Read South Giziga JDG 21 Bible Online

JDG 21 - South Giziga bible

JDG 21

¹Mizli Israyeley micikilam a Mispa, a hudumom, a ɓam: «Ko mbur asi ndra, a vul zuŋ naŋ da mbur Benjameŋ ngi ngwasa ta.»

²Tapasa, mizli a ram nga Betel, a cifam joa diga, a mbuŋ Buymisemuŋ hã pastaˀ. A wudam, a tuwam kaɗam kaɗam.

³A ɓam: «Aw Bumbulvuŋ, Buymisemuŋ ngi Israyel, i mi migi ɓa sukwi pal a wuzla sukwi Israyele naŋ anta na ka?»

⁴Li naŋ muwun na, mizli a slikiɗam ngi miprik prik, a ndiram li gi mikuli ar li nah, a gam mikuli mizlam zlam wãˀ waɗ mikuli ngi ngiɓi ˀay.

⁵Israyeley a ɓam na: «A wuzla sukwi Israyeley gar na, misawa ng'ar cikil a ciki Bumbulvuŋ a Mispa ta na, i sukwi wanaka?» Naŋ kine, a hudumom le, ko wa gar muru ng'ar cikil a mbuŋ Bumbulvuŋ a Mispa ta na, a kiɗaka vagay.

⁶Israyeleye, ircece ara ga taŋ ar sukum taŋ Benjameŋheye, a ɓam: «Dana, sukwi ngi wuzla Israyele pal a guh le.

⁷Ani i hudumom le a mbuŋ Bumbulvuŋ, Ndr'anta sa vulaka ziri ndrahay da Benjameŋhey ngi ngwasa ta. Na sukwi ngi Benjameŋ mindir vuna na, i sa lumoko taŋ ngwas a ma ska?»

⁸Dar a cufuɗam vu: «A wuzla sukwy Israyele, muru ng'ar cikil a mbuŋ Bumbulvuŋ a Mispa ta na, ada kwa?» Keɗ keɗ na, ko mbur Yabes ngi Galaˀat loŋ muru ng'ar walahay guɗuk, ar cikile anta.

⁹Naŋ kine, ti taŋ muslufaka mizli na, ko mbur ngi ruwuy Yabes ngi Galaˀat loŋ anta.

¹⁰Mizli micikilam tuwa, a slinam mizli migi vurumoy durmuk kuruˀ nga cuw, a ɓaka taŋ na: «A ram, ara ngizlaka mizli ngi ruwuy Yabes ngi Galaˀat na pay ti maslalam, waɗ ngwasay ati ziri taŋhaya!

¹¹Gwat kum masa gaka ani: kisa ngizlaka mizli ziley ati ngwasay misina ziley le na pay gar.»

¹²Asi ruwuy Yabes ngi Galaˀata, a lumam ziri diili mungbuˀ ngbuˀhoy, misina ziley ta, taŋ skat skat mufaɗa. Joˀ a ram taŋ ng'ar walahay Silo, a ruwuy Kanaˀana.

¹³Mizli micikilam gar, a slinam mizli ng'avi ziri ngi Benjameŋhey misi a muwã Rimoŋ, ɓa a ɓaka taŋ ɓi ngi cifi zuy zuy ati taŋ.

¹⁴Mizli Benjameŋhey a mam kutum ngi hay taŋhay, dar a vulaka taŋ ngwas ngi ruwuy Yabes ngi Galaˀatay mindiram ti siifahay na, amma a zlira taŋ ta.

¹⁵Mizli Israyeley a puraka Benjameŋheye geˀ ircece, asi Bumbulvuŋ a pul li le njoŋ ar sukwi Israyele.

¹⁶Akẽh na, mizli micawwahay ngir jum ngi Israyeley a ɓam na: «Ani i ngizlaka ngwas Benjameŋheye le pay, na mizli mindiram manja ngwasay na, i gam mbri ɓa a lumam ngwasaya ka?

¹⁷Anja sey tizer ngi Benjameŋ ada, ɓa ko sukwi pal a wuzla Israyele a muc ta.

¹⁸Ani ndra tuwa, i vulaka taŋ ziri ndraˀahaya, ɓa a ɗuvaka taŋ gu ta.» Naŋ kine, Israyeley a hudumom le zleˀe, a ɓam: «Mbur muvula zuŋ naŋ le da sukwi ngi Benjameŋ ɓa a ɗuva na, i minisa le.»

¹⁹Amma a wulkam keŋ, a ɓam: «Vur vi gar na, ada gam muguzlum ngi Bumbulvuŋ a Silo, mikini tir vay muŋ ngi Betel, tir vay ruwuy ngi Lebona, kini tisi pas ngi miprik ngi jiviɗ ngi Betel ati Sikem.»

²⁰Dar a vulaka kuti da ziri ngi Benjameŋheye, a ɓaka taŋ: «A ra ɗumom ɗum ɗum ar guva ngi gudubunoy!

²¹Ki sa puram hiri, da ziri diili Silohoy muboko le, ɓa a ɓurgam ndah ndah na, kisa boko tir guva, mbur gar a ji zuŋ Silo pal pal ngi ngwasa, joˀ ki cohom taŋ nga ruwuy Benjameŋ.

²²Gwat asinta, da cine taŋhay malla sukum taŋhay a sa tuwam le avu ndra na, i sa ɓaka taŋ: Kilam mesem taŋ, asi i hiloko taŋ ngwasaya tiɗeˀe ar kiɗa vu ngi Yabes na ta, yo kum vuna kwana, ki vulaka taŋ tihaŋ kumo gu ta, da ki vulaka taŋ le na, naɓa ki ngilaka hudumo le.»

²³Mizli Benjameŋhey a gaka kahana so. Ziri diilihey taŋ mijaka taŋ ar li ɓuruk a Silo tuwa na, taŋ gujuˀo a hirnga taŋ. A cohom, a mam nga ruwuy taŋ, a ndiraka walahay taŋhaya, a pam ar taŋ.

²⁴Akẽh so na, Israyeley a waham, mbur gar aru ng'ar sukwi naŋ, nga wuzla muy naŋhay, ara cifam ar li ngi mburo ngi mburo.

²⁵Ti nah na, naɓa buy anta asi ruwuy Israyele ta. Mbur gar a gi ka naŋ mawuɗo.