pulaka Bumbulvuŋ fuku, a gam mezegwel da Baˀal ati Astarte.

¹⁴Bumbulvuŋ a slikiɗ himaˀ fõh fõh ar Israyeleye: a pula taŋ mbak da mufuyvuhoy a fuyoko taŋ, a hiɗikaka taŋ da mesene taŋhay mugun hirnga taŋ na. Ko a ndilaka ngi cici zlak a mbuŋ mesene taŋhaya gu mata.

¹⁵Taŋ mibam le ng'ar vurum gar na, gidaŋ ngi Bumbulvuŋ a ro ar taŋ, ɓa mendere a luuma taŋ, kaɓa naŋ miɓa taŋ di ti hudum tuwa, hã bonoy taŋ a gi fineˀ gidaŋ wãˀ.

¹⁶Akẽh na, Bumbulvuŋ a slino taŋ migi kiitahay, dar migi kiitahay a lahaka taŋ tisi haŋ ngi mivivuhoyo.

¹⁷Amma ko taŋ a cinaka mi da migi kiita taŋhay vuna ta ma. Asi ara huruk hurukam a mbuŋ kulihey, ara hurukom a mbuŋ taŋ. A ngizlam kutum avu jiviɗ ngi dideˀ taŋhay misipaka zleˀe. Dideˀ taŋhay a sipaka ɓimuɗuva ngi Bumbulvuŋ le, amma taŋ a gam ka dideˀ taŋhaya ta.

¹⁸Ti Bumbulvuŋ mislino taŋ migi kiitahay le na, migi kiita gar na, Bumbulvuŋ naŋ da ati naŋ. Ti migi kiita misi ada ar siifa aruŋ na, a laha Israyeley avu mesene taŋhaya. Naŋ kine, da Israyeley mira tuwam ti mesene taŋhay maguzuvuraka taŋ, yo magaka taŋ malambaˀ na, Bumbulvuŋ a pura taŋ ircece.

¹⁹Amma da migi kiita a muc le na, a maka hiri ngi gi malambaˀa fineˀ ngi dideˀ taŋhaya. A sipam kulihey, a gaka taŋ mezegwel, yo a hurukom a mbuŋ taŋ. Slra taŋ malambaˀ ati gi gwat taŋ ngi cine mi ta na, a ngumam pul naŋ ta ndiɗaˀ wãˀ.

²⁰Bumbulvuŋ a slikiɗ mevel fõh fõh ar Israyeleye, a ɓi: «Ani sukwi ngi mizli hana, a ngilaka ɓi ngi jumoˀay ɗu le, jumoˀay misi ya miɓa ɗaˀ le da dideˀ taŋhaya, yo a cinaka mingiɓi ɗu ta.

²¹Naŋ kine, Zozuwe, ti naŋ mumuc t'aruŋ na, sukwi naŋ mupula taŋ mbak, a ɓula taŋ ta na, ya kwana, y'anta sa ɓul purla le asi taŋ ta ya.

²²A gi kanah na, ɓa ngi ci a kwacay Israyeley, ɓa ngi sina, sipa jiviɗ nga ya Bumbulvuŋ na, zliv a sa jaka ɓi nah a hirnga kwa malla a jaka ta kwa, yo a sa sipaka jiviɗ ɗu kaɓa dideˀ taŋhay zleˀe na ya kwana kini.»

²³Dar Bumbulvuŋ a pula sukwi ngi mizli tayna a cifam asi ruwuyo, a vula taŋ asi haŋ ngi Zozuwe ɓa a ɓula taŋ kutum ta.