Read South Giziga JDG 20 Bible Online

JDG 20 - South Giziga bible

JDG 20

¹Israyeley gar a cikilam a Mispa a mbuŋ Bumbulvuŋ, ˀay purla. A soko tika tika gar, zle a Daŋ tir vay muŋ, hã a Berseba tir vay ruwuy waɗ ti ruwuy Galaˀat tisi pas ngi mipriki.

²Buy ngi mizli gar, sukwi Israyel gar, a ram ng'ar cikil ngi mizli ngi Buymisemuŋhoyo. Mizli misi saray misinaka kiɗa vu ti maslalama, taŋ soje durmuk skat skat mufaɗ.

³Dideˀ ngi Benjameŋhey a cinam na, sukwi ngi Israyeleye, mekelemey a cikilam le a Mispa. Israyeley a ɓam: «Mungra mukuyta wãˀ hana, a gi mbri mbrike, inga slufam ndra di.»

⁴Mbur Levi mikiɗaka ngwas naŋ tuwa, a mbiɗa: «I ndiloko ati ngwas ɗu mangasla a Gibeya, hirwuy Benjameŋ, i hinam a diga, asi duvuɗ a ji le.

⁵Mizli Gibeyahay a soko, ɓa a gikiy malambaˀa, ngi duvuɗo, a ndahaka hay ya misi anga ndah ndah. A wuɗam zleˀe ɓa a kiɗikiy, amma a sa gaka moˀore da mangasl ɗu, hã a muc di wãˀ.

⁶Dar yi zuɓa vagay naŋ, i puwa paw paw, i slin di da sukwi Israyeley gar. Naŋ kine, mizli Gibeyahay a gam gwat ngi mesem le, gwat mukuyta wãˀ angi hirwuy Israyele.

⁷Kum Israyeley misi aka gar, kiɗam slir, puraka ɓi nah wurenna!»

⁸Mizli gar a slikiɗam, a ɓam ˀay purla: «Ko mbur pal masa mi ng'ar guɗuk naŋ malla ngi hay naŋ anta asi ndra ta.

⁹Wurenna, gwat ndra masa gaka da walahay Gibeya anihĩ: I sa gam ceregezleŋ ar sukwi Israyeley gar,

¹⁰ar mizli kuruˀ gar na, i sa zuɓam pal, ar mizli skata, mizli kuruˀ, ar mizli durmuko, mizli skata, ar mizli durmuk kuruˀo, mizli durmuku, ɓa ngi so ti gwat ngi zum da mizli masa ra kiɗam vu a Gibeya ngi Benjameŋ na, i sa gaka bonoy da Gibeyahaya asi gwat malambaˀ mukuyta wãˀ taŋ migaka na.

¹¹Mizli Israyeley gar a jumom ˀay purla, ɓa ara zlaka walahay Gibeya arleˀe

¹²Sukwi Israyeleye, a slinam mizli ng'ar sukwi ngi Benjameŋ gar, ɓa a ɓaka taŋ: «Mungra mukuyta wãˀ hana, a gi mbri mbri a wuzla kumo ka?

¹³Na wurenna so na, vuloko ndra mizli mizli kesef tayna misi a Gibeya na, ɓa i kiɗaka taŋ vagay vagay, yo ɓa i zuɓaka mungra misi a wuzla Israyeleye.» Amma mizli Benjameŋhey, a ngumam tiɓa ɓi ngi sukum taŋ Israyeleye ta.

¹⁴Mizli Benjameŋhey a soko tir walahay taŋhay gar, a cikilam a Gibeya, ɓa ara gam vurum ati Israyeley.

¹⁵Tapasa, mizli Benjameŋhey musoko tir walahay taŋhay, misinaka kiɗa vu ti maslalama, taŋ durmuk kukur cuw nga merkeɗ, mbak soje hirnga ngi Gibeyahay miskat skat tarnaˀ na le.

¹⁶A wuzla mizli tayna, gulahay asi taŋ mizli skat skat tarnaˀ. Taŋ gar na, ko himac ngi hirnga kwana, a wam haŋ ava ti vehvehlu, ko a lih ta.

¹⁷A slufaka mizli Israyeleye ya, mbak sukwi ngi Benjameŋ le na, taŋ mizli durmuk skat skat mufaɗ, taŋ gar i migi vurumoy, misinaka kiɗa vu le ti maslalam.

¹⁸Mizli Israyeley a ram nga Betel, nga cufuɗa Buymisemuŋ, dar Israyeley a ɓam: Masa ra zla mizli Benjameŋhey dumbuŋ ngi kiɗa vu i waka?» Dar Bumbulvuŋ a ɓi: Masa ra zla taŋ dumbuŋ i sukwi ngi Zuda!»

¹⁹Israyeley a slikiɗam ngi li, ara pam sar gweˀ avu Gibeya.

²⁰A dirba nah, a bam nga kiɗa vu ati Benjameŋhey tuwa, Israyeley a cinjaham a mihiri ngi Gibeya, ɓa ngi kiɗa vu.

²¹Benjameŋhey a boko ti Gibeya ya. Tapas nah na, a kiɗam asi Israyeleye mizli durmuk kukur cuw nga cuw.

²²Mizli Israyeley a tumom vu tum ma, a cinjaham ngi kiɗa vu ar li taŋ mudumbuŋ tuwa ma.

²³Israyeley a ram, a vam hiipas ar li tuwuy a mbuŋ Bumbulvuŋ hã pastaˀ, a cufuɗaka Bumbulvuŋ: «I kiɗam vu ati sukum ndra Benjameŋhey aruŋ kwa?» Bumbulvuŋ a mbiɗa taŋ di: «Kiɗam vu!»

²⁴Put ngi miprik naŋ ma na, Israyeley a bam nga luuma sukwi ngi Benjameŋ ma.

²⁵Ngi hin mucuw naŋ na, mizli Benjameŋhey a boko nga zliram dibiɗ ati taŋ, a kiɗam asi Israyeley misinaka kiɗa vu le ti maslalama, mizli durmuk kuruˀ nga dangafaɗ ma.

²⁶Akẽh na, Israyeley keɗeɗe gar, a ram nga Betel, ara tuwam joa mbuŋ Bumbulvuŋ a diga, a gam dalyam hiipas tapasa, hã pastaˀa. A gam mikuli mizlam zlam waɗ mikuli ngi luuma zuy a mbuŋ Bumbulvuŋ.

²⁷Israyeley a cufuɗaka Bumbulvuŋ. Tapasa, naɓa akoti ngi jumoˀay ati Bumbulvuŋ naŋ da a Betele.

²⁸Tapasa, magi di slra i Pinas mangal ngi Eliyazar, dideˀ meciɗek ngi Aroŋ. Israyeley a cufuɗaka Bumbulvuŋ, a ɓakaŋ: «I bam nga kiɗa vu ati sukum ndra ziri ngi Benjameŋheye ɓula si kwa, malla i pulaka kwa?» Bumbulvuŋ a mbiɗa taŋ di: «A ram, asi ti prike, i sa vulukum taŋ asi haŋ kum.»

²⁹Mizli Israyeley a ɗumom sojehey ɗum ɗum gun hirnga ngi Gibeya.

³⁰Ar hin mimakir naŋ na, Israyeley a bam nga kiɗa vu ati Benjameŋheye, a cinjaham le kaɓa hõyyõ.

³¹Mizli Benjameŋhey a boko nga zlir dibiɗ ti Israyeleye, Israyeley a pulaka taŋ mbak a ɓulaka taŋ kileŋ avu walahay Gibeya, dar Benjameŋhey a zlaka kiɗ taŋ, kaɓa taŋ makiɗaka taŋ hõyyõ, a kiɗam mizli kukur makir asi Israyeleye, a kiɗaka taŋ a ɓuh, ar jiviɗ miɓaˀ nga Betel waɗ miɓaˀ nga Gibeya.

³²Mizli Benjameŋhey a ɓam: «I ra kiɗaka taŋ kaɓa misi hõyyõ tuwa ma.» Dambalaka Israyeley a ɓam zleˀe na: «I sa kilam, ɓa i ram taŋ nga jiviɗ ngi ɓuh, kileŋ avu walahaya.»

³³Mizli Israyeley gar a pulaka li taŋ misi zleˀe, ara ndaham ndah ndah ngi kiɗa vu a Baˀal-Tamar. Naɓa Israyeley muɗum ɗum tuwa, a boko tir li ɗum taŋ, a ndilam vu kuvbum ar hĩhĩy ngi Gibeyahaya.

³⁴Soje hirngahay durmuk kuruˀ ngi Israyeleye, a ram taˀ dibiɗ ng'ar Gibeya, kiɗa vu a bul vu le. Amma Benjameŋhey a sinaka bonoy madiɗa mawuɗ a luuma taŋ na ta.

³⁵Bumbulvuŋ a kiɗa Benjameŋhey a mbuŋ Israyele. Tapasa Israyeley a zizam asi Benjameŋheye mizli durmuk kukur cuw nga zlum ti mizli skat, i mizli misinaka kiɗa vu le ti maslalamay.

³⁶Mizli Benjameŋhey a puraka keɗ keɗ na, Israyeley ara kiɗaka taŋ. Israyeley a pulaka taŋ le mbak, asi ara njaham hiri ar mizli taŋ mupulaka taŋ ɗum ɗum gun Gibeya tuwa.

³⁷Mizli muɗum ɗumoy tuwa, a ndilam vu kuvbum ng'ar walahaya, a tiɓaka, a ngizlaka mizli kap ti maslalam.

³⁸Dambalaka Israyeley a ɓam le ɗaˀ ɗaˀ le ati mizli muɗum ɗumoy tuwa, ɓa a gaka cunju tislik ar walahaya.

³⁹Mizli Israyeley a mbiɗam duba waˀ waˀ, a kilam ar vurumo, dar mizli Benjameŋhey a kiɗam asi Israyeleye ma, a kiɗam gwat ngi mizli kukur makir. A ɓam: «Kayya! I kiɗaka taŋ le wãˀ, kaɓa ndra mikiɗaka taŋ mudumbuŋ tuwa ma!»

⁴⁰Amma cunju mitirslik ngi biga taŋ tuwa, a zli le, ara tirslika walahaya. Benjameŋhey a mbuɗam hiri murdirba taŋ, keɗ na, walahaya gar, i vu njilim njilim nga muŋ.

⁴¹Ar nah ma na, mizli Israyeley a mbiɗam ng'ar Benjameŋhey a muŋ ma, a muɗa didak le da Benjameŋheye, asi a puraka na, ɓi a luuma taŋ le.

⁴²A mbuɗam duba avu Israyeleye, mbak kil nga wuzlaɓuh mikirɗak kirɗak. Amma ara ndilam gajaˀ ar mizli misi ti vendeke. Mizli muɗum ɗumoy zleˀe tuwa, a ngizlaka taŋ kuɗup ti diga ma.

⁴³Mizli Israyeley a gunoko hirnga ngi Benjameŋheye gun, a gindiɗaka taŋ mbak le ta, ara jirngislaka taŋ kiɗ a ciki Gibeya, tisi pas ngi miprik naŋ.

⁴⁴Asi Benjameŋheye, mizli miwirwirey durmuk kuruˀ nga dangafaɗ mizizam.

⁴⁵Benjameŋhey a mbiɗam duba ma, a kilam kini ngir ti wuzlaɓuh mikirɗak kirɗak, ngir ti muwã Rimoŋ. A kiɗam ɓaˀ ɓaˀ a jiviɗe, mizli durmuk zlum. A gindiɗaka taŋ sesẽŋ a Gidom, a kiɗam asi taŋ mizli durmuk cuw ma.

⁴⁶Mizli mikiɗahay tapasa, asi Benjameŋheye, a gam jommo gar mizli durmuk kukur cuw nga zlum, i mizli misinaka kiɗa vu le ti maslalam, mizli miwirwirey.

⁴⁷Mizli skat skat merkeɗ asi mizli mikilam nga wuzlaɓuh mikirɗak kirɗak tuwa, a laham le, a jiɗam nga muwã Rimoŋ, a gam kiya mufaɗ a diga.

⁴⁸Israyeley a mbiɗam pulaˀ ng'ar is ngi Benjameŋheye. Mizli ngir walahayay, ginewey ati gwat taŋ mulumam le gar na, Israyeleye, a ngumaka taŋ ti maslalam. Yo ma na, walahay taŋ mulumaka le a mbuŋ gar na, a ɗuvakaŋ vu.